កីឡាជាតិ
ជាតិ
បឹងកេត និងណាហ្គា ប្រជែងកំពូលតារាង មុនជំនួបវិសាខា-សូលទីឡូ និងភ្នំពេញក្រោន-អង្គរថាយហ្គឺរ
×![]()
ដោយ: ថ្មីៗ
ការប្រកួតបាល់ទាត់ដណ្តើមពានរង្វាន់មិត្តហ្វូនខេមបូឌានលីគឈានដល់សប្តាហ៍ទី១៨ ដោយនៅថ្ងៃសៅរ៍ ទី១៨ ខែសីហានេះ មានការប្រកួតចំនួន៣គូ។ ក្នុងនោះណាហ្គាវើលប៉ះបឹងកេតនៅម៉ោង៣រសៀលនាកីឡដ្ឋានស្តាតចាស់ មុនវិសាខាជួបសូលទីឡូអង្គរនៅម៉ោង៦ល្ងាច និងភ្នំពេញក្រោនស្វាគមន៍អង្គរថាយហ្គឺរ នៅម៉ោង៦ល្ងាចនៅកីឡដ្ឋាន RSN។
ខ្សែប្រយុទ្ធឆ្នើម ចាន់ វឌ្ឍនាកា និង Samuel Gbenga Ajayi ដែលកំពុងញាំញីដោយរបួស នឹងគ្មានវត្តមានក្នុងជំនួបរវាងបឹងកេតជាមួយណាហ្គាវើលឡើយ។ វឌ្ឍនាកា បានរងរបួសក្បាលជង្គង់ពេលប្រកួតមិត្តភាពអន្តរជាតិជាមួយក្រុមជម្រើសលីគទី៤ជប៉ុន ដែលក្រុមទាំងពីរបានបញ្ចប់ក្នុងលទ្ធផលស្មើ ២-២។ ចំណែក Gbenga រងរបួសក្បាលជង្គង់ក្នុងជំនួបជាមួយវិសាខា។
ការអវត្តមានរបស់ខ្សែប្រយុទ្ធទាំងពីរ បានបង្កើតជាក្តីកង្វល់ចំពោះលោក ហៅ សុជាតិ គ្រូបង្វឹកបឹងកេត ដែលត្រូវតទល់ជាមួយជើងខ្លាំងណាហ្គាវើល។ កង្វល់ ដោយសារការអវត្តមានរបស់ពួកគេ នឹងធ្វើឲ្យគុណភាពតំបន់ប្រយុទ្ធបឹងកេតមានការធ្លាក់ចុះ។ តែយ៉ាងណាគ្រូបង្វឹករូបនេះអះអាងថា លោកមានកីឡាករគ្រប់គ្រាន់ក្នុងការជំនួសទីតាំងរបស់កីឡាករទាំងពីរនេះ។
ទោះបីអះអាងពីការរៀបចំខ្លួនបានល្អក៏ដោយ តែលោក ហៅ សុជាតិ យល់ថា ការប៉ះណាហ្គាវើលក្នុងជើងទី២ អាចនឹងមានការលំបាកជាងជើងទី១។ គ្រូបង្វឹករូបនេះបានបង្ហាញក្តីកង្វល់យ៉ាងដូច្នេះថា៖«វាជាការពិបាកសម្រាប់យើងក្នុងការយកឈ្នះ ព្រោះណាហ្គាវើលជាក្រុមល្អនៅឆ្នាំនេះ ហើយកីឡាករទាំងខ្មែរនិងបរទេសមានបទពិសោធច្រើនក្នុងការលេង ពិសេសកីឡាករកម្ពុជាតែម្តង។ តែអ្វីៗយើងនឹងរៀបចំឲ្យបានល្អដូចជើងទី១»។
ការប្រកួតដែលរៀបចំនៅកីឡដ្ឋានស្តាតចាស់ នាម៉ោង៣រសៀលនេះ នឹងក្លាយជាជំនួបដ៏តានតឹងនិងស្វិតស្វាញបំផុត ព្រោះទាំងបឹងកេតនិងណាហ្គាវើលសុទ្ធតែទាមទារឈ្នះដូចគ្នា ដើម្បីគ្រងកំពូលតារាង។ បច្ចុប្បន្នបឹងកេតស្ថិតនៅកំពូលតារាងមាន៤២ពិន្ទុ រីឯណាហ្គាវើលស្ថិតនៅលេខ២ក្នុងតារាងមាន៤១ពិន្ទុ។ សម្រាប់ការប្រកួតជើងទី១បឹងកេតយកឈ្នះណាហ្គាវើល ៣-២ ក្រោយអាជ្ញាកណ្តាលសម្រេចឲ្យបាល់ពិន័យ១១ម៉ែត្រដល់បឹងកេតនៅចុងតង់ទី២ ដ៏ចម្រូងចម្រាស។
នៅថ្ងៃសៅរ៍នេះដែរ ក្រុមវិសាខាស្ថិតនៅលេខ៣ក្នុងតារាងមាន៣៨ពិន្ទុ ត្រូវបើកទ្វារកីឡដ្ឋានស្តាតចាស់ ស្វាគមន៍ក្រុមឈរលេខ១០ជាមួយ១៦ពិន្ទុសូលទីឡូអង្គរ។ វិសាខាត្រូវការឈ្នះក្នុងជំនួបនៅម៉ោង៦ល្ងាចនេះ ដើម្បីបង្កើនឱកាសក្នុងការប្រជែងដណ្តើមកំពូងតារាង។ ខណៈសូលទីឡូអង្គរ ក៏ត្រូវការឈ្នះដើម្បីរក្សាគម្លាតពីតំបន់កាត់ចោលផងដែរ។ កាលពីជើងទី១វិសាខាយកឈ្នះសូលទីឡូអង្គរក្នុងលទ្ធផល ២-០។
នៅម៉ោង៦ល្ងាចនេះផងដែរ ភ្នំពេញក្រោន ត្រូវបើកទ្វារកីឡដ្ឋាន RSN ស្វាគមន៍ក្រុមភ្ញៀវ ដែលទើបទម្លាក់ខ្លួនចេញពីពានរង្វាន់សម្តេច ហ៊ុន សែន អង្គរថាយហ្គឺរ។ កាលពីជើងទី១ភ្នំពេញក្រោនយកឈ្នះអង្គរថាយហ្គឺរក្នុងលទ្ធផល ៥-២។ បច្ចុប្បន្នភ្នំពេញក្រោនស្ថិតនៅលេខ៥ក្នុងតារាងមាន២៧ពិន្ទុ ខណៈអង្គរថាយហ្គឺរស្ថិតនៅលេខ៩មាន១៩ពិន្ទុ។ សម្រាប់៤ប្រកួតចុងក្រោយ អង្គរថាយហ្គឺរមានកំណត់ត្រាល្អជាងភ្នំពេញក្រោន ដោយអង្គរថាយហ្គឺរឈ្នះ២ស្មើ២ ខណៈភ្នំពេញក្រោនឈ្នះ២ចាញ់២៕
Tag:
Cambodian League 2018
© រក្សាសិទ្ធិដោយ thmeythmey.com
