បេក្ខជនជាប់ឆ្នោត៖ សម្តេច ហេង សំរិន ៨៤ឆ្នាំ ចាស់ជាងគេ លោក យឹម លាត ៣២ឆ្នាំ ក្មេងជាងគេ

ជាតិ

បោះឆ្នោត

នយោបាយជាតិ

បេក្ខជនជាប់ឆ្នោត៖ សម្តេច ហេង សំរិន ៨៤ឆ្នាំ ចាស់ជាងគេ លោក យឹម លាត ៣២ឆ្នាំ ក្មេងជាងគេ

15, Aug 2018 , 9:15 pm

រូបភាព

លោក យឹម លាត វ័យ៣២ឆ្នាំ និងសម្តេច ហេង សំរិន វ័យ៨៤ឆ្នាំ

ដោយ: ថ្មីៗ

ក្នុងចំណោមបេក្ខជនជាប់ឆ្នោតទាំង១២៥រូបរបស់គណបក្សប្រជាជនកម្ពុជា នានីតិកាលទី៦នេះ សម្តេច ហេង សំរិន អាយុ៨៤ ដែលឈរនៅមណ្ឌលត្បូងឃ្មុំ មានវ័យចំណាស់ជាងគេ រីឯបេក្ខជនជាប់ឆ្នោតដែលក្មេងជាងគេបំផុត គឺលោក យឹម លាត នៅមណ្ឌលកំពង់ធំ ដោយលោកមានវ័យត្រឹម៣២ឆ្នាំ។

តាមបញ្ជីរាយនាមដែលផ្សាយគណៈកម្មាធិការជាតិរៀបចំការបោះឆ្នោត (គ.ជ.ប) បេក្ខជនជាប់ឆ្នោតពីររូបដែលវ័យលើស៨០ឆ្នាំ គឺសម្តេច ហេង សំរិន (៨៤ឆ្នាំ) និងសម្តេច គង់ សំអុល (៨២ឆ្នាំ)។

បេក្ខជនជាប់ឆ្នោត២៤នាក់ មានអាយុចន្លោះពី៧០ ទៅ៧៧ឆ្នាំ ដោយលោកស្រី ពៅ សាវឿន នៅមណ្ឌលសៀមរាប ជាស្ត្រីដែលមានវ័យចំណាស់ជាងគេ (៧១ឆ្នាំ) បន្ទាប់មក មានលោកស្រី លី គឹមលៀង (៧០ឆ្នាំ) និងលោកស្រី និន សាផុន (៧០ឆ្នាំ)។

បេក្ខជនជាប់ឆ្នោត៧៣រូប មានអាយុចន្លោះពី៦០ទៅ៦៩ឆ្នាំ។ លោកស្រី បាន ស្រីមុំ នៅមណ្ឌលប៉ៃលិន ជាបេក្ខជនជាប់ឆ្នោតដែលមានវ័យក្មេងជាងគេក្នុងចំណោមស្ត្រី (៤៣ឆ្នាំ)។ ក្រៅពីនេះ តំណាងរាស្ត្រ ៨រូប មានអាយុក្រោម៤០ឆ្នាំ។

លោក យឹម លាត នៃមណ្ឌលកំពង់ធំ មានវ័យទើបតែ៣២ឆ្នាំ ដោយក្មេងជាង លោក សុខ សូកាន (៣៥ឆ្នាំ) លោក ហ៊ុន ម៉ានី (៣៦ឆ្នាំ) លោក លោក នន វាសនា (៣៦ឆ្នាំ) លោក ស សុខា (៣៧ឆ្នាំ) លោក ម៉ាត់ សេត (៣៨ឆ្នាំ) លោក សាយ សំអាល់ (៣៨ឆ្នាំ) និង លោក ឃឹង នុភាព (៣៩ឆ្នាំ)៕