អន្តរជាតិ
រដ្ឋមន្ត្រីការពារជាតិបារាំង៖ ត្រាំ បង្ខំឲ្យអឺរ៉ុបបង្កើតកិច្ចសហប្រតិបត្តិការយោធាថ្មី រដ្ឋមន្រ្តីការពារជាតិបារាំង Florence Parly (រូបភាព AFP)
× ភាពមិនច្បាស់លាស់នៃនយោបាយរបស់ប្រធានាធិបតីអាមេរិក ដូណាល់ ត្រាំ កំពុងធ្វើឲ្យអឺរ៉ុបមិនស្រណុកចិត្តយ៉ាងខ្លាំង ជាពិសេសលើវិស័យយោធា។ ការទាមទារម្ដងហើយម្ដងទៀតឲ្យលោក ត្រាំ ឲ្យអឺរ៉ុបចេញថ្លៃចំណាយសម្រាប់សម្ព័ន្ធយោធាណាតូ គឺជារឿងដែលធ្វើឲ្យអឺរ៉ុបមិនសូវរីករាយឡើយ។ រដ្ឋមន្ត្រីការពារជាតិបារាំង Florence Parly នៅថ្ងៃទី២១ ខែមិថុនា និយាយថា អឺរ៉ុបត្រូវការសមាហរណកម្មយោធាខ្លួនឯង បើអាមេរិកនៅតែមិនច្បាស់លាស់បែបនេះ។
តាំងពីឡើងកាន់តំណែងមកនោះ លោកប្រធានាធិបតី ដូណាល់ ត្រាំ មិនបានបង្ហាញការប្ដេជ្ញាចិត្តច្បាស់លាស់ចំពោះបក្សសម្ព័ន្ធយោធាណាតូឡើយ ទោះជាអាមេរិកមានឈ្មោះជាបងធំក្ដី។ ការចេញថ្លៃចំណាយរបស់ណាតូ ជាបញ្ហាធំដែលធ្វើឲ្យអឺរ៉ុបឈឺក្បាលខ្លាំង។ ជាញឹកញយ អាមេរិកតែងទទូចឲ្យរដ្ឋអឺរ៉ុបដែលជាសមាជិកណាតូ បង្កើនការចំណាយរបស់ខ្លួនដើម្បីអាមេរិកអាចកាត់បន្ថយទំហំទឹកប្រាក់ដែលខ្លួនត្រូវចំណាយលើសម្ព័ន្ធយោធានេះ។
រដ្ឋមន្ត្រីការពារជាតិបារាំងលោកស្រី Florence Parly លើកឡើងតាមកញ្ចក់ទូរទស្សន៍ France 2 ថា ក្នុងជំនួបណាតូឆ្នាំមុន លោក ត្រាំ មិនបានបង្ហាញការគាំទ្រចំហរជុំវិញគោលការណ៍របស់ណាតូ «នៅពេលរដ្ឋសមាជិកមួយរងការវាយប្រហារ សមាជិកផ្សេងទៀតចេញទ័ពជួយ» ឡើយ។ យោងតាមទីភ្នាក់ងារព័ត៌មាន AFP លោកស្រី Parly ចាត់ទុកជំហររបស់លោក ត្រាំ ជាការបង្ករឿងធ្វើឲ្យស្រពេចស្រពិល។
ដោយសារតែរឿងលុយចំណាយនេះហើយ ទើបធ្វើឲ្យអាមេរិក និងសមាជិកផ្សេងទៀតមើលមុខគ្នាមិនសូវត្រង់។ លោក ត្រាំ ដែលមានម្ដងនោះហៅណាតូជាអង្គការហួសសម័យ និយាយថា អាមេរិកបានរងអម្រែកហិរញ្ញវត្ថុយ៉ាងធ្ងន់ ហើយបានទាមទារឲ្យសមាជិកណាតូនៅអឺរ៉ុបចេញថ្លៃចំណាយដ៏ច្រើនសន្ធឹកសន្ធាប់នេះផង។ ប្រមុខការពារជាតិបារាំងខាងលើទាយទុកមុនថា លោក ត្រាំ នឹងនិយាយរឿងនេះម្ដងទៀតក្នុងជំនួបណាតូនៅខែក្រោយ។
ក៏ព្រោះតែការទាមទារឥតឈប់នេះ លោកស្រី Parly និយាយដោយត្រង់ថា ការបង្កើតយោធារួមនៅអឺរ៉ុប ជារឿងចាំបាច់ក្នុងកាលៈទេសៈដែលគេមិនច្បាស់ពីការសន្មត់ដែលអឺរ៉ុបធ្លាប់មាន៧០ឆ្នាំមកហើយនោះ។ បើតាមសម្ដីរដ្ឋមន្ត្រីស្ត្រីរូបនេះ បារាំង និងអាល្លឺម៉ង់បានធ្វើសកម្មភាពជាប្រវត្តិសាស្ត្ររូចហើយតាមរយៈការឯកភាពគ្នាលើការបង្កើតរួមគ្នានូវរថក្រោះ និងយន្តហោះចម្បាំងជំនាន់សម្រាប់ប្រើក្នុងជួរកងទ័ពរៀងៗខ្លួន ក៏ដូចជាបង្កើតកម្លាំងឆ្លើយតបរួមផង។
យ៉ាងណាមិញ ប្រមុខការពារជាតិបារាំងក៏ទទួលស្គាល់ដែរថា ប្រទេសសមាជិកណាតូជាច្រើននៅបន្តទិញសម្ភារយោធាពីប្រទេសមិនមែនអឺរ៉ុបដដែល តែលោកស្រីនិយាយបែបដៀមដាមថា លោកស្រីមិនចាំបាច់និយាយចំឈ្មោះអាមេរិកឡើយ។ លោកស្រីចាត់ទុកបញ្ហាជារឿងដែលត្រូវផ្លាស់ប្ដូរ ព្រោះអឺរ៉ុបមិនត្រូវពឹងផ្អែកខ្លាំងលើប្រទេសក្រៅតំបន់ឡើយ៕
Tag:
អាមេរិក
អឺរ៉ុប
ដូណាល់ ត្រាំ
Florence Parly
© រក្សាសិទ្ធិដោយ thmeythmey.com