ការប្រើសេវាថែទាំសុខភាពរបស់រដ្ឋ មានជិត៦លានករណីនៅ៦ខែដំបូងឆ្នាំនេះ

ជាតិ

សុខភាព

ការប្រើសេវាថែទាំសុខភាពរបស់រដ្ឋ មានជិត៦លានករណីនៅ៦ខែដំបូងឆ្នាំនេះ

14, Jul 2018 , 10:59 pm

រូបភាព

សេវាថែទាំសុខភាពរបស់រដ្ឋ។ រូបថត AFP

ដោយ:

ភ្នំពេញ៖ គិតចាប់ពីខែមករា ដល់ត្រឹមថ្ងៃទី៦ ខែកក្កដា ការប្រើប្រាស់សេវាថែទាំសុខភាពរបស់ប្រជាពលរដ្ឋ នៅមណ្ឌលសុខភាព និងមន្ទីរពេទ្យរដ្ឋទូទាំងប្រទេស មានចំនួនសរុប ៥,៦១៥,៤៩៧ករណី ដោយភាគច្រើនលើសលុបជាករណីថ្មី។ នេះបើតាមស្ថិតិនៃការប្រើប្រាស់សេវាថែទាំសុខភាពរបស់ប្រជាពលរដ្ឋ នៃក្រសួងសុខាភិបាល។

ក្នុងចំណោមការប្រើប្រាស់សេវាសុខភាពរដ្ឋជិត៦លានករណីនោះ មានជាង៩៤ម៉ឺនករណី ដែលពលរដ្ឋក្រីក្រ ប្រើប្រាស់សេវាពិនិត្យពិគ្រោះជំងឺក្រៅដែលគាំទ្រដោយកម្មវិធីមូលនិធិសមធម៌ នៃរដ្ឋាភិបាលកម្ពុជា។ រយៈពេល៦ខែកន្លងមកនេះ អ្នកជំងឺសម្រាកព្យាបាលសរុបចំនួន ៤១ម៉ឺននាក់ ក្នុងចំនួននេះ អត្រាអ្នកស្លាប់មាន ០,៧៤ភាគរយ។ ស្ថិតិរបស់ក្រសួងសុខាភិបាល បង្ហាញថា អ្នកជំងឺសម្រាកព្យាបាលសរុបចំនួនខាងលើ មានចំនួនជិត៥ម៉ឺននាក់ ជាប្រជាលរដ្ឋក្រីក្រដែលគាំទ្រដោយកម្មវិធីមូលនិធិសមធម៌នៃរាជរដ្ឋាភិបាល។

ដោយឡែក ស្ត្រីទៅពិនិត្យផ្ទៃពោះ មានចំនួនជាង៨៤ម៉ឺននាក់។ ក្រៅពីស្ត្រីពិនិត្យផ្ទៃពោះ នៅមានស្ត្រីសម្រាលកូនសរុបជាង១៣ម៉ឺននាក់ ដោយក្នុងចំនួនដដែលនេះ មណ្ឌលសុខភាពសម្រាលបានជិត៧ម៉ឺននាក់។ អ្វីដែលគួរឲ្យកត់សម្គាល់នោះ ស្ត្រីដែលសម្រាលកូនចំនួនសរុបខាងលើ មានចំនួន ៩,៧៥៧នាក់ ជាស្ត្រីក្រីក្រដែលគាំទ្រដោយកម្មវិធីមូលនិធិសមធម៌នៃរាជរដ្ឋាភិបាលកម្ពុជា។

ស្ថិតិនៃក្រសួងដដែលបានបន្ថែមទៀតថា អ្នកជំងឺសម្រាកចេញពីផ្នែកសង្គ្រោះបន្ទាន់ មានចំនួនសរុប ១៩,៣៩៨នាក់៕