FIFA
កីឡាអន្តរជាតិ
អន្តរជាតិ
World Cup៖ ប៉ូលិសរុស្ស៊ី បណ្តេញអ្នកគាំទ្រអង់គ្លេស២នាក់ពីរថភ្លើងដែលធ្វើដំណើរទៅមើលជំនួប អង់គ្លេស-ទុយនីស៊ី
× ប៉ូលិសរុស្ស៊ីនៅថ្ងៃទី១៨ ខែមិថុនា បានបណ្តេញ និងហាមអ្នកគាំទ្ររបស់ក្រុមជម្រើសជាតិអង់គ្លេស២នាក់ឲ្យចុះពីរថភ្លើងដែលត្រូវធ្វើដំណើរទៅកាន់ក្រុង Volgograd ដើម្បីទស្សនាការប្រកួតបើកឆាករវាងអង់គ្លេសទល់នឹងទុយនីស៊ីសម្រាប់ការប្រកួតបើកឆាកពូល H នៃពានរង្វាន់ FIFA World Cup ឆ្នាំ២០១៨។
យោងតាមការផ្សាយរបស់ទីភ្នាក់ងារព័ត៌មាន AFP អ្នកគាំទ្រទាំងពីររូបនោះត្រូវបានចោទប្រកាន់ថាមានស្ថានភាពស្រវឹង និងមានឥរិយាបថមិនសមរម្យ ហើយប៉ូលិសរុស្ស៊ីក៏បានសម្រេចឲ្យអ្នកទាំងពីរចុះពីលើរថភ្លើង។ ប៉ុន្តែភ្លាមៗនោះបុរសម្នាក់បានដណ្តើមកាំភ្លើងពីប៉ូលិស ខណៈដែលម្នាក់ទៀតវាយបំបែកកញ្ចក់រថភ្លើង ហើយក៏ត្រូវបានចាប់ខ្លួនទាំងពីរនាក់តែម្តង។
ប៉ូលិសបានរាយការណ៍ថា អ្នកគាំទ្រមួយរូបដែលវាយកញ្ចក់ត្រូវបានបញ្ជូនទៅកាន់មន្ទីរពេទ្យ ព្រោះបានយកអំបែងកញ្ចក់ដែលខ្លួនវាយបំបែកមកអាដៃខ្លួនឯង។ រីឯម្នាក់ទៀតដែលព្យាយាមចាកចេញពីរថភ្លើងត្រូវបានឃុំខ្លួន និងចោទប្រកាន់ពីបទមិនគោរពតាមបញ្ជារបស់សម្ថកិច្ច។
ករណីនេះ កើតឡើងមុនពេលការប្រកួតរវាងអង់គ្លេសទល់នឹងទុយនីស៊ីក្នុងការប្រកួតពានរង្វាន់ពិភពលោកនៅលើទឹកដីរុស្ស៊ីជាលើកដំបូង បន្ទាប់ពីមានអំពើហិង្សាដ៏ធ្ងន់ធ្ងរបានផ្ទុះឡើងរវាងក្រុមអ្នកគាំទ្ររុស្ស៊ី និងអង់គ្លេសនៅទីក្រុង Marseille ប្រទេសបារាំងអំឡុងការប្រកួតពានរង្វាន់អឺរ៉ុប Euro 2016។
បើនិយាយពីនយោបាយវិញ ប្រទេសទាំងពីរក៏កំពុងមានបញ្ហាការទូតជាមួយគ្នាខ្លាំងខ្លាដែរ ជុំវិញករណីបំពុលអតីតចារកម្មរុស្ស៊ីធ្វើការឲ្យអង់គ្លេស Sergei Skripal និងកូនស្រី។ ជុំវិញការប៉ុនប៉ងធ្វើឃាតលោក Skripal នេះ អង់គ្លេសបានចោទរុស្ស៊ីទាំងស្រុង ទោះជាមិនអាចរកភស្តុតាងបញ្ជាក់ពីកំហុសក្ដី៕
Tag:
បាល់ទាត់
FIFA Word Cup
អង់គ្លេស
រុស្ស៊ី
© រក្សាសិទ្ធិដោយ thmeythmey.com