ក្រោយរក្សាទុកអស់៦៦ឆ្នាំ លោក Shridhar សម្រេចកាត់ក្រចករបស់ខ្លួនចេញ

អន្តរជាតិ

ក្រោយរក្សាទុកអស់៦៦ឆ្នាំ លោក Shridhar សម្រេចកាត់ក្រចករបស់ខ្លួនចេញ

15, Jul 2018 , 8:29 pm

រូបភាព

ដោយ: ធីតា

លោក Shridhar Chillal អាយុ៨២ឆ្នាំ ដែលរស់នៅក្រុង Pune ប្រទេសឥណ្ឌា បានសម្រេចកាត់ក្រចកដ៏វែងរបស់ខ្លួនចេញ បន្ទាប់ពីលោករក្សាទុកអស់រយៈពេល៦៦ឆ្នាំ។ ក្រចកដ៏វែងរបស់លោកនោះ ត្រូវចុះក្នុងសៀវភៅកំណត់ត្រា Guinness World Records ហើយការសម្រេចចិត្តកាត់វាចេញ ត្រូវបានធ្វើឡើងក្នុងកម្មវិធី Ripley’s Believe It or Not! នៅក្រុងញូវយ៉ក សហរដ្ឋអាមេរិក កាលពីពេលថ្មីៗកន្លងមកនេះ។

ចាប់តាំងពីឆ្នាំ១៩៥២ ពោលគឺក្នុងវ័យ១៤ឆ្នាំ លោក Shridhar Chillal បានសម្រេចចិត្តទុកក្រចកដៃឆ្វេងរបស់ខ្លួន ទៅតាមការណែនាំរបស់គ្រូបង្រៀនម្នាក់។ ប្រវែងចុងក្រោយមុនការកាត់ចេញគឺ៩០៩.៦សង់ទីម៉ែត្រ។

លោក Shridhar មានឈ្មោះដំបូងក្នុងសៀវភៅ Guinness World Records នៅឆ្នាំ១៩៧៩ ដោយពេលនោះ ក្រចករបស់លោកឡើងដល់ប្រវែង ២១៩.៧សង់ទីម៉ែត្រ។ នៅឆ្នាំ២០១៦ លោកទទួលកំណត់ត្រាជាថ្មីម្តងទៀតសម្រាប់អ្នកដែលទុកក្រចកវែងបំផុតនៅដៃតែម្ខាង (Longest Fingernails on a Single Hand Ever)។

នៅពេលសួរថា តើក្រចកទាំងនោះ ផ្តល់ផលលំបាកដល់គាត់ដែរឬទេ? លោក Shridhar ទទួលស្គាល់ថា ពិតជាលំបាក ជាពិសេសពេលគេងដែលលោកត្រូវប្រយ័ត្នគ្រប់ពេល។ «ខ្ញុំមិនអាចផ្លាស់ទីបានតាមចិត្តនោះឡើយ ពេលចង់ក្រោក ខ្ញុំត្រូវប្រយ័ត្នប្រយែងជានិច្ច»។

ទោះបីជាយ៉ាងណាក៏ដោយ លោក Shridhar នៅតែអាចចិញ្ចឹមជីវិតដោយប្រកបអាជីពជាអ្នកថតរូបជាមួយនឹងដៃស្តាំរបស់ខ្លួន។ លោកបានបញ្ជាក់ថា ដៃខាងស្តាំរបស់លោកដំណើរការធម្មតា ខណៈដែលខាងឆ្វេងពិការទាំងស្រុងដោយលោកមិនអាចកម្រើកបានតាមចិត្តនោះឡើយ។