កីឡាករហែលទឹកវ័យក្មេងអាយុត្រឹម ១០ឆ្នាំ បានបំបែកកំណត់ត្រារបស់ម្ចាស់មេដាយមាសកីឡាអូឡាំពិក៤សម័យកាល Michael Phelps ដែលគ្មានអ្នកបំបែកបានរយៈពេល២៣ឆ្នាំមក លើវិញ្ញាសាហែលមេអំបៅ ចម្ងាយ១០០ម៉ែត្រ។
កុមារា Clark Kent Apuada ដែលមិត្តភក្តិរបស់គេឲ្យរហស្សនាមថា «Superman» បានចូលរួមប្រកួតលើវិញ្ញាសាហែលម៉េអំបៅចម្ងាយ ១០០ម៉ែត្រ ដោយប្រើថេរវេលាត្រឹម ១នាទីនឹង៩វិនាទី នៅឯកម្មវិធី Far Western Long Course Championship ក្នុងរដ្ឋ California សហរដ្ឋាអាមេរិក នៅថ្ងៃទី២៩ ខែកក្កដាកន្លងទៅ។
កុមារ Clark Kent Apuada ដែលមានអាយុត្រឹម១០ឆ្នាំ
១:៩នាទីនោះ ជាល្បឿនលឿនជាងកំណត់ត្រារបស់ Michael Phelps ដែលធ្វើបាន ក្នុងអាងហែលទឹក Far Western ដូចគ្នានោះកាលពីឆ្នាំ១៩៩៥ ដោយប្រើថេរវេលា ១:១០,៤៨នាទី ក្នុងប្រភេទកីឡាវ័យក្មេងត្រឹមអាយុប្រហែល១០ឆ្នាំនេះដែរ។ កំណត់ត្រារបស់ Phelps ដែលធ្វើបានកាលនោះ ត្រូវបានក្មេងប្រុសកូនកាត់ហ្វីលីពីន-អាមេរិក Clark Kent បំបែកបាននៅ ២៣ឆ្នាំក្រោយ។
Clark Kent ជាសិស្សថ្នាក់ទី ៥ ដែលមានដើមកំណើតហ្វីលីពីន សញ្ជាតិអាមេរិក បានប្រាប់គេហទំព័រព័ត៌មានអាមេរិក HuffPost ថារូបគេមានក្តីសុបិនចង់បំបែកឯតទគ្គកម្មរបស់ Phelps តាំងពីចាប់ផ្តើមហែលទឹកនៅអាយុ ៧ឆ្នាំមកម្លេះ។
«ខ្ញុំទទួលបានការលើកទឹកចិត្តខ្លាំងណាស់។ ខ្ញុំពិតជាសប្បាយចិត្ត ហើយខ្ញុំមានអារម្មណ៍ធូរស្រាលដែលខ្ញុំអាចយកឈ្នះកំណត់ត្រានេះបាន»។ Clark Kent និយាយដូច្នេះបន្ទាប់ពីទទួលជ័យជម្នះក្នុងការប្រកួតនោះ។
រូបគេបន្ថែមថា៖«មនុស្សភាគច្រើនធ្លាប់តែហៅខ្ញុំថា Clark តែនៅពេលដែលខ្ញុំផ្តួលកំណត់ត្រារបស់ Michael Phelps ពួកគេចាប់ផ្តើមហៅខ្ញុំថា Superman។ ខ្ញុំគិតថា បើខ្ញុំមានគំនិតវិជ្ជមាន នោះរឿងវិជ្ជមាននឹងកើតឡើងមកលើខ្ញុំ»។