អន្តរជាតិ
នយោបាយជាតិ
UNICEF ទទូចឲ្យរដ្ឋាភិបាលទូទាំងពិភពលោកអនុវត្តគោលនយោបាយ«ឈប់សម្រាកបិតុភាព»
រូបភាព៖ UN News
×![]()
ភ្នាក់ជំនាញអង្គការសហប្រជាជាតិ បានទទូចឲ្យរដ្ឋាភិបាលទូទាំងពិភពលោកផ្តល់ឱកាសបន្ថែមសម្រាប់ ឳពុកគ្រប់រូបដើម្បីចំណាយពេលមើលថែទាំគ្រួសារ ជាពិសេសនៅក្នុងដំណាក់កាលពួកគេ មានកូនដែលទើបតែកើត។ ភ្នាក់ជំនាញ បានរកឃើញថា ក្មេង ឬកុមារ ដែលទទួលបានពេលច្រើនជាមួយទាំងឳពុកនិងម្តាយ មានការលូតលាស់ផ្នែកស្មារតីល្អប្រសើរច្រើន។
មូលនិធិសម្រាប់កុមារនៃអង្គការសហប្រជាជាតិ(UNICEF) ថ្មីៗនេះ បានចេញរបាយការណ៍វិភាគមួយដោយបានអះអាងថា មានប្រទេសចំនួន៩២ នៅមិនទាន់មានគោលនយោបាយសម្រាប់ឳពុកដើម្បីអាចមានលទ្ធភាពឈប់សម្រាកថែទាំគ្រួសារ និងជាពិសេសនោះមើលថែទារករបស់ខ្លួនដែលទើបតែកើត។ នេះបើយោងតាមការចុះផ្សាយរបស់មជ្ឈមណ្ឌលព័ត៌មានអង្គការសហប្រជាជាតិនាសប្តាហ៍មុន។
នាយកប្រតិបត្តិ UNICEF លោកស្រី Henrietta Fore បានលើកឡើងថា ប្រាស្រ័យទាក់ទងវិជ្ជមានជាមួយនឹងម្តាយ និងឳពុកនាគ្រាដំបូងបង្អស់នៃការចាប់កំណើតរបស់ទារក ជួយធ្វើឲ្យការលូតលាស់ខួរក្បាល និងការអភិវឌ្ឍទារកបានល្អប្រសើរ ពោលគឺការផ្តល់ភាពកក់ក្តៅពីម្តាយឳពុក ធ្វើឲ្យទារកកាន់តែមានសុខភាពល្អ និងភាពស្រស់ស្រាយ ក៏ដូចជាជួយបង្កើនសមត្ថភាពនៃការរៀនសូត្រពួកគេផងដែរ។
លោកស្រីនាយក បានបញ្ជាក់តាមរយៈការស្រាវជ្រាវថា នៅពេលឳពុក ផ្តល់ពេលវេលាជាមួយនឹងទារក ឬកុមារច្រើន ការលូតលាស់ និងការអភិវឌ្ឍកុមារ ក៏មានឥរិយាបថបទវិជ្ជមាន និងជាពិសេសនោះពួកគេ ក៏មានសុខភាពផ្លូវចិត្ត ការតាំងចិត្ត និងភាពរីករាយក្នុងជីវិតក៏កាន់តែមានភាពល្អប្រសើរ។
ដោយមើលឃើញពីចំណុចវិជ្ជមាននេះ UNICEF បានទទូចឲ្យរដ្ឋាភិបាលទូទាំងពិភពលោកអនុវត្ត «គោលនយោបាយជាតិគ្រួសាររួសរាយ» ដើម្បីគាំទ្រ និងគាំពារការអភិវឌ្ឍកុមារភាព ដែលរាប់ទាំងអនុញ្ញាតច្បាប់សម្រាប់ មាតុភាព និងបិតុភាព ផង។
លោកស្រីនាយកប្រតិបត្តិ ថ្លែងថា យើង មិនអាចបំពេញសេចក្តីត្រូវការរបស់កុមារគ្រប់រូបបានឡើយ ប្រសិនបើយើង មិនផ្តល់ឱកាសឲ្យម្តាយឳពុករបស់ពួកគេនោះ។ លោកស្រី បន្ថែមថា កន្លងមកដើម្បីគាំទ្រយុទ្ធនាការនេះ UNICEF បានផ្តល់រយៈឈប់សម្រាកបិតុភាពចំនួន១៦សប្តាហ៍សម្រាប់បុគ្គលិករបស់ខ្លួនទូទាំងពិភពលោកដើម្បីមើលថែទាំទារករបស់ពួកគេដែលទើបតែកើត៕
Tag:
UNICEF
បិតុភាព
© រក្សាសិទ្ធិដោយ thmeythmey.com
