អត្ថបទពាណិជ្ជកម្ម
ក្រុមហ៊ុន អ៊ីដតខូ ផ្តើមសិក្សាលទ្ធភាពសង់បង្គោលអង់តែនទូរស័ព្ទ ច្នៃពីដើមឫស្សីដំបូងគេនៅកម្ពុជា
× ក្រុមហ៊ុន អ៊ីដតខូ គ្រុប,ក្រុមហ៊ុន អ៊ីដតខូ ខេមបូឌា,វិទ្យាស្ថានបច្ចេកវិទ្យាកម្ពុជា (ITC) និងក្រុមហ៊ុនAtelier Cole បានចុះកិច្ចព្រមព្រៀងមួយ ដើម្បីសិក្សាស្រាវជ្រាវពីលទ្ធភាព នៃការប្រើប្រាស់ដើមឫស្សីដែលមាននៅក្នុងស្រុក យកមកធ្វើជាសម្ភារសម្រាប់ការសាងសង់បង្គោល អង់តែនទូរគមនាគមន៍។ ក្រោមកិច្ចព្រមព្រៀងនេះ Atelier Cole នឹងទទួលខុសត្រូវលើការ ស្ថាបនារចនាសម្ព័ន្ធបង្គោលអង់តែន ធ្វើពីដើមឫស្សីនេះ ក្រោយក្រុមហ៊ុន អ៊ីដតខូ និងITC បញ្ចប់ការសិក្សា។ ក្រុមហ៊ុន អ៊ីដតខូ មានមហិច្ឆតា បង្កើតឲ្យមានបង្គោលអង់តែន ទូរគមនាគមន៍ធ្វើពីឫស្សីដំបូងគេបង្អស់នៅកម្ពុជា ឲ្យបានរួចរាល់ជាស្រេចសម្រាប់ការប្រើប្រាស់ក្នុងគោលដៅពាណិជ្ជកម្ម នៅត្រឹមចុងឆ្នាំ២០១៨នេះ។
លោក Phillip Wong នាយកប្រចាំតំបន់ផ្នែកពង្រីកទីផ្សារ នៃក្រុមហ៊ុន edocto Group បានថ្លែងថា ក្រុមហ៊ុន អ៊ីដតខូ តែងតែធ្វើពិសោធជាមួយសមា្ភរ និងការច្នៃប្រឌិតថ្មី ដើម្បីដោះស្រាយបញ្ហាប្រឈម នៃឧស្សាហកម្មហេដ្ឋារចនាសម្ព័ន្ធទូរគមនាគមន៍។ លោក Phillip Wong បញ្ជាក់ថា៖«បង្គោលអង់តែនទូរស័ព្ទ ធ្វើពីដើមឫស្សីគឺជាការច្នៃប្រឌិតថ្មីចុងក្រោយបំផុត ដែលយើងផ្តើមគំនិតប្រើប្រាស់សម្បត្តិធម្មជាតិ ធនធានកើតឡើងវិញ ក្នុងការសាងសង់ហេដ្ឋារចនាសម្ព័ន្ធទូរគមនាគមន៍ ដើម្បីកាត់បន្ថយផលប៉ះពាល់បរិស្ថាន»។
នៅពេលដែលអង់តែននេះត្រូវបានសាងសង់ឡើងដោយប្រើប្រាស់ធនធានធម្មជាតិ ការបញ្ចេញកាបូន ក៏ត្រូវបានកាត់បន្ថយដែរ។ នេះបើតាមលោក Phillip Wong ដដែល ដោយលោកបានបន្តថា បង្គោលអង់តែនប្រភេទនេះ សង់លើកដំបូងនៅប្រទេសបង់ក្លាដែស ហើយការបញ្ចេញកាបូនទៅក្នុងបរិយាកាសត្រូវបានកាត់បន្ថយដល់ទៅជាង៧០% ឯណោះ ក្នុងមួយបង្គោលអង់តែន។ ជាមួយគ្នានេះ វាមានទម្ងន់ស្រាលជាងបង្គោលអង់តែនធ្វើអំពីដែក ដល់ទៅ៨៨% ភាពងាយស្រួលសាងសង់ និងកាត់បន្ថយទម្ងន់ផ្ទុក ទៅលើអគារទៀតផង។
វិទ្យាស្ថានបច្ចេកវិទ្យាកម្ពុជា (ITC) ជឿជាក់យ៉ាងមុតមាំថា ធនធានកកើតឡើងវិញបានដើរតួនាទីយ៉ាងសំខាន់ ក្នុងការច្នៃប្រឌិត និងបង្កើតនូវអ្វីថ្មីៗជាច្រើនទៀត។ សាស្ត្រាចារ្យ ជ្រា រ៉ាដា ព្រឹទ្ធបុរសមហាវិទ្យាល័យវិស្វកម្មសំណង់ស៊ីវិល នៃវិទ្យាស្ថានបច្ចេកវិទ្យាកម្ពុជា បញ្ជាក់ដូច្នេះ៖« យើងពិតជារីករាយដែលបានធ្វើជាដៃគូដ៏ល្អ ជាមួយក្រុមហ៊ុន អ៊ីដតខូ ចំពោះគម្រោងត្រួសត្រាយផ្លូវដែលមិនធ្លាប់មាននៅកម្ពុជានេះ។ ប្រទេសរបស់យើងសម្បូរធនធានធម្មជាតិជាច្រើន ហើយវាជាវឌ្ឍនភាពថ្មីមួយទៀតរបស់កម្ពុជា ក្នុងការប្រើប្រាស់ធនធានធម្មជាតិរបស់ខ្លួនប្រកបដោយចីរភាព ដើម្បីរួមចំណែកដល់ការអភិវឌ្ឍប្រទេសជាតិ»។
យោងតាមការសិក្សា ដើមឫស្សីមិនទាន់កែច្នៃ មានសមត្ថភាពទ្រទម្ងន់បេតុងពេលធ្វើរន្ទា និងចាក់គ្រឹះ ដែលធ្វើឱ្យវាក្លាយជាសម្ភារចាំបាច់មួយ សម្រាប់វិស័យសំណង់ទូរគមនាគមន៍។ វាអាចទប់ទល់ នឹងកម្លាំងសន្ទុះខ្យល់ បានដល់ទៅ ២១០គីឡូម៉ែត្រ ក្នុងមួយម៉ោង និងមានអាយុកាលប្រមាណ១០ឆ្នាំ បើថែទាំបានត្រឹមត្រូវ។ បង្គោលអង់តែនឫស្សី ត្រូវចំណាយពេលសាងសង់ប្រហែល១២ថ្ងៃ និងប្រើប្រាស់ថាមពលតិចដើម្បីផលិត បើធៀបនឹងបង្គោលអង់តែនធ្វើពីដែក។ សំណង់នេះ មានសមត្ថភាពដាក់អង់តែនបានរហូតដល់ទៅ៨ ដោយអនុញ្ញាតឱ្យបំពាក់នៅលើទីតាំងតែមួយបាន។
ក្រុមហ៊ុន អ៊ីដតខូ បានផ្គត់ផ្គង់បង្គោលអង់តែនទូរស័ព្ទ ច្នៃពីដើមឫស្សីដំបូងគេនៅលើពិភពលោកក្នុងទីក្រុងដាកា ប្រទេសបង់ក្លាដែស កាលពីឆ្នាំ២០១៧។ ចាប់ពីពេលនោះមក ក្រុមហ៊ុនបានដាក់ពង្រាយអង់តែនប្រភេទនេះ បានចំនួន៩ ទៀត ខណៈបង្គោលអង់តែនឫស្សី ៦ ផ្សេងទៀតកំពុងសាងសង់។ ក្រុមហ៊ុន អ៊ីដតខូ នៅតែបន្តជំរុញការប្តេជ្ញាចិត្តរបស់ខ្លួន ឲ្យកាន់តែស៊ីជម្រៅបន្ថែមទៀត ក្នុងការកាត់បន្ថយផលប៉ះពាល់បរិស្ថាន តាមរយៈការធ្វើជាដៃគូ ជាមួយក្រុមហ៊ុនក្នុងស្រុកដែលកំពុងមានការរីកចម្រើនខ្លាំង ដើម្បីនាំយកបង្គោលអង់តែនទូរស័ព្ទ ច្នៃពីដើមឫស្សីនេះ ទៅកាន់ទីផ្សារជាច្រើនទៀត ដែលក្រុមហ៊ុនកំពុងធ្វើប្រតិបត្តិការ៕
( អត្ថបទពាណិជ្ជកម្ម )
© រក្សាសិទ្ធិដោយ thmeythmey.com