កីឡាអន្តរជាតិ
អន្តរជាតិ
Sir Alex៖ ខ្ញុំនឹងមិនបានអង្គុយនៅទីនេះទេ បើគ្មានការយកចិត្តទុកដាក់ពីក្រុមគ្រូពេទ្យ
× អតីតអ្នកចាត់ការទូទៅ Manchester United លោក Sir Alex Ferguson បានបង្ហាញមុខក្នុងវីដេអូជាលើកដំបូង ដោយនិយាយាអរគុណដល់ក្រុមគ្រូពេទ្យដែលបានជួយសង្គ្រោះជីវិតលោក ក្រោយពីទទួលការវះកាត់សង្គ្រោះបន្ទាន់ពីការហូរឈាមចូលក្នុងខួរក្បាល កាលពីថ្ងៃទី ៥ ខែឧសភា។
ខ្សែវីដេអូមួយដែលបានបង្ហោះក្នុងផេកហ្វេសប៊ុកផ្លូវការរបស់ក្លិបបិសាចក្រហម លោក Sir Alex បាននិយាយថាលោកនឹងមិនបានអង្គុយនៅទីនេះទេ បើសិនជាគ្មានការយកចិត្តទុកដាក់ពីបុគ្គលិកមន្ទីរពេទ្យ Salford Royal Hospital បន្ទាប់ពីការវះកាត់ខួរក្បាលរួច។
មន្ទីរពេទ្យ Salford Royal ដែលលោក Ferguson បានសម្រាកព្យាបាលក្រោយការវះកាត់ឈាមហូរក្នុងខួរក្បាល
អ្នកចាត់ការជោគជ័យបំផុតក្នុងប្រវត្តិសាស្ត្របាល់ទាត់អង់គ្លេស សញ្ចាតិស្កុតឡែន បាននិយាយជាសាធារណៈជាលើកដំបូងតាំងពីចេញពីមន្ទីរពេទ្យត្រឡប់ទៅផ្ទះវិញ ដោយថ្លែងអំណរគុណដល់ក្រុមគ្រូពេទ្យ ក៏ដូចជាក្រុមគ្រួសារលោក ក្លិប Man Utd រួមទាំងអ្នកគាំទ្រទាំងអស់ដែលជូនពរដល់លោក នៅពេលលោកមានបញ្ហាហូរឈាមចូលក្នុងខួរក្បាលរហូតឈានដល់ការវះកាត់។
ការបង្ហាញខ្លួនជាសាធារណៈលើកចុងក្រោយរបស់បុរសវ័យ៧៦ឆ្នាំរូបនេះ គឺនៅថ្ងៃទី២៩ ខែមេសា នៅឯទឹកដី Old Trafford នៅពេលលោកបានបង្ហាញវត្តមានជាមួយអតីតអ្នកចាត់ការ Arsenal លោក Arsene Wenger ជាមួយនឹងពានរង្វាន់មួយ។
យ៉ាងណាក៏ដោយ លោក Ferguson ក៏បានបញ្ជាក់ក្នុងវីដេអូមានរយៈពេកជិត១នាទីនោះដែរថា នៅរដូវកាលថ្មីខាងមុខ លោកនឹងអាចទៅចូលរួមទស្សនាការប្រកួតផ្ទាល់របស់ Mancheter United វិញបាន៕
Tag:
បាល់ទាត់
Alex Ferguson
Manchester United
© រក្សាសិទ្ធិដោយ thmeythmey.com