គ្រាប់បាល់វ៉ូឡេពីចំងាយរបស់ Pavard ឈ្នះគ្រាប់បាល់ល្អបំផុតនៅ World Cup

កីឡាអន្តរជាតិ

អន្តរជាតិ

គ្រាប់បាល់វ៉ូឡេពីចំងាយរបស់ Pavard ឈ្នះគ្រាប់បាល់ល្អបំផុតនៅ World Cup

26, Jul 2018 , 10:53 am

រូបភាព

ដោយ: ទេព ពិទូរ្យ

សហព័ន្ធកីឡាបាល់ទាត់អន្តរជាតិ FIFA បានបោះឆ្នោតឲ្យ Benjamin Pavard ខ្សែការពារស្លាបស្តាំក្រុមជម្រើសជាតិបារាំង ក្លាយជាអ្នកស៊ុតបាល់ល្អជាងគេប្រចាំព្រឹត្តិការណ៍ FIFA World Cup 2018 នៅរុស្ស៊ី។

គ្រាប់បាល់ស៊ុតបញ្ចូលទីពីចំងាយដ៏អស្ថារ្យរបស់ Pavard ដែលជួយឲ្យបារាំងតាមស្មើអាហ្សង់ទីនមុនការវាយបកយកឈ្នះ ៣-៤ ក្នុងការប្រកួតវគ្គ១៦ក្រុមចុងក្រោយនោះ បានសម្រេចថាជាគ្រាប់បាល់ល្អបំផុត (World Cup 2018 best goal) ក្នុងព្រឹត្តិការណ៍កីឡាបាល់ទាត់ពិភពលោកដែលបានបញ្ចប់ទៅកាលពីថ្ងៃទី១៥ ខែក្កដានេះ ក្រោយទទួលបានសន្លឹកឆ្នោតពីអ្នកគាំទ្រច្រើនជាង៣លានសំឡេងលើគេហទំព័ររបស់ FIFA។

ខ្សែការពារវ័យ២២ឆ្នាំ ដែលបច្ចុប្បន្នប្រកបអាជីពក្នុងក្លិប VfB Stuttgart នៅអាល្លឺម៉ង់ បានបង្ហាញបច្ចេកទេសលេងបានយ៉ាងល្អ ដែលជាប់ក្នុងជម្រើស១១នាក់របស់គ្រូបង្វឹកលោក Didier Deschamps នៅគ្រប់ការប្រកួត និងនាំឲ្យក្រុមរហ្សនាមមាន់គកលើកពានលំដាប់ពិភពលោកនេះជាលើកទី២ផងដែរ។

ដោយឡែក គ្រាប់បាល់ល្អបំផុតទី២ បានទៅ Juan Quintero ខ្សែបម្រើរបស់ជម្រើសជាតិកូឡុំប៊ី ដែលជាគ្រាប់ស៊ុតបាល់ពិន័យ (free-kick) ទល់នឹងជប៉ុន។ រីឯប្រធានក្រុមក្រូអាស៊ី Luka Modric ទទួលបានលេខ៣ លើគ្រាប់បាល់ស៊ុតបញ្ចូលទីអាហ្សង់ទីន៕