កីឡាអន្តរជាតិ
អន្តរជាតិ
Son សង្ឃឹមជួយជម្រើសជាតិឈ្នះមេដាយមាស Asian Games ដើម្បីផុតកាតព្វកិច្ចយោធា
× ខ្សែប្រយុទ្ធ Son Heung-min នឹងខកខានការចាប់ផ្តើមរដូវកាលថ្មីក្នុងក្របខណ្ឌ Premier League ជាមួយ Tottenham Hotspur ដើម្បីទៅចូលរួមឲ្យក្រុមជម្រើសជាតិកូរ៉េខាងត្បូង នៃព្រឹត្តិការណ៍កីឡា Asian Games នៅឥណ្ឌូណេស៊ី។ Son រំពឹងថាអាចជួយក្រុមឈ្នះមេដាយមាសលើវិញ្ញាសាកីឡាបាល់ទាត់ផ្នែកបុរស ដើម្បីរួចផុតកាតព្វកិច្ចយោធានៅប្រទេសកំណើត។
នៅក្រោមច្បាប់របស់ប្រទេសកូរ៉េខាងត្បូង បុរសទាំងអស់ត្រូវមានកាតព្វកិច្ចយោធារយៈពេល ២១ខែ នៅមុនអាយុ ២៨ឆ្នាំ។ ដូច្នេះ Son ដែលបច្ចុប្បន្នមានវ័យ២៦ឆ្នាំ ក៏នឹងឈានដល់ពេលវេលាត្រូវបំពេញកាតព្វកិច្ចយោធាជូនជាតិចាប់ពីខែកក្កដា ឆ្នាំ២០១៩ តទៅ។
តែយ៉ាងណាក៏ដោយ រដ្ឋាភិបាលកូរ៉េខាងត្បូងក៏បានផ្តល់ការលើកលែងវិញដែរ សម្រាប់អត្តពលិករូបណា ដែលទទួលជោគជ័យក្នុងការប្រកួតធំៗសម្រាប់ប្រទេសជាតិ។ នេះមានន័យថា ប្រសិនបើជម្រើសជាតិកូរ៉េខាងត្បូង និងខ្សែប្រយុទ្ធកំពុងឡើងជើងរបស់ក្រុមរហស្សនាមមាន់ខ្នាយមាស អាចឈ្នះពានក្នុងព្រឹត្តិការណ៍កីឡាអាស៊ី (Asian Game) ឆ្នាំ ២០១៨ នោះ រូបគេនឹងត្រូវបានផ្តល់ការលើកលែងពីកាតព្វកិច្ចយោធានេះមិនខាន។
យ៉ាងណាមិញ ប្រសិនបើអតីតសមាជិក Bayer Leverkusen រូបនេះមិនអាចជួយជម្រើសជាតិលើកពាននេះទេ រូបគេនឹងត្រូវអវត្តមានឲ្យ Spurs រហូតដល់ទៅ២រដូវកាល ពោលគឺក្នុងរដូវកាល ២០១៩-២០២០ និង ២០២០-២០២១ ដើម្បីទៅបំពេញកិច្ចការយោធា ហើយនឹងអាចប៉ះពាល់ដល់អាជីពជាកីឡាករបាល់ទាត់នេះដែរ។
ដោយឡែកក្នុងការបង្ហាញខ្លួនឲ្យជម្រើសជាតិសម្រាប់ព្រឹត្តិការណ៍កីឡាអាស៊ីដែលរៀបចំឡើងក្នុងក្រុងហ្សាការតាចាប់ពីថ្ងៃទី១៨ ខែសីហា រហូតដល់ថ្ងៃទី២ ខែកញ្ញានោះ Son នឹងខកខានសម្រាប់ការប្រកួតបើកឆាករដូវកាលថ្មីពេល Spurs ជួប Newcastle រូមទាំងជំនួបទល់នឹង Fulham, Manchester United និង Watford ផងដែរ៕
Tag:
បាល់ទាត់
Asian Games
Son Heung-min
ឥណ្ឌូណេស៊ី
© រក្សាសិទ្ធិដោយ thmeythmey.com