ក្រុមហ៊ុនផលិតដែកវៀតណាម គ្រោងវិនិយោគនៅខេត្តព្រះសីហនុ ដោយប្រើទុន៥០០លានដុល្លារ

ជាតិ

សេដ្ឋកិច្ច

ក្រុមហ៊ុនផលិតដែកវៀតណាម គ្រោងវិនិយោគនៅខេត្តព្រះសីហនុ ដោយប្រើទុន៥០០លានដុល្លារ

03, Jul 2018 , 10:19 pm

រូបភាព

ដោយ: ថ្មីៗ

ក្រុមហ៊ុន Hoa Phat ផលិតដែករបស់ប្រទេសវៀតណាម គ្រោងវិនិយោគផលិតដែកថែបនៅខេត្តព្រះសីហនុ ក្នុងទំហំទឹកប្រាក់៥០០លានដុល្លារអាមេរិក ។ នេះបើយោងតាមទីភ្នាក់ងារសារព័ត៌កម្ពុជា (AKP) ដែលចុះផ្សាយនៅថ្ងៃទី៣ ខែកក្កដា។

AKP បានស្រង់សម្តីលោក Chu Quang Vu អ្នកគ្រប់គ្រងផ្នែកការអភិវឌ្ឍនិងការស្រាវជ្រាវនៃក្រុមហ៊ុន Hoa Phat ទៅចុះផ្សាយថា បច្ចុប្បន្នក្រុមហ៊ុនរបស់លោកកំពុងដំណើរការផលិតដែកធំជាងគេនៅក្នុងប្រទេសវៀតណាម។ ក្រុមហ៊ុនរបស់លោក ចង់បង្កើតរោងចក្រផលិតដែកនៅក្រៅប្រទេស ដោយជ្រើសរើសយកកម្ពុជា ពិសេសខេត្តព្រះសីហនុ ធ្វើជាទីតាំងផលិត ដែលគ្រោងចំណាយទុនវិនិយោគប្រមាណ ៥០០លានដុល្លារ។ ជាមួយគ្នានេះក្រុមហ៊ុននឹងអាចផលិតដែកបានពី១លាន ទៅ២លានតោនក្នុងមួយឆ្នាំ។

ទន្ទឹមគ្នានេះ ក្រុមហ៊ុន Hoa Phat ត្រូវការទឹកបម្រើឲ្យចង្វាក់ផលិតកម្មរោងចក្រប្រមាណ ២ម៉ឺន ទៅ២,៥ម៉ឺនម៉ែត្រគូបក្នុងមួយថ្ងៃ និងកម្លាំងពលកម្មប្រមាណ ៣ពាន់នាក់។

លោក យន្ត មីន អភិបាលខេត្តព្រះសីហនុ បានស្វាគមន៍ក្រុមហ៊ុន Hoa Phat ដែលចាប់អារម្មណ៍បណ្តាក់ទុនវិនិយោគផលិតដែកនៅខេត្តរបស់ខ្លួន។ លោកបានចង្អុលបង្ហាញទីតាំងដីប្រមាណ២០០ហិកតា នៅតំបន់ស្រុកស្ទឹងហាវ ខេត្តព្រះសីហនុ ព្រោះអនាគតទីនោះក៏មានកំពង់ផែទឹកជ្រៅ ដែលអាចឲ្យក្រុមហ៊ុនសាងសង់រោងចក្រផលិតដែកបានដោយងាយស្រួល៕