ជាតិ
រូបភាពទាំងអស់ពី អាជ្ញាធរជាតិអប្សរា
×![]()
សៀមរាប៖ ដើមគ្រញូងមួយដើម ស្ថិតក្នុងព្រៃឧទ្យានអង្គរ ក្នុងភូមិគោកតាចាន់ សង្កាត់គោកចក ត្រូវជនមិនស្គាល់មួយក្រុមលួចកាប់ កាលពីយប់ថ្ងៃទី ៨ សីហា។ ក្រោយទទួលដំណឹងពីអាជ្ញាធរមូលដ្ឋាន អាជ្ញាធរជាតិអប្សរា សហការជាមួយមន្ទីរបរិស្ថានខេត្តសៀមរាប សម្រេចដកហូត និងដឹកជញ្ជូនឈើដែលគេលួចកាប់នោះ ទៅរក្សាទុកនៅទីមានសុវត្ថិភាព។
ដើមគ្រញូង ដែលជនមិនស្គាល់មុខលួចកាប់នេះ មានមុខកាត់ជិត ៤តឹក និងបណ្តោយជាង ២ម៉ែត្រ។ ប្រជាពលរដ្ឋដែលដឹងហេតុការណ៍នេះ បានផ្តល់ដំណឹងភ្លាមៗទៅអាជ្ញាធរជាតិអប្សរា ដើម្បីអន្តរាគមន៍ និងទប់ស្កាត់មិនឱ្យមានការដឹកជញ្ជូនចេញ។
លោក ស៊ិន ពិសី បុគ្គលិកនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន នៃអាជ្ញាធរជាតិអប្សរា បានឱ្យដឹងថា បន្ទាប់ពីមានការសម្របសម្រួលពីភាគីពាក់ព័ន្ធ គ្រញូងដែលគេលួចកាប់នោះ បានយកទៅរក្សាទុកនៅស្នាក់ការតំបន់ការពារឧទ្យានអង្គរ នៅថ្ងៃទី១០ ខែសីហា។ លោករម្លឹកថា ក្រោយដឹងហេតុការណ៍ ភាគីពាក់ព័ន្ធបានសហការយ៉ាងយកចិត្តទុកដាក់ ដោយប្រើកម្លាំងយាមល្បាតជាប់រហូត ព្រោះបារម្ភខ្លាចក្រុមជនខិលខូចចូលមកដឹកជញ្ជូនឈើដែលកាប់រួច។
បើតាមលោក ស៊ិន ពិសី ភូមិសាស្ដ្រដែលជនមិនស្គាល់មុខលួចកាប់នោះ គឺចុះពីផ្លូវកៅស៊ូប្រមាណ ១០ម៉ែត្រប៉ុណ្ណោះ តែនៅដាច់ឆ្ងាយពីផ្ទះអ្នកភូមិបន្ដិច។ ម្យ៉ាងទៀត យប់ដែលលួចកាប់នោះ មានភ្លៀងធ្លាក់ពេញមួយយប់ផងដែរ ជាឱកាសសម្រាប់ក្រុមអ្នករកស៊ីគ្រញូង។ នេះបើតាមលោក ស៊ិន ពិសី ដដែល៕
Tag:
ដើមគ្រញូង
អង្គរ
© រក្សាសិទ្ធិដោយ thmeythmey.com
