ជាតិ
បោះឆ្នោត
×![]()
ភ្នំពេញ៖ គ្មានឡើយ ការបែងចែកអាសនៈរដ្ឋសភា ឲ្យទៅគណបក្សដទៃអង្គុយ។ នេះជាការឆ្លើយតបរបស់គណបក្សប្រជាជន ទៅនឹងដំណឹងតៗគ្នា ពីមជ្ឈដ្ឋានទូទៅថា គណបក្សឈ្នះកៅអីទាំង១២៥នេះ នឹងចែកអាសនៈពី៤ទៅ៥ ឲ្យបក្សនយោបាយ ដែលចូលរួមបោះឆ្នោតអាណត្តិទី៦ ដើម្បីបញ្ចៀសពាក្យរិះគន់ថា «សភាឯកបក្ស»។
ទោះជារដ្ឋសភាជាតិ ក្នុងអាណត្តិទី៦ ដែលមានតែសមាជិកគណបក្សប្រជាជននេះ ក៏វាគ្មានបញ្ហាអ្វីឡើយ។ នោះក៏ព្រោះតែកៅអីទាំង១២៥ ដែលគណបក្សប្រជាជនឈ្នះនេះ កើតចេញពីការបោះឆ្នោតតាមច្បាប់ត្រឹមត្រូវ។ វាជាហេតុផលមួយ ដែលគណបក្សប្រជាជន យល់ថា សមស្រប ដើម្បីឆ្លើយតបនឹងអ្នកប្រើពាក្យរិះគន់ «សភាឯកបក្ស»។
មិនត្រឹមតែមិនខ្លាចពាក្យរិះគន់ហើយ គណបក្សដែលឈ្នះឆ្នោតភ្លូកទឹកភ្លូកដីនេះ ថែមទាំងប្រកាសថា មិនបែងចែកអាសនៈរដ្ឋសភា ឲ្យទៅគណបក្សដទៃអង្គុយនោះទេ។ ត្រង់ចំណុចនេះលោក សុខ ឥសាន បានលើកមូលហេតុមកបកស្រាយថា ឆន្ទៈរបស់រាស្ត្រដែលគាំទ្រគណបក្សខ្លួន មិនមែនជាដីសម្បទានសង្គមកិច្ច ដែលអាចចែកឲ្យទៅអ្នកផ្សេងបានឡើយ។
ថ្លែងនៅក្នុងកម្មវិធីសន្និសីទសារព័ត៌មាន បង្ហាញពី «លទ្ធផលជាផ្លូវការនៃការបោះឆ្នោត នីតិកាលទី៦ » នៅព្រឹកថ្ងៃទី១៦ សីហា អ្នកនាំពាក្យគណបក្សប្រជាជនរូបនេះ បានបន្ថែមដូច្នេះថា៖« ការបែងចែកអាសនៈដែលជាឆន្ទៈរបស់រាស្ត្រ ហាក់ដូចជាការមើលងាយដល់ការសម្រេចចិត្តរបស់ប្រជារាស្ត្រផងដែរ។ គណបក្សប្រជាជនបើកចិត្តទទួលអ្នកមានចំណេះដឹង និងសមត្ថភាពពិតប្រាកដ ដើម្បីចូលរួមអភិវឌ្ឍន៍ប្រទេសកម្ពុជា»។
កាលពីថ្មីៗនេះ ហ្វេសប៊ុករបស់សម្ដេច ហ៊ុន សែន ដែលត្រូវបានជនអនាមិក Hack បានសរសេរបង្ហោះថា គណបក្សប្រជាជន នឹងចែកកៅអីរដ្ឋសភាចំនួន២ឲ្យគណបក្សហ្វ៊ុនស៊ិនប៉ិច និងកៅអី២ទៀត ឲ្យទៅគណបក្សសម្ព័ន្ធដើម្បីប្រជាធិបតេយ្យ។ ដ្បិតហ្វេសប៊ុកប្រមុខរដ្ឋាភិបាល ត្រូវបានគេ Hack មែន តែសារបង្ហោះនេះ នៅតែដកជាប់ចិត្តមជ្ឈដ្ឋានទូទៅថា វាអាចជាសេនារីយោមួយ របស់គណបក្សប្រជាជន នាពេលអនាគត។
អត្ថបទទាក់ទង
តែយ៉ាងណាការសន្និដ្ឋាន ត្រូវបានសម្ដេច ហ៊ុន សែន ច្រានចោលព័ត៌មាននេះ។ នាយករដ្ឋមន្ត្រី ហ៊ុន សែន បានបកស្រាយថា ជនអនាមិក ដែល Hack ហ្វេសប៊ុកសម្ដេច ហើយសរសេរបង្ហោះពីការបែងចែកអាសនៈនេះ គឺមានបំណងយកបញ្ហានេះ មកវាយប្រហាររដ្ឋាភិបាលប៉ុណ្ណោះ ។ ដើម្បីឆ្លើយតបនឹងពាក្យចចាមអារ៉ាមនេះ ប្រមុខរដ្ឋាភិបាល បាននិយាយដូច្នេះថា៖«សភាបក្សតិច សង្គមពហុបក្ស»។
ក្នុងន័យនេះសម្ដេច ហ៊ុន សែន បានបញ្ជាក់ក្នុងពិធីជួបសំណេះសំណាលជាមួយកម្មករកាលពីថ្ងៃទី១៥ សីហា ថា រដ្ឋាភិបាលលោក មានបំណងបង្កើតវេទិកាពិភាក្សាជាមួយបណ្ដាភាគីគណបក្សនយោបាយ ដែលមិនជាប់ឆ្នោតទាំងនោះ ដើម្បីទទួលយកគំនិតល្អៗរបស់ពួកគេ ក្នុងការដោះស្រាយបញ្ហាពលរដ្ឋ និងប្រទេសជាតិផង ដ្បិតពួកគេមិនអាចអង្គុយនៅក្នុងរដ្ឋសភា។ បើតាមប្រមុខរដ្ឋាភិបាល ការរៀបចំវេទិកានេះ វាជាឱកាសឲ្យគណបក្សនយោបាយ ដែលមិនជាប់ឆ្នោតនេះ កសាងកិត្តិយសខ្លួន សម្រាប់ការបោះឆ្នោតនៅអាណត្តិខាងមុខទៀតផងដែរ៕
Tag:
សុខ ឥសាន
CPP
បោះឆ្នោត
© រក្សាសិទ្ធិដោយ thmeythmey.com
