ជាតិ
សេដ្ឋកិច្ច
រដ្ឋាភិបាល ចំណាយប្រាក់២២លានដុល្លារ ដើម្បីដោះស្រាយបញ្ហាកម្មកររោងចក្រ ដែលថៅកែរត់ចោល
× ភ្នំពេញ៖ មកដល់ពេលនេះ រដ្ឋាភិបាលបានចំណាយថវិកាបុរេប្រទានប្រមាណ២២លានដុល្លារ ក្នុងការបើកប្រាក់ខែឲ្យកម្មកររោងចក្រ ក្រោយថៅកែបានរត់ចោល។ នេះបើតាមសម្ដេច ហ៊ុន សែន ដែលថ្លែងក្នុងពិធីជួបសំណេះសំណាលជាមួយកម្មករចំនួន ១៥៣៦៨នាក់ នៅរោងចក្រតំបន់ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ នៅព្រឹកថ្ងៃទី១៥ ខែសីហា។
ថវិកាដែលរដ្ឋាភិបាលបានផ្តល់សំណងដល់កម្មករជំនួសថៅកែរោងចក្រកន្លងមក បានផ្តល់ទៅលើករណីរោងចក្រក្ស័យធន និងករណីថៅកែរោងចក្រមួយចំនួន បានរត់ចោលកម្មករ ដោយមិនដឹងមូលហេតុច្បាស់លាស់។
សម្ដេច ហ៊ុន សែន មានប្រសាសន៍ដូច្នេះថា៖ « រដ្ឋាភិបាលនឹងធ្វើកំណែទម្រង់ថ្មី ដែលតម្រូវឲ្យថៅកែរោងចក្រចាប់ផ្តើមអនុវត្តទូទាត់ប្រាក់អត្ថប្រយោជនដល់កម្មករក្នុងរយៈពេល៦ខែម្តង ដើម្បីចៀសវាងថៅកែបិទរោងចក្រ ឬរត់ចោលកម្មករ ដែលបន្ទុកត្រូវបានធ្លាក់មកលើរដ្ឋាភិបាល ជាអ្នកចេញសង់បែបនេះ»។
តាមរយៈគោលនយោបាយដោះស្រាយបញ្ហាកម្មករនេះ រដ្ឋាភិបាល ក៏នឹងរៀបចំប្រាក់សោធនិវត្តសម្រាប់ពួកគេ នៅពេលឈប់បម្រើការងាររោងចក្រផងដែរ។ គោលនយោបាយនេះ រដ្ឋាភិបាល នឹងចាប់ផ្ដើមអនុវត្តនៅឆ្នាំ២០១៩ខាងមុខ។
© រក្សាសិទ្ធិដោយ thmeythmey.com