អន្តរជាតិ
នយោបាយអន្តរជាតិ
ដោយឃើញស្ថានភាពកាន់តែអាក្រក់ ប្រមុខ UN នឹងទៅទស្សនកិច្ចទៅជំរំជនភៀសខ្លួនរ៉ូហ៊ីងយ៉ា ដោយផ្ទាល់
× ប្រមុខអង្គការសហប្រជាជាតិ នឹងបំពេញទស្សនកិច្ចផ្លូវការទៅកាន់បង់ក្លាដែស ដើម្បីថ្លែងអំណរដល់រដ្ឋាភិបាលក្រុងដាហ្កា និងចុះពិនិត្យមើលស្ថានភាពនៃការរស់នៅរបស់ជនភៀសខ្លួនជនជាតិភាគតិចរ៉ូហ៊ីងយ៉ា ដែលកំពុងតែស្នាក់នៅបណ្តោះអាសន្នក្នុងជំរំ នៃប្រទេសបង់ក្លាដែស។
«លោកអគ្គលេខាធិការអង្គការសហប្រជាជាតិ António Guterres និងបណ្តាមន្ត្រីជំនាញជាន់ខ្ពស់របស់អង្គការសហប្រជាជាតិ នឹងផ្តើមបំពេញទស្សនកិច្ចទៅកាន់បង់ក្លាដែសចាប់ពីចុងសប្តាហ៍នេះទៅដើម្បីពិនិត្យមើលពីស្ថានភាពនៃការរស់នៅរបស់ជនភៀសខ្លួនរ៉ូហ៊ីងយ៉ាចេញពីមីយ៉ាន់ម៉ាមកកាន់បង់ក្លាដែសអស់រយៈពេលជាច្រើនខែមកហើយនោះ»។ នេះគឺជាការអះអាងរបស់អ្នកនាំពាក្យរបស់អគ្គលេខាធិការដ្ឋានអង្គការសហប្រជាជាតិលោក Stéphane Dujarric។
តាមការចុះផ្សាយរបស់មជ្ឈមណ្ឌលព័ត៌មានអង្គការសហប្រជាជាតិ នៅថ្ងៃ២៩ ខែមិថុនាអ្នកនាំពាក្យដដែលបានលើកឡើងថា តាមរយៈដំណើរទស្សនកិច្ចនេះ កិច្ចដំបូងដែលលោកអគ្គលេខាធិការ António Guterres ត្រូវធ្វើនោះគឺ ថ្លែងអំណរគុណដល់ចិត្តសប្បុរសរបស់រដ្ឋាភិបាល និងប្រជាជនបង់ក្លាដែស ដែលផ្តល់ទីជម្រក និងការគាំពារនានាដល់ជនភៀសខ្លួនរាប់សិបម៉ឺននាក់។
បន្ថែមពីនេះ ប្រមុខអង្គការសហប្រជាជាតិ ក៏នឹងដឹកនាំប្រតិភូជាន់ខ្ពស់ទៅកាន់ជំរំដែលជនភៀសខ្លួនកំពុងតែរស់នៅនៅ Cox’s Bazar។ លោក នឹងជួបសំណេះសំណាលជាមួយជនភៀសខ្លួនដោយផ្ទាល់ ហើយ នឹងត្រៀមវាយតម្លៃជាថ្មីលើស្ថានភាពរបស់ជនភៀសខ្លួនដើម្បីស្វែងរកជំនួយបន្ថែមដល់ពួកគេ ក៏ដូចជាដើម្បីធានាពីដំណើរការប្រសើរសម្រាប់ការវិលត្រឡប់ទៅកាន់ប្រភពដើមរបស់ពួកគេផងដែរ។ នេះបើយោងតាមប្រភពព័ត៌មានដដែល។
នៅថ្ងៃ២៨ មិថុនា ប្រធានធនាគារពិភពលោក លោក Jim Yong Kim ដែលនឹងអមដំណើរទស្សនកិច្ចលោកអគ្គលេខាធិការអង្គការសហប្រជាជាតិផងដែរនោះ បានប្រកាសផ្តល់ជំនួយជិត ៥០០លានដុល្លារអាមេរិកដល់បង់ក្លាដែសដើម្បីគាំពារដល់ការរស់នៅរបស់ជនភៀសខ្លួនរ៉ូហ៊ីងយ៉ាផងដែរ។
កន្លងមកប្រតិភូជាន់ខ្ពស់ប្រទេសតំបន់អឺរ៉ុប ក៏បានបំពេញទស្សនកិច្ចទៅកាន់តំបន់ជនភៀសខ្លួនស្នាក់នៅផងដែរ។ ក្រោយដំណើរទស្សនកិច្ច ពួកគេសុទ្ធតែទទួលស្គាល់ថា ជនភៀសខួនពិតជាកំពុងតែរស់នៅក្នុងស្ថានភាពលំបាកបំផុតមែន។ ជាងនេះទៅទៀតនោះ ពួកគេ ថែមទាំងលើកជាសំណួរទៅកាន់រដ្ឋាភិបាលមីយ៉ាន់ម៉ាថា មានធា្លប់ឃើញស្ថានភាពជនភៀសខ្លួនឬយ៉ាងណាបានជានៅតែមិនទាន់មានដំណោះស្រាយសម្រាប់ពួកគេយ៉ាងដូច្នេះ?
សូមរម្លឹកផងដែរ ដោយសារតែបញ្ហាអសន្តិសុខនៅក្នុងរដ្ឋរ៉ាខាននៃប្រទេសមីយ៉ាន់ម៉ា បានបង្កើតជាចលនាភៀសខ្លួនរបស់ជនជាតិរ៉ូហ៊ីងយ៉ាមកកាន់បង់ក្លាដែសជាងកន្លះលាននាក់។ ថ្មីៗនេះ រដ្ឋាភិបាល មីយ៉ាន់ម៉ា ក៏បានចុះហត្ថលេខាលើអនុស្សារណៈយោគយល់ស្តីពីការរៀបចំបញ្ជូនជនភៀសខ្លួនទៅកាន់មីយ៉ាន់ម៉ាវិញផងដែរ។ ភាគីទាំងពីរ កំពុងតែបន្តចរចាពីយន្តការបន្ថែម ដ្បិតរឿងរ៉ូហ៊ីងយ៉ានេះ ជាបញ្ហាដ៏រសើបបំផុតសម្រាប់រដ្ឋាភិបាលមីយ៉ាន់ម៉ា ជាមួយប្រជាជនខ្លួន ជាពិសេសក្រុមយោធាតែម្តង៕
Tag:
រ៉ូហ៊ីងយ៉ា
UN
បង់ក្លាដែស
© រក្សាសិទ្ធិដោយ thmeythmey.com