អន្តរជាតិ
លោក ត្រាំ មើលមិនឃើញដៃគូសក្តិសមដើម្បីប្រជែងកៅអីប្រធានាធិបតីនៅឆ្នាំ២០២០
×![]()
ដោយ: តន ចាន់រិទ្ធារ៉ា
ទើបកាន់តំណែងប្រធានាធិបតីអាមេរិកមិនទាន់បានពីរឆ្នាំស្រួលបួលផងនោះ លោក ដូណាល់ ត្រាំ បានប្រកាសផែនការឈរឈ្មោះសម្រាប់ការអាណត្តិទីពីរក្នុងការបោះឆ្នោតប្រធានាធិបតីដែលត្រូវធ្វើនៅឆ្នាំ២០២០ ។ ក្នុងកិច្ចសម្ភាសមួយនៅលើយន្តហោះ Air Force One នៅថ្ងៃទី១៥ ខែកក្កដា លោក ត្រាំ អះអាងថា គ្មានបេក្ខជនផ្សេងណាអាចផ្ដួលរូបលោកបានឡើយសូម្បីតែបេក្ខជនបក្សប្រជាធិបតេយ្យក៏ដោយចុះ។
ជាប់ឆ្នោតជាប្រធានាធិបតីអាមេរិកក្នុងការបោះឆ្នោតខែវិច្ឆិកា ឆ្នាំ២០១៦ លោក ដូណាល់ ត្រាំ ដែលរងការរិះគន់ឥតឈប់ឈរជុំវិញគោលនយោបាយចម្រូងចម្រាសជាច្រើននោះ បានសម្លឹងដល់ការឈ្មោះនៅអាណត្តិទីពីរទៅហើយ។ ដោយមិនខ្ចីខ្វល់ពាក្យទិតៀនទាំងក្នុងស្រុក និងក្រៅស្រុក លោក ត្រាំ ហាក់មានទំនុកចិត្តខ្ពស់ដើម្បីបន្តដឹកនាំអាមេរិកបួនឆ្នាំទៀត ព្រោះគ្មានអ្នកណាអាចមានសមត្ថភាពប្រជែងនឹងលោកឡើយ។
ក្នុងបទសម្ភាសមួយលើយន្តហោះពិសេស Air Force One ដែលផ្សាយលើសារព័ត៌មានអង់គ្លេស Daily Mail នៅថ្ងៃទី១៥ ខែកក្កដា លោកពិធីករ Piers Morgan បានសួរលោក ត្រាំ ពីបំណងឈរឈ្មោះក្នុងការបោះឆ្នោតឆ្នាំ២០២០ ។ ដំបូង លោក ត្រាំ ដែលមានវ័យ៧២ឆ្នាំទៅហើយនោះ ហាក់ស្ទាក់ស្ទើរក្នុងការផ្ដល់ចម្លើយជាក់លាក់ និងបានឆ្លើយបង្វែរថា គ្មានរណាដឹងពីអ្វីត្រូវកើតឡើងចំពោះសុខភាព និងបញ្ហាផ្សេងទៀតឡើយ។
ដោយមិនទាន់ទទួលចម្លើយពេញចិត្តនោះ ពិធីករដដែលក៏បានឈ្លេចសួរលោក ត្រាំ ម្ដងទៀត បន្ទាប់ឃើញបញ្ជីមុខម្ហូបបែបបំប៉នសុខភាពរបស់លោក ត្រាំ ។ «ប៉ុន្តែក្នុងឆ្នាំ២០២០ លោកនឹងឈរឈ្មោះទៀត?» នេះជាសំណួររបស់លោក Morgan ហើយប្រធានាធិបតីអាមេរិកទី៤៥ ក៏ឆ្លើយថា៖ «ខ្ញុំមានបំណងពេញទំហឹង។ វាដូចជាអ្នករាល់គ្នាចង់ឲ្យខ្ញុំឈរឈ្មោះទៀត។» យ៉ាងណាមិញ លោក ត្រាំ មិនបញ្ជាក់ថា អ្នករាល់គ្នានោះ ជាអ្នកណាឡើយ តែអាចជាអ្នកគាំទ្ររូបលោក។
ជុំវិញបញ្ហានេះ ប្រធានាធិបតីមានប្រវត្តិជាមហាសេដ្ឋីរូបនេះបានលើកឡើងពីមូលហេតុដែលផ្ដល់ទំនុកចិត្តឲ្យលោក។ បច្ចុប្បន្ននេះ លោក ត្រាំ មើលមិនឃើញបេក្ខជនបក្សប្រជាធិបតេយ្យណាដែលអាចឡើងសង្វៀនជាមួយរូបលោកបានឡើយ ដោយលោកបានអះអាងថា លោកស្គាល់សមាជិកបក្សប្រជាធិបតេយ្យ (សំដៅបេក្ខភាពប្រធានាធិបតី) ទាំងអស់ ប៉ុន្តែបក្សនេះមិនមានបេក្ខជនសក្តិសមណាមួយម្នាក់នោះឡើយ។
ក្រៅពីការមើលឃើញថា គ្មានគូប្រកួតនោះ លោក ត្រាំ ក៏ទទួលបានការគាំទ្រច្រើនពីផ្ទៃក្នុងបក្សសាធារណរដ្ឋដែរ។ កាលពីកិច្ចសម្ភាសមួយទៀត លោកបានបញ្ជាក់ថា លោកជាបុគ្គលមានប្រជាប្រិយភាពបំផុតក្នុងបក្សសាធារណរដ្ឋ ហើយខ្លាំងជាងលោក Abraham Lincoln ទៅទៀត។ ប៉ុន្តែរឿងមួយដែលលោក ត្រាំ មិនត្រូវភ្លេច គឺការស៊ើបអង្កេតលើសំណុំរឿងរុស្ស៊ីលូកលាន់ការបោះឆ្នោតឆ្នាំ២០១៦ កំពុងធ្វើឡើង ហើយលទ្ធផលអាចឈានដល់ការទម្លាក់លោកចេញពីតំណែងមុនចប់អាណត្តិផង៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com
