កម្ពុជា កំពុងរៀបឯកសារស្នើបញ្ចូលប្រាសាទ«កោះកេរ»និង«បន្ទាយឆ្មារ»ក្នុងបញ្ជីបេតិកភណ្ឌ

ជាតិ

កម្ពុជា កំពុងរៀបឯកសារស្នើបញ្ចូលប្រាសាទ«កោះកេរ»និង«បន្ទាយឆ្មារ»ក្នុងបញ្ជីបេតិកភណ្ឌ

08, Jul 2018 , 2:15 pm

រូបភាព

រូបភាពពីហ្វេសប៊ុកលោក ចិន្ត ច័ន្ទរតនា

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ កម្ពុជា កំពុងរៀបចំឯកសារពាក់ព័ន្ធនឹងប្រាសាទកោះកេរ និងប្រាសាទបន្ទាយឆ្មារ ដើម្បីស្នើបញ្ចូលប្រាសាទបុរាណទាំង២នេះ ជាសម្បត្តិបេតិកភណ្ឌពិភពលោកនាពេលខាងមុខ។ លោក ហេង សុផាឌី អគ្គនាយករងបេតិកភណ្ឌ ប្រាប់សារព័ត៌មានថ្មីៗតាមទូរសព្ទដូច្នេះ។

លោក ហេង សុផាឌី បញ្ជាក់ដូច្នេះ៖«ប្រាសាទទាំងពីរនេះមានតម្លៃលេចធ្លោ ដែលសក្តសមនឹងចុះបញ្ជីជាបន្តទៀត។ ការចុះបញ្ជី គឺយើងចុះម្ដងមួយ។ ដំបូង គឺប្រាសាទកោះកេរ្តិ៍ នៅខេត្តព្រះវិហារ បន្ទាប់ទៀតទើបយើងរៀបចំចុះប្រាសាទបន្ទាយឆ្មារ ខេត្តបន្ទាយមានជ័យ»។

តែយ៉ាងណាក៏ដោយ អគ្គនាយករងបេតិកភណ្ឌ មិនទាន់អាចបញ្ជាក់ច្បាស់ទេថា តើពេលវេលាណា ទើបអាចដាក់ស្នើជាផ្លូវការនោះ ព្រោះក្រុមការងារបេតិកភណ្ឌ ទើបចាប់ផ្តើមរៀបចំឯកសារនៅប៉ុន្មានខែមុនប៉ុណ្ណោះ។ តាម លោក ហេង សុផាឌី ដំណើរការចុះបញ្ជីក្នុងសម្បត្តិបេតិកភណ្ឌនីមួយៗមានការលំបាកជាច្រើន ហើយត្រូវការពេលវេលាស្រាវជ្រាវយូរ ត្រូវការទាំងធនធានមនុស្ស និងថវិកាផងដែរ។ មិនត្រឹមតែប៉ុណ្ណោះ ការចុះបញ្ជីនេះ ក៏តម្រូវឲ្យកម្ពុជា រៀបចំលក្ខខណ្ឌចំនួន៦ចំណុច ដែលទាក់ទងនឹងផែនការគ្រប់គ្រង និងការថែរក្សាតំបន់ប្រាសាទទាំង២ផងដែរ។

ក្រៅតែពីប្រាសាទបុរាណទាំង២ កម្ពុជា ក៏គ្រោងចុះបញ្ជីក្រុមប្រាសាទអង្គរបុរី នៅខេត្តតាកែវ និងប្រាសាទព្រះខ័ន្ត នៅខេត្តព្រះវិហារ ចូលទៅក្នុងបញ្ជីបេតិកភណ្ឌពិភពលោកបន្ថែមទៀតដែរ ដែលការងារនេះ នឹងត្រូវធ្វើឡើងជាបន្តបន្ទាប់គ្នា។ នេះបើតាម លោក ហេង សុផាឌី។

សូមបញ្ជាក់ថា ប្រាសាទអង្គរវត្ត ត្រូវបានដាក់បញ្ចូលជាសម្បត្តិបេតិកភណ្ឌពិភពលោកក្នុងឆ្នាំ ១៩៩២, ប្រាសាទព្រះវិហារក្នុងឆ្នាំ២០០៨ និងតំបន់ប្រាសាទសំបូរព្រៃគុកក្នុងឆ្នាំ២០១៧៕