អត្ថបទពាណិជ្ជកម្ម
សាណូហ្វីកម្ពុជា រៀបចំសិក្ខាសាលាស្តីពី «សារប្រយោជន៍នៃកាល់ស្យូមសម្រាប់ស្ត្រីមានផ្ទៃពោះ និងកុមារ» មានអ្នកចូលរួមជាង៣៥០គ្រួសារ
×![]()
ក្រុមហ៊ុនសាណូហ្វីកម្ពុជា សហការជាមួយសមាគមឆ្មបកម្ពុជា បានរៀបចំសិក្ខាសាលាជាលើកទី២ ស្តីពី «សារប្រយោជន៍នៃកាល់ស្យូមសម្រាប់ស្ត្រីមានផ្ទៃពោះ និងកុមារ» ទៅកាន់អ្នកចូលរួមប្រមាណជាង៣៥០គ្រួសារ។ ក្នុងនោះមានស្ត្រីមានផ្ទៃពោះចំនួន ៦៥នាក់ អ្នកម្តាយជិត២៧០នាក់ និងកុមារជាង៤០០នាក់។ សិក្ខាសាលាជាលើកទី២ បានប្រព្រឹត្តទៅនៅសណ្ឋាគារខេមរាបាត់ដំបង១ ខេត្តបាត់ដំបងកាលពីថ្ងៃទី១៥ កក្កដា ២០១៨ ខណៈលើកទី១ ធ្វើនៅ Kids City ក្នុងរាជធានីភ្នំពេញ កាលពីដើមខែកក្កដា។
អ្នកស្រី Monsinee Sathirakawinskul ប្រធានប្រតិបត្តិផ្នែក CHC ប្រចាំក្រុមហ៊ុនសាណូហ្វីកម្ពុជា បានគូសបញ្ជាក់ថា សិក្ខាសាលានេះ មានគោលបំណងផ្តល់ការអប់រំដល់ស្ត្រីជាម្តាយ ស្ត្រីមានផ្ទៃពោះ ស្ត្រីស្ថិតក្នុងវ័យបន្តពូជ ឲ្យទទួលបានការយល់ដឹងកាន់តែច្បាស់ អំពីសារសំខាន់នៃអាហារូបត្ថម្ភដ៏ត្រឹមត្រូវសម្រាប់ពួកគេ និងកុមារ។ ជាពិសេសសារសំខាន់នៃកាល់ស្យូមតែម្តង។ សិក្ខាសាលានេះ ក៏ផ្តល់ការអប់រំដល់ស្ត្រី ស្ដីពីការមានផ្ទៃពោះ និងភាពជាម្តាយផងដែរ។ អ្នកស្រី Monsinee បានបន្ថែមទៀតថា៖« យើងមានគោលដៅបម្រើជូនប្រជាជនកម្ពុជា ទទួលបានសុខភាពកាន់តែល្អប្រសើរឡើង និងជីវិតដ៏ពេញលេញ។ តាមរយៈកិច្ចសហការមួយនេះ យើងមានគម្រោងបញ្ជ្រាបការយល់ដឹង អំពីសារសំខាន់នៃកាល់ស្យូមសម្រាប់ស្ត្រីមានផ្ទៃពោះ និងកុមារ ឲ្យបានកាន់តែទូលំទូលាយ នៅតាមបណ្តាខេត្តក្រុងសំខាន់ៗដូចជា រាជធានីភ្នំពេញ ខេត្តបាត់ដំបង កំពង់ចាម និងសៀមរាប ដោយរំពឹងថានឹងអាចមានអ្នកចូលរួមប្រមាណជាង ១៥០០ គ្រួសារ»។
ក្នុងសិក្សាសាលានោះ លោកស្រី ឆាយ ស្វែងជាអាទិ៍ ប្រធានសមាគមឆ្មបកម្ពុជា ក៏បានគូសបញ្ជាក់ថាពីសារសំខាន់ នៃកិច្ចសហការរវាងសមាគមឆ្មបកម្ពុជា និងក្រុមហ៊ុនសាណូហ្វីនេះដែរ។ លោកស្រី ឆាយ ស្វែងជាអាទិ៍ លើកឡើងថា កិច្ចសហការរវាងសមាគមឆ្មបកម្ពុជា និងក្រុមហ៊ុនសាណូហ្វី ពិតជាមានសារសំខាន់ និងចាំបាច់ ហើយវាពិតជាបានផ្តល់ផលប្រយោជន៍យ៉ាងច្រើន សម្រាប់ស្ត្រីដែលមានផ្ទៃពោះ និងស្ត្រីដែលត្រៀមខ្លួនមានផ្ទៃពោះ។
សូមបញ្ជាក់ថា ក្រៅតែស្វែងយល់ពីសារប្រយោជន៍នៃកាល់ស្យូម អ្នកចូលរួមក្នុងសិក្ខាសាលានេះ ទទួលបានការពិគ្រោះយោបល់ពីគ្រូពេទ្យជំនាញ ស្តីពីអាហារូបត្ថម្ភសម្រាប់ស្ត្រីមានផ្ទៃពោះ និងកុមារ ការពិនិត្យសុខភាព ដូចជាការវាស់ចង្វាក់បេះដូងទារកក្នុងផ្ទៃ ការពិនិត្យផ្ទៃពោះ និងវាស់សម្ពាធឈាមសម្រាប់ស្ត្រីជាម្តាយជាដើម។ ក្នុងសិក្ខាសាលានេះ ក៏រៀបចំឲ្យមានជាវគ្គសំណួរចម្លើយ និងការធ្វើបទបង្ហាញ ពីសំណាក់គ្រូពេទ្យជំនាញថែមទៀតផង។
អ្នកចូលរួមក្នុងសិក្ខាសាលានេះ ក៏បានសម្តែងការពេញចិត្ត និងលើកឡើងថា ពួកគាត់ទទួលបានចំណេះដឹងថ្មីៗ អំពីសារសំខាន់នៃកាល់ស្យូម ដែលជួយឲ្យពួកគាត់ មានការយកចិត្តទុកដាក់ ចំពោះប្រភេទអាហារដែលសម្បូរកាល់ស្យូម សម្រាប់ការលូតលាស់ឆ្អឹង និងកម្ពស់របស់កុមារ និងការការពារខ្លួនពួកគាត់ផ្ទាល់ ពីជំងឺបម្រុងក្រឡាភ្លើង ការសម្រាលកូនមុនខែ និងជំងឺពុកឆ្អឹងជាដើម។
តាមការណែនាំរបស់អង្គការសុខភាពពិភពលោក ស្ត្រីមានផ្ទៃពោះគួរទទួលទានកាល់ស្យូម ឲ្យបានគ្រប់គ្រាន់ជារៀងរាល់ថ្ងៃ ចាប់ពីសប្តាហ៍ទី២០នៃការពពោះ។
ការបន្ថែមកាល់ស្យូម ១០០០ មីល្លីក្រាមក្នុងមួយថ្ងៃ អាចជួយកាត់បន្ថយហានិភ័យជំងឺបម្រុងក្រឡាភ្លើង បានពី ៣១ ភាគរយ ទៅ៦៥ភាគរយ និងកាត់បន្ថយហានិភ័យ នៃការសម្រាលកូនមិនគ្រប់ខែបាន២៤ភាគរយ នេះបើតាមការសិក្សារបស់ Nutrition Reviews។
នៅកម្ពុជាកុមារប្រហែល ៣២ភាគរយ ដែលមានអាយុក្រោម៥ឆ្នាំ មានជំងឺក្រិន ដោយសារ កង្វះកាល់ស្យូម។ នេះបើតាមការសិក្សារបស់ CDSH ក្នុងឆ្នាំ២០១៤។
គួររំលឹកផងដែរថា សាណូហ្វីកម្ពុជា ដែលជាក្រុមហ៊ុនឱសថលំដាប់ពិភពលោក សហការជាមួយសមាគមឆ្មបកម្ពុជា នឹងបន្តធ្វើសិក្ខាសាលានេះ តាមបណ្តាខេត្ត ក្រុងនានា ជាបន្តបន្ទាប់ទៀត។ ក្នុងនោះខេត្តកំពង់ចាម រៀបចំនៅថ្ងៃទី១២ សីហា ២០១៨ ។ ខេត្តសៀមរាប រៀបចំនៅថ្ងៃទី២៦ សីហា ២០១៨ និងរាជធានីភ្នំពេញ នៅថ្ងៃទី ១៩ សីហា ២០១៨ និងទី ២ ខែកញ្ញា ២០១៨។
សិក្ខាសាលានេះធ្វើឡើង ២ពេល គឺពេលព្រឹក និងពេលរសៀល ហើយបើកទូលាយសម្រាប់សាធារណជនទូទៅ។ ជាពិសេសផ្តោតសំខាន់លើស្ត្រីមានផ្ទៃពោះ ដែលត្រៀមខ្លួនធ្វើជាម្តាយ ស្ត្រីជាម្តាយ ស្ត្រីដែលស្ថិតក្នុងវ័យបន្តពូជ និងកុមារ៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
