អន្តរជាតិ
នយោបាយអន្តរជាតិ
ទីម័រខាងកើត អរគុណឥណ្ឌូណេស៊ីដែលបន្តជ្រោមជ្រែងឲ្យខ្លួនក្លាយជាសមាជិកទី១១ របស់អាស៊ាន
× រដ្ឋាភិបាលក្រុងឌីលី បានថ្លែងអំណរគុណដល់រដ្ឋាភិបាលក្រុងហ្សាការតា ដែលមិនបោះបង់ជំហរជួយជ្រោមជ្រែងទីម័រខាងកើតឲ្យបានសិទ្ធិពេញលេញក្នុងការក្លាយជាសមាជិករបស់អាស៊ាន។ រយៈពេលជិតមួយទសវត្សរ៍ ហើយដែលទីម័រខាងកើតនៅតែស្ថិតនៅក្នុងបញ្ជីឈ្មោះនៃរដ្ឋអង្កេតការណ៍របស់អាស៊ាន។
តាមរយៈជំនួបលើកដំបូងជាមួយប្រធានាធិបតីឥណ្ឌូណេស៊ី លោក ចូកូ វីដូដូ (Joko Widodo) នៅថ្ងៃ២៨ មិថុនា ប្រធានាធិបតីទីម័រខាងកើតលោក Francisco Guterres បានថ្លែងយ៉ាងដូច្នេះថា៖«ខ្ញុំ សូមសម្តែងការដឹងគុណចំពោះឥណ្ឌូណេស៊ី សម្រាប់ការគាំទ្រជាអចិន្ត្រៃយ៍ក្នុងការជំរុញឲ្យទីម័រខាងកើតក្លាយជាសមាជិកមួយរបស់សមាគមប្រជាជាតិអាស៊ីអាគ្នេយ៍ ឬហៅថាកាត់ថាអាស៊ាន។» នេះបើយោងតាមការចុះផ្សាយរបស់ទីភ្នាក់ងារព័ត៌មានឥណ្ឌូណេស៊ី Antara ។
ជំនួបលើកដំបូងដែលធ្វើឡើងក្នុងដំណើរទស្សនកិច្ចប្រមុខរដ្ឋទីម័រខាងកើតទៅកាន់ឥណ្ឌូណេស៊ី ត្រូវបានមេដឹកនាំទាំងពីរផ្តល់តម្លៃខ្ពស់ ជាពិសេសទីម័រខាងកើត ដែលជារដ្ឋក្មេងខ្ចីបំផុតប្រចាំតំបន់អាស៊ីអាគ្នេយ៍។ កន្លងមក ទីម័រខាងកើតពឹងផ្អែកខ្លាំងទៅលើការវិនិយោគពីទាំងសហគ្រាសរដ្ឋ និងក្រុមហ៊ុនឯកជនឥណ្ឌូណេស៊ីដើម្បីរក្សាកំណើនសេដ្ឋកិច្ចរបស់ខ្លួន។
ឆ្លៀតឱកាសនោះដែរ ប្រមុខរដ្ឋទីម័រខាងកើត ក៏បានកោតសរសើរ និងសាទរឥណ្ឌូណេស៊ីដែលបានជាប់ជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិសម្រាប់អាណត្តិឆ្នាំ២០២០-២០២១។
គួរជម្រាបផងដែរថា ទីម័រខាងកើត ទើបតែបានឯករាជ្យពេញលេញនៅក្នុងឆ្នាំ២០០២ទេ។ ក្រោយស្ថានភាពក្នុងប្រទេសមានលក្ខណៈល្អបន្តិចហើយនោះ ទីម័រខាងកើតបានស្នើសុំចូលជាសមាជិករបស់អាស៊ាននៅក្នុងឆ្នាំ២០១១។ ប៉ុន្តែមកទល់ពេលនេះ រដ្ឋក្រីក្របំផុតរបស់ពិភពលោកមួយនេះ មិនទាន់អាចទទួលបានការគាំទ្រពីសមាជិកអាស៊ានទាំងអស់នៅឡើយនោះទេ ពោលគឺទីម័រខាងកើតមាន ឈ្មោះត្រឹមតែរដ្ឋអង្កេតការណ៍របស់អាស៊ានប៉ុណ្ណោះ។
ដើម្បីអាចក្លាយជាសមាជិកអាស៊ានទីម័រខាងកើត ព្យាយាមបំពេញលក្ខខណ្ឌចំនួនបីសំខាន់ដើម្បីឲ្យក្រុមប្រឹក្សាវាយតម្លៃរបស់អាស៊ានមើលឃើញថាខ្លួន មានសមត្ថភាពគ្រប់គ្រាន់។ លក្ខខណ្ឌទាំងបីនោះ គឺផ្តោតសំខាន់ទៅលើសសរស្តម្ភទាំងបីរបស់អាស៊ានរួមមាន សន្តិសុខ-នយោបាយ, សេដ្ឋកិច្ច និងសង្គម-វប្បធម៌។
សូមរម្លឹករឿងការប្រឹងប្រែងរបស់អតីតម្ចាស់អាណានិគមទីម័រខាងកើត គឹឥណ្ឌូណេស៊ីបន្តិច។ កន្លងមក ឥណ្ឌូណេស៊ី តែងតែចេញមុខជ្រោមជ្រែងឲ្យទីម័រខាងកើតឲ្យឆាប់បានចូលជាសមាជិកពេញលេញរបស់ អាស៊ាន។ ឥណ្ឌូណេស៊ី ថែមទាំងធ្លាប់សន្យាថា នឹងធ្វើឲ្យទីម័រខាងកើតក្លាយជាសមាជិកត្រឹមឆ្នាំ ២០១៧ ទៀតផង។ ប៉ុន្តែគ្រប់យ៉ាង មិនអាចកើតឡើងតាមតែមាត់របស់បងធំអាស៊ានមួយនេះឡើយ ដ្បិតការសម្រេចចុងក្រោយ គឺត្រូវផ្អែកលើឯកច្ឆន្ទភាពរបស់សមាជិកអាស៊ានទាំងដប់៕
Tag:
ទីម័រខាងកើត
ឥណ្ឌូណេស៊ី
អាស៊ាន
© រក្សាសិទ្ធិដោយ thmeythmey.com