អន្តរជាតិ
នយោបាយអន្តរជាតិ
អតីតនាយករដ្ឋមន្ត្រីថៃ ថាក់ស៊ីន ជឿជាក់ «បក្សភឿថៃនៅតែគ្មានបក្សដែលផ្តួលបាន» លោក ថាក់ស៊ីន អតីតនាយករដ្ឋមន្ត្រីថៃ
× អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់ បានផ្ញើក្តីសង្ឃឹម និងជំនឿជាក់របស់លោកលើជ័យជម្នះរបស់បក្សភឿថៃសម្រាប់ការបោះឆ្នោតជាតិថៃនាពេលខាងមុខ។ អតីតនាយករដ្ឋមន្ត្រីថៃរូបនេះ ហ៊ានអះអាងទៀតថា បក្សភឿថៃជាបក្សដែលមិនអាចផ្តួលបានឡើយ បើទោះបីជាមានការប៉ុនប៉ុងបំបែកច្រើនលើកហើយក៏ដោយ។
តាមរយៈសារវីដេអូក្នុងថ្ងៃខួបកំណើតរបស់លោកនៅថ្ងៃទី ២៦ ខែកក្កដា លោក ថាក់ស៊ីន ស៊ីណាវ៉ាត់ បានលើកឡើងពីទុកលំបាករបស់ប្រជាជនថៃ ដែលត្រូវរស់នៅជាមួយនឹងការចំណាយច្រើន ខណៈចំណូលរបស់ពួកគេ មិនមានការកើនឡើង។ លោក ចោទប្រមុខរបបសឹកថា មិនយល់ពីបេះដូងរបស់ប្រជាជនថៃ ស្របពេលដែលប្រមុខសឹកព្យាយាមបន្តតោងអំណាចបន្ថែមទៀត។
តាមការចុះផ្សាយរបស់សារព័ត៌មានថៃ Bangkok Post លោកអតីតនាយករដ្ឋមន្ត្រីថៃ ដែលកំពុងតែរស់នៅនិរទេសខ្លួនឯងនៅក្រៅប្រទេសរូបនេះ ថែមទាំងបានបង្ហាញពីទំនុកចិត្តថា បោះឆ្នោតឆ្នាំក្រោយ បក្សភឿថៃ នឹងឈ្នះ និងអាចត្រលប់ទៅកាន់អំណាចវិញបានហើយ។ លោក សង្កត់ធ្ងន់ថា បក្សភឿថៃ នឹងទទួលបានជ័យជម្នះភ្លួកទឹកភ្លួកដីជាក់ជាពុំខាន។
សូមជម្រាបផងដែរថា បក្សភឿថៃ ដែលត្រូវបានបង្កើតឡើងតាំងពីឆ្នាំ២០០១មក តែងតែឈ្នះរាល់ការបោះឆ្នោត។ ក៏ប៉ុន្តែបក្សដែលធ្លាប់ដឹកនាំដោយត្រកូលអ្នកនយោបាយស៊ីណាវ៉ាត់មួយនេះ ក៏រងទុក្ខមិនស្ទើរដែរ ពោលគឺនាយករដ្ឋមន្ត្រីរបស់បក្សថៃ រួមមានលោកថាក់ស៊ីន ស៊ីណាវ៉ាត់ និងលោកស្រី យីងឡាក់ ស៊ីណាវ៉ាត់ សុទ្ធសឹងតែត្រូវបានទម្លាក់ចេញពីអំណាចដោយសាររដ្ឋប្រហារ។
មកទល់ពេលនេះ ទាំងលោកថាក់ស៊ីន និងលោកស្រី យីងឡាក់ កំពុងតែរស់នៅក្រៅប្រទេស ខណៈឈ្មោះរបស់អតីតមេដឹកនាំកំពូល ក៏កំពុងស្ថិតក្រោមការចោទប្រកាន់របស់តុលាការថៃពាក់ព័ន្ធនឹងបទពុករលួយផង និងបទធ្វេសប្រហែសក្នុងការដឹកនាំប្រទេស។ កន្លងមក លោកថាក់ស៊ីន បានអះអាងថា លោក មិនពាក់ព័ន្ធនឹងនយោបាយថៃឡើយ ពោលគឺសកម្មភាពលោក គ្រាន់តែជាការបង្ហាញការគាំទ្រ និងជំនឿជាក់លើបក្សដែលលោកធ្លាប់ដឹកនាំប៉ុណ្ណោះ៕
© រក្សាសិទ្ធិដោយ thmeythmey.com