ជាតិ
ស្រុកតាវែង ខេត្តរតនគិរី ប្រឈមលិចលង់កាន់តែខ្លាំង រូបភាពពីក្រសួងធនធានទឹក និងឧតុនិយម
× អាជ្ញាធរស្រុកតាវែង ខេត្តរតនគិរី នាថ្ងៃទី២៣ ខែកក្កដា បានជម្លៀសប្រជាពលរដ្ឋជាង៤០គ្រួសារ មកកាន់ទីទួលសុវត្ថិភាព ដោយសារមូលដ្ឋាននេះ កំពុងលិចលង់ដោយសារទឹកជំនន់។ បើតាមក្រសួងធនធានទឹក និងឧតុនិយម ទឹកទន្លេសេសាន បានបន្តកើនឡើងលើសកម្រិតប្រកាសអាសន្ន។ ក្រៅស្រុកតាវែង ទឹកបានបន្តជន់លិចចូលតំបន់ទំនាបមួយចំនួននៅស្រុកអណ្តូង មាស វើនសៃ និងអូរយ៉ាដាវ ផងដែរ។
ប្រសិនបើខេត្តរតនគិរី ឬខេត្តរបស់វៀតណាម បន្តធ្លាក់ភ្លៀង បណ្តាឃុំនៅស្រុកតាវែង នឹងកាន់តែលិចលង់។ នេះបើតាមការអះអាងលោក ចាន់ ប៊ុនធឿន ប្រធានមន្ទីរធនធានទឹក និងឧតុនិយមខេត្តរតនគិរី។
ប្រធានមន្ទីរធនធានទឹករូបនេះ បានបន្ថែមថា បច្ចុប្បន្នភូមិមួយចំនួននៅតាវែង មានទឹកលិចពីកន្លះម៉ែត្រ ទៅ១ម៉ែត្រកន្លះ ដែលអាចបង្កគ្រោះថ្នាក់ដល់ប្រជាពលរដ្ឋ។ បច្ចុប្បន្នតាមការវាស់ស្ទង់ពីកម្រិតទឹកមានការកើនឡើងក្នុងកម្រិតទាប ដែលអាចងាយស្រកទៅវិញឆាប់រហ័ស ប្រសិនបើភ្លៀងមិនបន្តធ្លាក់ទេនោះ។
ជំនន់ទឹកភ្លៀងដែលបង្កឲ្យកម្ពស់ទឹកនៅតាមដងទន្លេសេសាន មានការកើនឡើង និងបណ្ដាលឲ្យស្រុកចំនួន៤កំពុង លិចលង់ជាអន្លើៗនោះ គឺកើតឡើងដោយសារតែជំនន់ទឹកភ្លៀងហូរធ្លាក់ពីប្រទេសវៀតណាម ដែលមានព្រំប្រទល់ជាប់ខេត្តរតនគិរីនេះតែម្ដង៕
Tag:
អាកាសធាតុ
ស្ទឹងត្រែង
ទឹកជំនន់
© រក្សាសិទ្ធិដោយ thmeythmey.com