ជាតិ
បោះឆ្នោត
សម្តេច ហ៊ុន សែន៖ អ្នកបំផ្លាញប្រជាធិបតេយ្យពិតប្រាកដ គឺអ្នកអំពាវនាវមិនឲ្យពលរដ្ឋទៅបោះឆ្នោត
× អ្នក ដែលអំពាវនាវកុំឲ្យប្រជាជនចូលរួមបោះឆ្នោត និងអ្នកដែលព្យាយាមបង្កចលាចល ក្នុងចេតនាមិនឲ្យមានការបោះឆ្នោត ទើបជាអ្នកបំផ្លាញលទ្ធិប្រជាធិបតេយ្យយ៉ាងពិតប្រាកដ។ នេះជាការឆ្លើយតបរបស់សម្តេច ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា ដោយសំដៅទៅកាន់អតីតក្រុមអ្នកប្រឆាំង។
ប្រមុខរដ្ឋាភិបាល ថែមទាំងហៅការអំពាវនាវមិនឲ្យប្រជាពលរដ្ឋទៅបោះឆ្នោតថា ជាការបំផ្លាញសិទ្ធិរបស់ប្រជាពលរដ្ឋទៀតផង។ បន្ទាប់មក នាយករដ្ឋមន្ត្រីកម្ពុជា ក៏អះអាងថា អ្នក ដែលស្រឡាញ់ និងកំពុងធ្វើឲ្យប្រជាធិបតេយ្យនៅកម្ពុជា ដំណើរការ គឺអ្នក ដែលចូលរួមរក្សាសន្តិសុខជាមួយរដ្ឋាភិបាល និងគាំទ្រការរៀបចំការដោយឯករាជ្យរបស់គណៈកម្មាធិការជាតិរៀបការបោះឆ្នោត។
ក្នុងពិធីចែកសញ្ញាបត្រដល់និស្សិតជាង៣ពាន់នាក់ នៃសាកលវិទ្យាល័យភូមិន្ទភ្នំពេញ នៅព្រឹកថ្ងៃទី២២ ខែមិថុនា ឆ្នាំ២០១៨នេះ ប្រធានគណបក្សកាន់អំណាច បាននិយាយខ្លាំងៗយ៉ាងដូច្នេះថា៖«គេប្រកាសថា យើងជាអ្នកបំផ្លាញប្រជាធិបតេយ្យ នៅពេលយើង ចាត់តាំងការបោះឆ្នោតមួយ ដ៏មានភាពជាក់លាក់។ ២០គណបក្ស [ចូលរួម] មិនមែនលេងទេ....។ អ៊ីចឹង វាគ្រប់គ្រាន់ និងភ្លឺភ្នែកហើយ សម្រាប់អស់លោក ដែលនិយាយថា អ្នកណាស្រឡាញ់ប្រជាធិបតេយ្យ ហើយអ្នកណាស្អប់ប្រជាធិបតេយ្យ។ ប្រជាធិបតេយ្យ នៅកម្ពុជា មិនបានរាថយនោះទេ»។
លោក សម រង្ស៊ី អតីតប្រធានគណបក្សសង្គ្រោះជាតិ និងបក្សពួក នៅក្រៅប្រទេស បានបន្តអំពាវនាវកុំឲ្យប្រជាពលរដ្ឋទៅបោះឆ្នោត នៅថ្ងៃទី២៩ ខែកក្កដា ឆ្នាំ២០១៨។ លោក សម រង្ស៊ី បានហៅការបោះឆ្នោត ដែលគ្មានការចូលរួមពីគណបក្សប្រឆាំងថា ជាការបោះឆ្នោតក្លែងក្លាយ ហើយសហគមន៍អន្តរជាតិ នឹងមិនទទួលស្គាល់នោះទេ៕
Tag:
បោះឆ្នោត
ហ៊ុន សែន
សម រង្ស៊ី
© រក្សាសិទ្ធិដោយ thmeythmey.com