ជាតិ
កម្ពុជាប្រារព្ធខួបនៃការបញ្ចូលប្រាសាទព្រះវិហារ និងសំបូរព្រៃគុកជាសម្បត្តិបេតិកភណ្ឌពិភពលោក ព្រះសង្ឃនៅតាមទីវត្តអារាមទូងស្គរ ដើម្បីរំលឹកដល់ខួបនៃការដាក់បញ្ចូលទីប្រាសាទព្រះវិហារ និងសំបូរព្រៃគុកក្នុងបញ្ជីបេតិកភណ្ឌ
× ភ្នំពេញ៖ ថ្ងៃទី១៥ ខែកក្កដា ឆ្នាំ២០១៨ នេះ កម្ពុជាប្រារព្ធខួប១០ឆ្នាំ ដែលប្រាសាទព្រះវិហារបានដាក់ចូលក្នុងបញ្ជីបេតិកភណ្ឌពិភពលោក និងប្រារព្ធខួប១ឆ្នាំ សម្រាប់ប្រាសាទសំបូរព្រៃគុក នៃការដាក់ចូលជាសម្បត្តិពិភពលោក។ ការអបអរសាទររួមគ្នានៃការដាក់ចូលប្រាសាទព្រះ វិហារ និងក្រុមប្រាសាទសំបូរព្រៃគុកនេះ គឺមានការប្រារព្ធឡើងដោយទូងស្គរនៅតាមវត្តអារាម សាលារៀន ទូទាំងប្រទេសកម្ពុជា។
លោក សុខ លូ អភិបាលខេត្ត និងជាប្រធានគណៈបញ្ជាការឯកភាពខេត្តកំពង់ធំ បានថ្លែងនៅកម្មវិធីរម្លឹកខួប១ឆ្នាំសម្រាប់ប្រាសាទសំបូរព្រៃគុក ព្រឹកនេះថា ការប្រារព្ធខួប១ឆ្នាំ នៃប្រាសាទសំបូរព្រៃគុក គឺដើម្បីផ្សព្វផ្សាយឲ្យកូនខ្មែរ មានស្មារតីថែរក្សា និងការពារសម្បត្តិវប្បធម៌ជាតិ ដែលជាកេរ្តិ៍សម្រាប់មនុស្សជំនាន់ក្រោយ។ អភិបាលខេត្តកំពង់ធំ បានឲ្យដឹងថា៖«ប្រាសាទសំបូរព្រៃគុកនេះ ជាសម្បត្តិពិភពលោកទី៦ ហើយដែលបានទទួលស្គាល់ជាសម្បត្តិបេតិកភណ្ឌពិភពលោក បន្ទាប់ពីប្រាសាទព្រះវិហារ ប្រាសាទអង្គរវត្ត ល្ខោនស្រមាលស្បែកធំ របាំព្រះរាជទ្រព្យ និងចាប៉ីដងវែង បានចុះបញ្ជីដោយអង្គការយូនីស្កូ។
ការប្រារព្ធពិធីអបអរសាទរនៃប្រាសាទទាំងពីរ ដែលជាសម្បត្តិពិភពលោកនេះ ធ្វើនៅទីតាំងនៃប្រាសាទព្រះវិហារ និងប្រាសាទសំបូរព្រៃគុក ដោយមានការទូងស្គរ និងបង្ហោះប៉េងប៉ោងជាច្រើនផងដែរ។ ហើយល្ងាចថ្ងៃនេះ សម្តេច ហ៊ុន សែន នាយករដ្ឋមន្ត្រី នឹងអញ្ញើញចូលរួមបើកការប្រារព្ធ ដើម្បីអបអរសាទរ នៃប្រាសាទទាំងពីរនេះ បានចូលជាសម្បត្តិបេតិកភព្ឌពិភពលោក នៅពហុដ្ឋានកីឡដ្ឋានជាតិអូឡាំពិក។
សូមបញ្ជាក់ថា ប្រាសាទព្រះវិហារត្រូវបានដាក់បញ្ចូលជាសម្បត្តិបេតិកភណ្ឌពិភពលោកផ្លូវការ កាលពី៧ ខែកក្កដា ឆ្នាំ២០០៨ រីឯក្រុមប្រាសាទសំបូរព្រៃគុក ត្រូវបានដាក់បញ្ចូលកាលពីថ្ងៃទី៨ ខែកក្កដា ឆ្នាំ២០១៧ ៕
Tag:
ប្រាសាទព្រះវិហារ
ប្រាសាទសំបូរព្រៃគុក
© រក្សាសិទ្ធិដោយ thmeythmey.com