អន្តរជាតិ
អាមេរិក ដាក់ទណ្ឌកម្មធ្ងន់ធ្ងរប្រឆាំងមន្ត្រីយោធាជាន់ខ្ពស់មីយ៉ាន់ម៉ាដែលពាក់ព័ន្ធការធ្វើទុក្ខបុកម្នេញជនជាតិរ៉ូហ៊ីងយ៉ា
× ខណៈដំណោះស្រាយពិតប្រាកដសម្រាប់ជនរងគ្រោះនៃវិបត្តិជនភៀសខ្លួនពីរដ្ឋ Rakhine របស់មីយ៉ាន់ម៉ាមិនទាន់មានរូបរាងនោះ រដ្ឋាភិបាលក្រុងវ៉ាស៊ីនតោនបានអនុម័តទណ្ឌកម្មថ្មីបន្ថែមប្រឆាំងកងម្លាំងជាន់ខ្ពស់មីយ៉ាន់ម៉ាមួយចំនួន។ ក្រុងវ៉ាស៊ីនតោន ធ្វើបែបនេះក្នុងគោលដៅជំរុញចំណាត់ការប្រឆាំងនឹងជនពាក់ព័ន្ធដែលបង្កឲ្យកើតមានការរំលោភបំពានសិទ្ធិមនុស្សធ្ងន់ធ្ងរក្នុងប្រទេស។
ក្រសួងរតនាគារអាមេរិក នៅថ្ងៃ១៧ សីហា បានសម្រេចដាក់ទណ្ឌប្រឆាំងនឹងយោធា និងប៉ូលិសជាន់ខ្ពស់មីយ៉ាន់ម៉ាបួនរូប និងអង្គភាពយោធាពីរផ្សេងទៀត ដោយចោទប្រកាន់ថា កងកម្លាំងសន្តិសុខមីយ៉ាន់ម៉ាត្រង់ៗពាក់ព័ន្ធការបង្កឲ្យមានវិបត្តិជនភៀសខ្លួនរ៉ូហ៊ីងយ៉ានៅក្នុងរដ្ឋ Rakhine។ អាមេរិក មើលឃើញថាវាជាអំពើព្រៃផ្សៃមួយដែលអាចជាបទល្មើសប្រល័យពូជសាសន៍ទៀតផង។
តាមសេចក្តីប្រកាសរបស់ក្រសួងរតនាអាមេរិក ទណ្ឌកម្មប្រឆាំងបុគ្គលយោធានេះ មិនរាប់បញ្ចូលមេយោធាជាន់ខ្ពស់បំផុតរបស់ប្រទេសនោះទេ ក៏ប៉ុន្តែក្រសួងបានចោទថា កងកម្លាំងសន្តិសុខមីយ៉ាន់ម៉ាជាប់ពាក់ព័ន្ធនឹងយុទ្ធនាហិង្សាប្រឆាំងនឹងសហគមន៍ជនជាតិភាគតិចតាមរយៈតាមសម្លាប់បំបាត់ពូជសាសន៍ ការរំលោភ ការសម្លាប់ក្រៅប្រព័ន្ធតុលាការ និងការបំពានសិទ្ធិមនុស្សធ្ងន់ធ្ងរតែម្តង។
តាមសេចក្តីប្រកាសដដែលនោះ ក្រសួងដាក់ទណ្ឌកម្មប្រឆាំងអង្គភាព និងមេដឹកនាំជាន់ខ្ពស់មីយ៉ាន់ម៉ាជាយុទ្ធសាស្ត្ររបស់រដ្ឋាភិបាលអាមេរិកដើម្បីជំរុញការកំណត់មុខសញ្ញាដែលត្រូវទទួលខុសត្រូវលើការ បង្កើតគ្រោះមហន្តរាយមនុស្សជាតិដ៏អាក្រក់នេះ។ មន្ត្រីជាន់ខ្ពស់ស្ថិតក្នុងបញ្ជីទណ្ឌកម្មនោះរួមមាន លោកមេបញ្ជាការ Aung Kyaw Zaw, លោក Khin Maung Soe, លោក Khin Hlaing និងមេប៉ូលិសព្រំដែន Thura San Lwin និងអង្គភាពយោធាពីរផ្សេងទៀត។
គួររម្លឹកផងដែរថា នៅថ្ងៃ២៨ សីហាខាងមុខនេះ គឺជាខួបមួយឆ្នាំការផ្ទុះឡើងនៃវិបត្តិជនភៀសខ្លួនក្នុងរដ្ឋRakhine របស់មីយ៉ាន់ម៉ាហើយ។ រយៈពេលជិតមួយឆ្នាំនេះ គេឃើញមានតែរបាយការណ៍ចោទប្រកាន់កងកម្លាំងមីយ៉ាន់ម៉ាលើវិបត្តិមនុស្សជាតិរាប់សិបម៉ឺននាក់ និងភាពអសកម្មរបស់រដ្ឋាភិបាលក្នុងការស្វែងរកដំណោះស្រាយជាបន្តបន្ទាប់ ខណៈរដ្ឋាភិបាលមីយ៉ាន់ម៉ា សុំចិត្តសហគមន៍អន្តរជាតិទុកលទ្ធភាពនិងពេលវេលាសម្រាប់ខ្លួនរកដំណោះស្រាយសមស្របនិងអាចអនុវត្តបាន៕
Tag:
អាមេរិក
មីយ៉ាន់ម៉ា
© រក្សាសិទ្ធិដោយ thmeythmey.com