ជំនួបព្រឹត្តិការណ៍ FIFA World Cup ឆ្នាំ២០១៨នៅរុស្ស៊ី ឈានដល់ជំនួបពូល E និង F។ ក្នុងពូល E ស៊ែប៊ីបើកឆាកជាមួយនឹងជ័យជម្នះ ១-០ លើកូស្តារីកា មុនពេលប្រេស៊ីលស្មើស្វីស ១-១។ រីឯក្នុងពូល F ម្ចាស់ការពារតំណែងអាល្លឺម៉ង់ រងនូវការខកចិត្តដោយចាញ់ម៉ិកស៊ិក ១-០ ។
ការទាត់បាល់ហ្វ្រីឃីកចូលទីនៅតង់ទីពីររបស់ Aleksandar Kolarov នាំឲ្យស៊ែប៊ីទទួលបាន៣ពិន្ទុយ៉ាងពេញចិត្តពីជំនួបបើកឆាកពូល E ជាមួយកូស្តារីកា នៅកីឡដ្ឋាន Samara Arena។ ក្នុងការប្រកួតនេះ Branislav Ivanovic បង្ហាញខ្លួនជាលើកទី១០៤សម្រាប់ស៊ែប៊ី ហើយបានក្លាយជាកីឡាករដែលចូលលេងច្រើនជាងគេក្នុងជម្រើសជាតិជំនួស Dejan Stankovic (១០៣)។
ម្ចាស់ការពារជើងឯកអាល្លឺម៉ង់ រងនូវការខកចិត្តនាការប្រកួតបើកឆាកពូល F ដោយកីឡាករម៉ិកស៊ិប Harving Lazona បានស៊ុតបាល់បញ្ចូលទីនៅពាក់កណ្តាលតង់ទីមួយនៅកីឡដ្ឋាន Luzhniki Stadium។ នេះជាបរាជ័យលើកដំបូងរបស់អាល្លឺម៉ង់ក្នុងការប្រកួតបើកឆាក World Cup បើគិតចាប់តាំងពីអាល្លឺម៉ង់ខាងលិចចាញ់អាល់ហ្សេរីយ៉ានៅឆ្នាំ១៩៨២ ។ ជាមួយគ្នានេះផងដែរ ខ្សែការពារម៉ិកស៊ិក Rafael Marquez បង្ហាញខ្លួននៅ World Cup លើកទី៥ ស្មើកីឡាករម៉ិកស៊ិកម្នាក់ទៀត គឺ Antonio Carbajal និងកីឡាករអាល្លឺម៉ង់ Lothar Matthaus។
សម្រាប់ការប្រកួតដែលឆ្លងចូលថ្ងៃចន្ទ ម្ចាស់ជើងឯក៥ជំនាន់ប្រេស៊ីល ត្រូវបានស្វីសតាមស្មើលទ្ធផល ១-១ សម្រាប់ជំនួបពូល E។ Philippe Coutinho រកគ្រាប់បាល់នាំមុខសម្រាប់ប្រេស៊ីលនៅតង់ទីមួយ ហើយ Steven Zuber បានតែតតាមស្មើវិញនៅតង់ទីពីរ ខណៈឱកាសរបស់ Neymar ជាច្រើនត្រូវបានរារាំងដោយខ្សែការពារស្វីស។ នេះជាការខកខានទទួលជ័យជម្នះលើកដំបូងរបស់ប្រេស៊ីលពីការប្រកួតបើកឆាក បើគិតចាប់តាំងពីឆ្នាំ១៩៧៨មក៕