អន្តរជាតិ
លោក ជេក ម៉ា ភ្ញាក់ផ្អើលដែលលោក មហាធៀ មានចំណេះដឹងខ្ពស់ពីបច្ចេកវិទ្យា រូបភាព៖ គណនី Twitter លោកនាយករដ្ឋមន្ត្រី មហាធៀ
× ថ្ងៃចន្ទទី ១៨ មិថុនា ស្ថាបនិកក្រុមហ៊ុនអាលីបាបា លោក ជេក ម៉ា បានចូលជួបពិភាក្សាជាមួយលោក មហាធៀ មហាម៉ាត់ នាយករដ្ឋមន្ត្រីទី ៧របស់ម៉ាឡេស៊ី ។ ក្នុងជំនួបពិសេសនេះ មហាសេដ្ឋីចិនរូបនេះបង្ហាញអារម្មណ៍រំភើប និងភ្ញាក់ផ្អើលដែលនាយករដ្ឋមន្ត្រីមានវ័យ៩២ឆ្នាំមានចំណេះដឹងជ្រៅជ្រះពីបច្ចេកវិទ្យានោះ។
ជំនួបរវាងលោក ជេក ម៉ា និងលោក មហាធៀ គឺធ្វើឡើងនៅការិយាល័យនាយរដ្ឋមន្ត្រីនៅ Putrajaya។ មហាសេដ្ឋីចិននេះនាំប្រតិភូមួយក្រុមផងដែរក្នុងពេលចូលជួបសម្តែងការគួរសមជាមួយប្រមុខរដ្ឋាភិបាលម៉ាឡេស៊ី និងសមាជិកគណរដ្ឋមន្ត្រីសំខាន់ៗមួយចំនួននោះ។
បើតាមទីភ្នាក់ងារព័ត៌មានម៉ាឡេស៊ី Bernama លោក ជេក ម៉ា បានចំណាយពេលមួយម៉ោងដើម្បីផ្លាស់ប្តូរ និងចែករម្លែកគំនិតយោបល់នានាជាពិសេសពាក់ព័ន្ធនឹងការឈានទៅកាត់បន្ថយភាពក្រីក្រ និងលើកស្ទួយយុវវ័យក្នុងអាជីវកម្មខ្នាតតូច និងក្នុងវិស័យបច្ចេកវិទ្យាផង។
លោក ជេក ម៉ា បានថ្លែងប្រាប់ទីភ្នាក់ងារព័ត៌មានខាងលើដដែលថា ជំនួបលើកដំបូងរបស់លោកជាមួយលោក មហាធៀ មានលក្ខណៈល្អប្រសើរណាស់ ហើយអ្វីដែលលោកពេញចិត្ត និងភ្ញាក់ផ្អើលខ្លាំងនោះគឺចំណេះដឹងរបស់លោក មហាធៀ ពាក់ព័ន្ធនឹងបច្ចេកវិទ្យាបច្ចុប្បន្នតែម្តង។
ក្រៅពីជួបពិភាក្សាជាមួយនាយករដ្ឋមន្ត្រី មហាធៀ លោក ជេក ម៉ា ក៏បានជួបជាមួយរដ្ឋមន្ត្រីហិរញ្ញវត្ថុម៉ាឡេស៊ីថ្មីលោក Lim Guan Eng កាលពីថ្ងៃអាទិត្យក្នុងអាហារពេលល្ងាចរួមគ្នាដែរ។
តាមពិតទៅ ដើមឡើយ លោក ជេក ម៉ា ត្រូវជួបជាមួយលោក មហាធៀ តាំងពីដើមខែមិថុនាម្ល៉េះ ប៉ុន្តែសំណើរសុំនេះត្រូវបានពន្យារសិនដោយសារលោក មហាធៀ ចង់រៀបចំគណៈរដ្ឋមន្ត្រីថ្មីឲ្យបានរួចរាល់សិន។ ការចូលសម្តែងការគួរសមជាមួយមេដឹកនាំម៉ាឡេស៊ីនេះ ក៏កើតឡើងបន្ទាប់ពីរដ្ឋាភិបាលម៉ាឡេស៊ីថ្មីសន្យាត្រួតពិនិត្យឡើងវិញលើកិច្ចព្រមព្រៀងជាច្រើនដែលរដ្ឋាភិបាលមុនចុះជាមួយចិនដែរក្នុងនោះមានគម្រោងសង់ផ្លូវរថភ្លើងតំបន់សមុទ្រភាគខាងកើត (East Coast Rail Line)។
ដោយឡែក មហាសេដ្ឋីចិនស្ថាបនិកក្រុមហ៊ុន អាលីបាបា នេះត្រូវបានតែងតាំងដោយរដ្ឋាភិបាលម៉ាឡេស៊ីមុនរបស់លោក ណាជីប រ៉ាហ្សាក់ ជាទីប្រឹក្សាសេដ្ឋកិច្ចឌីជីថល (Digital Economic Adviser) ហើយលោកមានតួនាទីសំខាន់ក្នុងការជួយជ្រោមជ្រែងរដ្ឋាភិបាលម៉ាឡេស៊ីអនុវត្តតំបន់សេដ្ឋកិច្ចសេរីឌីជីថល (Digital Free Trade Zone) ដែលមានគោលដៅលើកស្ទួយពាណិជ្ជកម្មអ៊ីនធឺណិត និងគាំទ្រសហគ្រាសធុនតូច និងមធ្យមនៅទូទាំងប្រទេសផង៕
Tag:
មហាធៀ មហាម៉ាត់
ជេក ម៉ា
© រក្សាសិទ្ធិដោយ thmeythmey.com