ភ្នំពេញ៖ គំនិតចង់ឲ្យប្រទេសរីកច្រើន វាត្រឹមជាក្ដីស្រមៃមួយប៉ុណ្ណោះ ប្រសិនបើប្រជាជនក្នុងប្រទេសគ្មានធនធានមនុស្សពិតប្រាកដ។ គ្មានឡើយប្រទេសរីកចម្រើន ឬមហាអំណាចធំៗ ដែលគ្មានធនធានមនុស្សចូលរួមអភិវឌ្ឍន៍នោះឡើយ។ ប្រទេសអ្នកមានជាច្រើន ព្យាយាមទាក់ទាញអ្នកមានចំណេះដឹងពិតប្រាកដ ពីបណ្ដាប្រទេសផ្សេងៗ ទៅបម្រើប្រយោជន៍ដល់ប្រទេសពួកគេ។ កម្ពុជាដូចគ្នា បើចង់អភិវឌ្ឍប្រទេសឲ្យកាន់តែខ្លាំងឡើង មនុស្សគ្រប់រូបត្រូវតែមានចំណេះដឹង ឬធនធានមនុស្សពេញដោយសមត្ថភាព។ ដើម្បីក្លាយខ្លួនជាគ្រាប់ពេជ្រសម្រាប់ប្រទេស តើអ្នកគួរធ្វើយ៉ាងណា?
ខណៈកម្ពុជា ជាប្រទេសកំពុងអភិវឌ្ឍន៍ តម្រូវការធនធានមនុស្ស គឺជារឿងសំខាន់។ ធនធានមនុស្សល្អ ដែលមានគុណភាពចំណេះដឹង និងសមត្ថភាពខ្ពស់ ដើម្បីចូលរួមអភិវឌ្ឍន៍ប្រទេស។ វាជាចំណុចសំខាន់មួយ ដែលមេដឹកនាំប្រទេស កំពុងយកចិត្តទុកដាក់ ហើយយុវជនខ្លួនឯង ត្រូវពង្រឹងសមត្ថភាព តាមរយៈចំណេះដឹងផងដែរ។
លោក ព្រឿង ប្រណិត ប្រធានសមាគមអ្នកនិពន្ធខ្មែរលើកឡើងថា ដើម្បីឲ្យប្រទេសមួយរីកចម្រើន មនុស្សក្នុងប្រទេសនោះត្រូវតែអានសៀវភៅឲ្យបានច្រើន។ លោកថាសៀវភៅពិតជាឃ្លាំងចំណេះ សម្រាប់ធ្វើជាដើមទុន ឲ្យមានការគិតពិចារណា និងវិភាគបានគ្រប់ជ្រុងជ្រោយ ព្រោះសៀវភៅប្រមូលផ្ដុំដោយបទពិសោធន៍ និងវិធីសាស្ត្រល្អៗពីគ្រប់មជ្ឈដ្ឋាន។ លោក ព្រឿង ប្រណិត បញ្ជាក់៖ «សៀវភៅជួយច្រើនមែនទែន មានទាំងចំណេះដឹង ព័ត៌មាន និងការសម្សាន្ត ដូច្នេះបើមនុស្សព្យាយាមអានសៀវភៅឲ្យទៅជាទម្លាប់ នោះការពិចារណារបស់ពួកគេកាន់តែជ្រៅ»។
ស្រដៀងគ្នាដែរ លោក ឡឹក ជំនោរ នាយកគ្រឹះស្ថានឯកសារខ្មែរ លើកឡើងថា ដើម្បីឲ្យធនធានមនុស្សមានគុណភាព គឺប្រទេសនោះ ត្រូវផ្ដល់ការអប់រំដល់មនុស្សឲ្យបានត្រឹមត្រូវតាំងពីក្មេង។ ការបញ្ចូលអត្តសញ្ញាណជាតិ ដួងព្រលឹងជាតិ និងការអប់រំគ្រប់ជ្រុងជ្រោយប្រកបដោយប្រសិទ្ធភាព ធ្វើឲ្យមនុស្សយល់ពីតម្លៃជាតិ និងមានគំនិតអភិវឌ្ឍប្រទេស សុទ្ធតែជាចំណុចសំខាន់ ដែលមិនអាចខ្វះបាន។ លោក ជំនោរ បានបញ្ជាក់ថា៖ «ការអប់រំជាប្រព័ន្ធ ទាំងក្នុងគ្រួសារ វិស័យអប់រំថ្នាក់ជាតិ ប្រព័ន្ធផ្សព្វផ្សាយគ្រប់រូបភាព ត្រូវសហការណ៍គ្នាតម្រង់ទិសដល់មនុស្សតាំងពីក្មេង។ ប្រព័ន្ធផ្សព្វផ្សាយជ្រាបលឿនទៅមនុស្ស ភាពយន្ត ចម្រៀង ការផ្សាយពាណិជ្ជកម្ម បណ្ដាញសង្គមផ្សេងៗ ត្រូវបញ្ចូលសារអប់រំខ្លីៗទៅក្នុងនោះ វានឹងបណ្ដុះមនុស្សឲ្យក្លាយជាធនធានមនុស្សប្រកបដោយសក្ដានុពល។
ធនធានមនុស្សជាយុវជនក្រោមអាយុ៣០ឆ្នាំ ត្រូវបានគេប៉ាន់ស្មានថា មានចំនួន៦៥ភាគរយ នៃចំនួនប្រជាជនសរុប១៥លាននាក់។ ចំនួនធនធានយុវជននេះ ត្រូវបានគេរំពឹងថា នឹងជួយអភិវឌ្ឍប្រទេសកម្ពុជាឲ្យកាន់តែរីកចម្រើន ខណៈដែលកម្ពុជា ស្ថិតនៅក្នុងប្រទេសកំពុងអភិវឌ្ឍន៍។ ដើម្បីឲ្យគោលដៅកម្ពុជា ដែលចង់វិវឌ្ឍខ្លួន ក្លាយជាប្រទេសមានកំណើនសេដ្ឋកិច្ចខ្ពស់នោះ ក្រសួងអប់រំ យុវជន និងកីឡា ក៏កំពុងរឹតបន្តឹងគុណភាពអប់រំ ធ្វើយ៉ាងណាឲ្យយុវជនមានចំណេះពិតប្រាកដ ឲ្យក្លាយធនធានមនុស្ស មានគុណភាពល្អ និងសមត្ថភាពខ្ពស់ ក្នុងការចូលរួមអភិវឌ្ឍប្រទេស តាមរយៈចំណេះជំនាញរបស់ពួកគេ។
រដ្ឋមន្ត្រីក្រសួងអប់រំ លោក ហង់ ជួន ណារ៉ុន បានបញ្ជាក់ថា ការអប់រំកំណត់អនាគតរបស់ប្រទេស ពោលបានន័យថា បើប្រទេសមួយ មានធនធានមនុស្សខ្លាំង ប្រទេសនោះ គឺនឹងមានការអភិវឌ្ឍខ្លាំង ប៉ុន្តែបើការអប់រំខ្សោយ ប្រទេសនោះ ប្រាកដជាខ្សោយ។ បើតាមលោក ហង់ ជួន ណារ៉ុន ប្រទេសអាចរីកចម្រើនបានអាស្រ័យធនធានមនុស្សមានគុណភាពនិងពូកែ។
ថ្លែងក្នុងពិធីបំពាក់គ្រឿងឥស្សរិយយសមេដាយការងារដល់បុគ្គលិកអប់រំ និងផ្ដល់ទង់ជ័យលាភី ប័ណ្ណសរសើរដល់អង្គភាពមានស្នាដៃការងារល្អ នៅខេត្តកំពង់ចាម រដ្ឋមន្ត្រីក្រសួងអប់រំ បញ្ជាក់យ៉ាងដូច្នេះថា៖«ទោះបីប្រទេសមួយមានធនធានធម្មជាតិច្រើនយ៉ាងណាក្ដី តែបើមិនមានធនធានមនុស្សទេ ប្រទេសនោះក៏មិនមានការអភិវឌ្ឍដែរ។ ការបង្កើតធនធានមនុស្សដែលមានគុណភាពនិងពូកែ ដើម្បីអាចចូលរួមអភិវឌ្ឍន៍ជាតិបាន ទើបប្រទេសរីកចម្រើន»។
បើទោះជាមិនបានចូលសាលា មិនចេះអានអក្សរ ឬស្ថិតក្នុងកាលៈទេសៈណាក៏ដោយ ពលរដ្ឋនៅតែអាចទទួលបានចំណេះល្អៗជាប្រយោជន៍ ដើម្បីអភិវឌ្ឍន៍ខ្លួនបានដែរ។ ទូរទស្សន៍ វិទ្យុ កាសែត ទស្សនាវត្តី ហ្វេសប៊ុក ឯកសារសំខាន់ផ្សេងៗ សុទ្ធតែជាប្រភពព័ត៌មាន ដែលអាចនាំឲ្យពលរដ្ឋក្លាយជាធនធានមនុស្សដ៏មានគុណភាពបាន។ ពលរដ្ឋគួរព្យាយាមស្វែងរកព័ត៌មានណាដែលផ្ដល់ចំណេះដឹងភាគច្រើន ចៀសជាងទទួលយកអ្វីដែលគ្មានការរីកចម្រើន។ ចំណេះដឹងមាននៅគ្រប់ទីកន្លែង គ្រប់ពេលវេលាឲ្យតែពលរដ្ឋចេះចម្រាញ់វា យកមកប្រើប្រាស់ឲ្យមានប្រយោជន៍៕