ជាតិ
សេដ្ឋកិច្ច
ភាគហ៊ុនរបស់ធនាគារអេស៊ីលីដាមួយផ្នែក នឹងត្រូវលក់ឲ្យសាធារណជន រូបពីហ្វេសប៊ុក
× ភ្នំពេញ៖ ភាគហ៊ុនរបស់ធនាគារអេស៊ីលីដា ចំនួន ២៥ភាគរយ គ្រោងនឹងចុះបញ្ជីក្នុងផ្សារមូលបត្រ ដើម្បីបោះលក់ជាសាធារណៈ នាពេលខាងមុខនេះ។ នេះបើតាមសេចក្ដីជូនដំណឹងរបស់ក្រុមហ៊ុន ACLEDA Securities Plc នៅថ្ងៃទី១៨ខែកក្កដា។
បច្ចុប្បន្ន ភាគហ៊ុន ២៥ភាគរយរបស់ធនាគារអេស៊ីលីដានេះ កំពុងកាន់កាប់ដោយក្រុមហ៊ុន ASA Plc ។ ASA Plc ត្រូវបានបង្កើតឡើងតាំងពីឆ្នាំ២០០០ ដើម្បីកាន់កាប់ភាគហ៊ុនរបស់ធនាគារអេស៊ីលីដា ភីអិលស៊ី ចំនួន ២៥ភាគរយ។ សព្វថ្ងៃនេះ ASA មានភាគទុនិកជាង ១ម៉ឺននាក់ ដែលភាគច្រើនជាបុគ្គលិករបស់ធនាគារមួយនេះ។
សេចក្ដីជូនដំណឹងខាងលើនេះ ឲ្យដឹងថា ក្រុមហ៊ុន ASA Plc កំពុងរៀបចំនីតិវិធី ដើម្បីស្នើសុំការអនុញ្ញាតពីអាជ្ញាធរ និងចុះបញ្ជីនៅផ្សារមូលបត្ររបស់កម្ពុជា។
ក្រុមហ៊ុននេះ អះអាងថា តាមរយៈការទិញមូលបត្ររបស់ក្រុមហ៊ុនខ្លួន សាធារណជននឹងមានឱកាសទទួលបានអត្ថប្រយោជន៍ពីការរីកចម្រើនរបស់ធនាគារអេស៊ីលីដា ដែលកំពុងរីកចម្រើនយ៉ាងរឹងមាំ។
បើតាមរបាយការណ៍របស់ធនាគារអេស៊ីលីដាប្រចាំឆ្នាំ២០១៧ ធនាគារនេះទទួលបានប្រាក់ចំណេញសុទ្ធ ៩២លានដុល្លារ ដែលធ្លាក់ចុះ ២៧ភាគរយ ធៀបនឹង ១២៦ លានដុល្លារនៅឆ្នាំ២០១៦។ ទ្រព្យសកម្មមានចំនួន ៥២៤៤លានដុល្លារ និងមានសមតុល្យឥណទាន ៣០៨៥លានដុល្លារ ព្រមទាំងបញ្ញើ-សន្សំចំនួន ៣៣២៩លានដុល្លារ។
គួរបញ្ជាក់ថា ក្រុមហ៊ុន Pestech Cambodia ដែលគ្រោងចូលផ្សារភាគហ៊ុនដែរនោះ កាលពីខែមិថុនា បានទទួលការអនុញ្ញាតបោះផ្សាយពីគណៈកម្មាការមូលបត្រកម្ពុជា (SECC) ដែលរំពឹងថានឹងអាចលក់មូលបត្រនៅចុងឆ្នាំនេះ។
ក្រុមហ៊ុនថ្មីទាំងនេះ អាចនឹងជាក្រុមហ៊ុនពីរបន្ថែមទៀត ក្នុងផ្សារមូលបត្រកម្ពុជា ដែលមានក្រុមហ៊ុនចំណុះរដ្ឋចំនួន៣ និងក្រុមហ៊ុនឯកជនចំនួន២ កំពុងដំណើរការក្នុងផ្សារនេះ៕
© រក្សាសិទ្ធិដោយ thmeythmey.com