រ៉ឺម៉កវែង មិនទំនើប តែពេញនិយមខ្លាំងសម្រាប់អ្នកដំណើរ ព្រែកព្នៅ-ផ្សារតូច

ជាតិ

បទយកការណ៍ / បទសម្ភាសន៍

សេដ្ឋកិច្ច

រ៉ឺម៉កវែង មិនទំនើប តែពេញនិយមខ្លាំងសម្រាប់អ្នកដំណើរ ព្រែកព្នៅ-ផ្សារតូច

14, Aug 2018 , 10:46 am

រូបភាព

ដោយ: ប៉ូ សាគុន

ភ្នំពេញ៖ ទោះបីមធ្យោបាយធ្វើដំណើរនាពេលបច្ចុប្បន្នកាន់តែទំនើបក្ដី ប៉ុន្តែរ៉ឺម៉កខ្នាតវែង នៅតែមានតម្លៃធូរថ្លៃសម្រាប់អ្នកដំណើរ។ នៅតាមបណ្តោយផ្លូវជាតិលេខ៥ ត្រង់ចំណុចផ្សារតូច ទៅដល់ព្រែកព្នៅ ចម្ងាយផ្លូវប្រមាណជាង១០គឺឡូម៉ែត្រ ថ្លៃធ្វើដំណើរតែ២ពាន់រៀលតែប៉ុណ្ណោះ សម្រាប់មនុស្សម្នាក់។ មានន័យថា ចម្ងាយមួយគីឡូម៉ែត្រ ពួគាត់ចំណាយមិនដល់២០០រៀលផង។ ដូច្នេះហើយទើបរ៉ឺម៉កខ្នាតវែងនេះ នៅតែពេញនិយម សម្រាប់អ្នកដំណើរនៅកំណាត់ផ្លូវជាតិលេខ៥ ចំណុចផ្សារព្រែកព្នៅ និងផ្សារតូច ពិសេសសម្រាប់កម្មកររោងចក្រ បើទោះវាមិនសូវជាទំនើបក៏ដោយ។

តទៅនេះសូមនាងកញ្ញា លោក លោកស្រី អញ្ជើញស្ដាប់បទយកការណ៍ដែលរៀបរៀងដោយកញ្ញា ប៉ូ សាគុន ដូចតទៅ៖

បើគេធ្វើដំណើរទៅផ្សារតូចក្បែររង្វង់មូលស្ពានជ្រោយចង្វារ គេនឹងឃើញមានរ៉ឺម៉កប្រភេទវែងជាច្រើនគ្រឿង ដាក់តម្រៀបគ្នាជាជួរ។ រ៉ឺម៉កទាំងនោះ នៅរង់ចាំដឹកភ្ញៀវពីផ្សារតូច ឆ្ពោះទៅព្រែកព្នៅ។ ភ្ញៀវដែលជិះរឺម៉កវែងនេះ ភាគច្រើនជាកម្មកររោងចក្រ ក្រៅពីនោះមានសិស្ស និងអ្នកដំណើរទូទៅ។ បើទោះបីជាបច្ចុប្បន្ន មានមធ្យោបាយដឹកជញ្ជូនសាធារណៈកាន់តែច្រើន និងទំនើបយ៉ាងណាក្ដី ប៉ុន្តែរ៉ឺម៉កវែង នៅតែជាជម្រើសដ៏ល្អសម្រាប់អ្នកដំណើរនៅតាមកំណាត់ផ្លូវជាតិលេខ៥ ព្រោះវាមានតម្លៃទាប និងងាយស្រួលធ្វើដំណើរ។

ម៉ោងជិត១២ថ្ងៃត្រង់ជាពេលដែលមិនសូវមានភ្ញៀវធ្វើដំណើរ លោក សយ ថា ដែលជាអ្នករត់រ៉ឺម៉កប្រភេទវែងមួយរូបនោះ កំពុងតែឈរជជែកគ្នាជាមួយអ្នករត់រ៉ឺម៉កផ្សេងទៀត នៅក្បែរជាងផ្សាដែក។ ប្រកបរបររត់រ៉ឺម៉កវែងជាង១០ឆ្នាំ លោក សយ ថា បញ្ជាក់ថា តម្លៃដឹងភ្ញៀវពី១០ឆ្នាំមុន មកទល់ពេលបច្ចុប្បន្នមិនខុសគ្នាឡើយ គឺពីព្រែកព្នៅមកផ្សារតូច ដែលមានចម្ងាយប្រមាណ១៣គីឡូម៉ែត្រ តម្លៃតែ២ពាន់រៀលប៉ុណ្ណោះ។ មើលមុខខ្ញុំបណ្ដើរ ងាកទៅមើលរ៉ឺម៉ករបស់ខ្លួន ដែលមានសភាពថ្មីក្រោយពីការជួសជុលជាច្រើនលើកបណ្ដើរ លោក សយ ថា ពោលថា ខ្លួនមិនដែលដាក់តម្លៃទៅកាន់ភ្ញៀវឡើយ ព្រោះអ្នកជិះដឹងពីចម្ងាយផ្លូវ និងតម្លៃរៀងៗខ្លួន។ តម្លៃចាប់ពី៥រយរៀលដល់២ពាន់រៀល អាស្រ័យលើចម្ងាយផ្លូវជិតឬឆ្ងាយ ក្នុងមួយថ្ងៃអ្នករត់រ៉ឺម៉កវ័យ៥៨ឆ្នាំ មកពីខេត្តកំពង់ចាមរូបនេះ អាចរកប្រាក់បានប្រមាណ៥ម៉ឺនរៀលក្នុងមួយថ្ងៃក្រោយពីផាត់ថ្ងៃសាំង។ លោក សយ ថា បញ្ជាក់៖«ចម្ងាយផ្លូវ១៣គីឡូយកគេតែ១៥០០ទៅ២០០០ សិស្សនិងកម្មករគ្នាមិនសូវមានលុយ។ ខ្ញុំមិនកំណត់ថ្លៃគេទេ គេដឹងតម្លៃខ្លួនគេហើយ ថាគេជិះត្រឹមណាដល់ត្រឹមណា»។

ងាកមកលោក ឆេង លី ដែលជាអ្នករត់រ៉ឺម៉កប្រភេទវែងមួយរូបទៀត កំពុងឈររង់ចាំភ្ញៀវក្បែរស្តុបផ្សារតូច។ ប្រកបរបរនេះក្នុងឆ្នាំ២០១២ លោក ឆេង លី មានភ្ញៀវប្រចាំជាកម្មកររោងចក្រ ដោយពួកគេត្រូវបង់ប្រាក់ឱ្យលោកគិតជាខែ។ ត្រូវចេញពីផ្ទះម៉ោង៦ព្រឹក រហូតដល់ម៉ោង៦ល្ងាចវិញ ក្រៅពីដឹកកម្ម លោកក៏ឆ្លៀតពេលដឹកភ្ញៀវទូទៅបន្ថែមដែរ ដែលលោក លី អះអាងថា លោកអាចរកចំណូលបានគួរសម ព្រោះរ៉ឺម៉កប្រភេទវែងនេះ អាចទទួលភ្ញៀវតាមផ្លូវជាហូរហែមិនដាច់។ «យើងទៅយកគេពីព្រឹកម៉ោង៦ ដល់ល្ងាចម៉ោង៥ទៅ៦។ ផ្សេងពីដឹកកម្មករយើងដឹកមនុស្សពីផ្សារ ហើយបើកតាមផ្លូវអាចបានភ្ញៀវខ្លះទៀត»។ នេះជាការបញ្ជាក់របស់លោក ឆេង លី។

ឈរមើលជាងផ្សាដែក កំពុងជួសជុលរ៉ឺម៉ករបស់ខ្លួន ដែលខូតដោយអន្លើ លោក សើ ម៉ាត់ ជាខ្មែរឥស្លាមមួយរូប ដែលប្រកបរបររត់រ៉ឺម៉កប្រភេទវែង តាំងពីឆ្នាំ១៩៨៥មក។ ត្រូវដូររ៉ឺម៉កអស់ ៣គ្រឿងចាប់ពីរករបរនេះដំបូងរហូតដល់បច្ចុប្បន្ន លោក ម៉ាត់ បញ្ជាក់ថាដ្បិតរ៉ឺម៉កខ្នាតវែងនេះមិនទំនើប តែនៅតែមានអ្នករត់ច្រើន និងពេញនិយមសម្រាប់អ្នកជិះ ព្រោះវាមានតម្លៃធូរថ្លៃ។ បុរសវ័យ៦០ឆ្នាំ ដែលរស់នៅគីឡូម៉ែត្រលេខ៧រូបនេះថា សព្វថ្ងៃនេះមុខរបររបស់លោក ពឹងស្ទើរតែទាំងស្រុងលើកម្មកររោងចក្រ។ លោក ម៉ាត់ បន្ថែម៖«វាមិនមានបាននឹងរ៉ឺម៉កនេះទេ ត្រឹមចិញ្ចឹមឆ្នាំ ចាយវាយបានមិនអត់ទេ បើធ្វើអ្នកមានមិនបានទេ។ ឥឡូវរ៉ឺម៉កមានអ្នករត់ច្រើនណាស់ មកពីខេត្តមកពីខេត្តមកប្រមូលផ្ដុំគ្នានៅហ្នឹង។ រាល់ថ្ងៃរ៉ឺម៉កសង្ឃឹមតែអ្នករោងចក្រមួយទេ»។

ជាអ្នកដំណើរម្នាក់ដែលកំពុងអង្គុយលើរ៉ឺម៉កខ្នាតវែងនេះ គឺអ្នកស្រី ហៃ សុខន ឲ្យដឹងថា អ្នកស្រីចូលចិត្តជិះរ៉ឺម៉កប្រភេទនេះ ព្រោះវាមានតម្លៃធូរថ្លៃជាង មធ្យោបាយធ្វើដំណើរផ្សេងទៀត ដែលអ្នកស្រីធ្លាប់ជិះ។ អ្នកស្រីសុខន ដែលត្រូវធ្វើដំណើរពីផ្សារតូច ទៅព្រែកព្នៅវិញ ចំណាយអស់ត្រឹមតែ២ពាន់រៀលតែប៉ុណ្ណោះ ក្នុងចម្ងាយផ្លូវជាង១០គីឡូម៉ែត្រ។ «ខ្ញុំមកពីព្រែកព្នៅមកផ្សារតូចលេងកូន។ រ៉ឺម៉កនេះតម្លៃធូរថ្លៃ ខ្ញុំជិះចម្ងាយជាង១០គីឡូអស់តែ២ពាន់រៀល»។ នេះជាការបន្ថែមរបស់អ្នក ហៃ សុខន។

ក្នុងដំណើរមួយៗដើរតម្រង់មករករ៉ឺម៉ក ដែលកំពុងចតចាំដឹកកម្មកររោងចក្រនៅជិតការ៉ាសសាំង លើចិញ្ចើមផ្លូវជិតផ្សារតូច អ្នកស្រី សុខ ចន្ទ វ័យ៤៨ឆ្នាំ ជាកម្មការិនីរោងចក្រទើបតែចេញពីធ្វើការ បានដើរមកដល់រ៉ឺម៉កមុនគេ។ រ៉ឺម៉កដែលមានទំហំអាចដាក់មនុស្សបានជិត៣០នាក់ ដែលមានសភាពរាងចាស់បន្តិចទៅហើយនោះ បាននាំយក អ្នកស្រី សុខ ចន្ទ ពីគីឡូម៉ែត្រលេខ៦ មកដល់រោងចក្រជិតផ្សារតូច អស់ជាច្រើនឆ្នាំមកហើយ ពោលតាំងពីអ្នកស្រីចូលធ្វើការដំបូង។ ចម្ងាយប្រមាណ១២គីឡូម៉ែត្រ ធ្វើដំណើរទៅនិងមករៀងរាល់ថ្ងៃធ្វើការ អ្នកស្រី សុខ ចន្ទ ចំណាយប្រាក់ត្រឹមតែ១ពាន់រៀលតែប៉ុណ្ណោះ សម្រាប់មធ្យោបាយធ្វើដំណើរដ៏សាមញ្ញនិងពេញនិយមនេះ។

រាងស្គមសម្បុរស្រអែម អ្នកស្រី ចន្ទ ពោលថា តាំងពីអ្នកស្រីជិះរ៉ឺម៉កប្រភេទវែងនេះដំបូងរហូតដល់បច្ចុប្បន្ន តម្លៃនៅតែរក្សាដដែល បើប្រៀបធៀបជាមួយមធ្យោបាយធ្វើដំណើរផ្សេងៗទៀត មានភាពខុសគ្នាឆ្ងាយ។ អ្នកស្រី សុខ ចន្ទ នៅតែចង់ឱ្យរ៉ឺម៉កប្រភេទវែងនេះបន្តដឹងកម្មកររោងចក្រយូរអង្វែងទៅមុខទៀត ព្រោះវាបានជួយសម្រួលដល់ជីវភាពពួកគាត់។ អ្នកស្រី សុខ ចន្ទ បញ្ជាក់៖«ខ្ញុំជិះរ៉ឺម៉កនេះយូរឆ្នាំហើយ តាំងពីខ្ញុំចូលធ្វើការដំបូង។ តម្លៃវាថោកសមរម្យអស់តែ១ពាន់រៀល បើជិះម៉ូតូឌុបឬមធ្យោបាយផ្សេងៗថ្ងៃ យើងថែមម៉ោងដល់៧យប់ អស់៥ទៅ៦ពាន់ឯណោះ ពីនេះដល់គីឡូម៉ែត្រលេខ៦»៕