អន្តរជាតិ
សហភាពអឺរ៉ុប ប្តេជ្ញាបន្តគាំពារប្រជាជនផ្លាស់ទីលំនៅដោយបង្ខំ និងដោះស្រាយបញ្ហាដែលបង្ខំឲ្យប្រជាជនភៀសខ្លួន រូបភាព៖ EU Observer
× គណៈកម្មាការអឺរ៉ុប បានបង្ហាញការប្តេជ្ញាចិត្តបន្តចូលរួមដោះស្រាយវិបត្តិជនភៀសខ្លួនពិភពលោកនៅថ្ងៃ ២០ ខែមិថុនាឆ្នាំ ២០១៨នេះ។ ក្នុងនាមជាភាគីម្ចាស់ជំនួយ សហភាពអឺរ៉ុបសន្យាបន្តផ្តល់ជំនួយមនុស្សធម៌ គាំទ្រដល់ជនភៀសខ្លួន និងសហការជាមួយភាគីពាក់ព័ន្ធដោះស្រាយបញ្ហាដែលជាឬសគល់នៃវិបត្តិជនភៀសខ្លួនថែមទៀតផង។
សេចក្តីថ្លែងការណ៍រួមមួយរបស់គណៈកម្មការអឺរ៉ុបដើម្បីអបអរថ្ងៃ«ជនភៀសខ្លួនពិភពលោក»ឆ្នាំ ២០១៨ បានបង្ហាញថា គិតត្រឹមឆ្នាំ ២០១៨ នេះចំនួនប្រជាជនដែលផ្លាស់ទីលំនៅដោយបង្ខំនៅទូទាំងពិភពលោកកើនឡើងលើស ៦៨ លាននាក់ហើយ។ បញ្ហាចម្បងដែលបង្កឲ្យមានការបម្លាស់ទីដោយបង្ខំនេះមានដូចជាសង្គ្រាមស៊ីវិល ជម្លោះ និងប្រែប្រួលអាកាសធាតុផងដែរ ហើយវាក៏ក្លាយជាកង្វល់ដ៏ធំមួយសម្រាប់សហគមនអន្តរជាតិផងដែរ។
«រៀងរាល់នាទី រៀងរាល់ថ្ងៃ មនុស្សប្រហែល ៣១នាក់ត្រូវរងការបង្ខិតបង្ខំឲ្យចាកចេញពីលំនៅដ្ឋានរបស់ខ្លួន។ ថ្ងៃនេះមនុស្សយ៉ាងហោចណាស់ ៦៨,៥ លាននាក់ត្រូវចាកចេញពីផ្ទះសម្បែងដោយសារតែជម្លោះ ការធ្វើទុកបុកម្នេញ និងបញ្ហាគ្រោះមហន្តរាយធម្មជាតិ ឬផលប៉ះពាល់នានាដែលបង្កើតឡើងដោយការប្រែប្រួលអាកាសធាតុ។ ក្នុងចំណោមនោះ ២៥,៤ លាននាក់ជាជនភៀសខ្លួន»។ នេះជាការលើកឡើងនៃសេចក្តីថ្លែងការណ៍រួមគណៈកម្មការអឺរ៉ុបនេះ។
ក្នុងសេចក្តីថ្លែងការណ៍ដដែល គណៈកម្មការអឺរ៉ុបបានអធិប្បាយថា បណ្តាសមាជិកសហភាពអឺរ៉ុបបានរួមចំណែកយ៉ាងសំខាន់ក្នុងការធ្វើយ៉ាងណាដោះស្រាយវិបត្តិជនភៀសខ្លួន និងជួយគាំពារពួកគេ ដោយអនុលោមតាមអនុសញ្ញាក្រុងហ្សឺណែវឆ្នាំ ១៩៥១ ដែលចែងពីឋានៈនៃជនភៀសខ្លួននោះ។
ក្នុងនាមជាម្ចាស់ជំនួយនាំមុខគេលើពិភពលោក សហភាពអឺរ៉ុបបានផ្តល់ជំនួយមនុស្សធម៌ និងការគាំទ្រនានាត្រូវដល់ជនភៀសខ្លួន អ្នកស្វែងរកសិទ្ធិជ្រកកោន អ្នកផ្លាស់ទីជម្រកដោយបង្ខំ ទោះជានៅក្នុងនិងក្រៅអឺរ៉ុបក្តី។ ដូចឃើញស្រាប់ ដើម្បីឆ្លើយតបនឹងវិបត្តិជនអន្តោប្រវេសន៍ឆ្នាំ ២០១៥ និងឆ្នាំ ២០១៦ សហភាពអឺរ៉ុបបានផ្តល់សិទ្ធិជ្រកកោនដល់ជនភៀសខ្លួនរាប់សែននាក់ដែលរត់គេចពីសង្គ្រាម ជម្លោះប្រដាប់អាវុធ និងការធ្វើទុក្ខបុកម្នេញផងដែរ។
មកដល់ពេលបច្ចុប្បន្ននេះ អឺរ៉ុបក៏បន្តផ្តល់ការការពារ ការគាំទ្រ និងបន្តឈរនៅជាមួយរាល់ប្រជាជនទាំងឡាយណាដែលត្រូវការជំនួយ។ គ្រាន់តែក្នុងឆ្នាំ ២០១៧ រដ្ឋសមាជិកសហភាពអឺរ៉ុបបានផ្តល់ការការពារខ្លួនដល់ប្រជាជនយ៉ាងហោចណាស់ ៥៣៨០០០នាក់ឯណោះ។
ដោយឡែក ជាតួអង្គសំខាន់មួយនៃទំនាក់ទំនងអន្តរជាតិដែរនោះ សហភាពអឺរ៉ុបក៏ព្យាយាមបង្កើនតួនាទីរបស់ខ្លួនក្នុងការដោះស្រាយមូលហេតុចម្បងនានាដែលធ្វើឲ្យកើតមានវិបត្តិទាំងនេះដែរ។ សហភាពអឺរ៉ុបតែងតែប្រើប្រាស់មធ្យោបាយការទូតដើម្បីបញ្ចប់ជម្លោះ និងបង្កើតស្ថិរភាព និងសន្តិភាពលើពិភពលោកទាំងមូលផង។
សេចក្តីថ្លែងការណ៍ដដែលនោះគូសបញ្ជាក់ថា៖«ក្នុងពេលដែលមានការកើនឡើងនៃការប្រើប្រាស់វោហាសព្ទប្រឆាំងជនភៀសខ្លួនជាជនរងគ្រោះដោយសារសង្គ្រាមនិងការធ្វើទក្ខបុកម្នេញ សហភាពអឺរ៉ុបនឹងបន្តការពារប្រជាជនដែលត្រូវការជំនួយ ហើយយើងក៏នឹងបន្តប្រឹងប្រែងនាំស្ថិរភាពទៅកាន់តំបន់ដែលកំពុងមានជម្លោះផងដែរ»៕
Tag:
គណៈកម្មការអឺរ៉ុប
ជនភៀសខ្លួនពិភពលោក
សហភាពអឺរ៉ុប
© រក្សាសិទ្ធិដោយ thmeythmey.com