ជាតិ
បោះឆ្នោត
ក្បាលម៉ាស៊ីនដឹកនាំរដ្ឋសភា និងរដ្ឋាភិបាលថ្មី ត្រូវបង្កើតឡើងក្នុងពេលតែមួយ អង្គប្រជុំរដ្ឋសភា កាលពីខែវិច្ឆិកា ឆ្នាំ២០១៥
× កាលបរិច្ឆេទនៃការប្រជុំលើកដំបូងរបស់រដ្ឋសភានីតកាលទី៦ នឹងត្រូវធ្វើឡើងនៅថ្ងៃទី៥ ខែកញ្ញា ឆ្នាំ២០១៨នេះ។ លោក សុខ ឥសាន អ្នកនាំពាក្យគណបក្សប្រជាជនកម្ពុជា ប្រាប់សារព័ត៌មានថ្មីៗថា មានរបៀបវារៈតែមួយប៉ុណ្ណោះ សម្រាប់កិច្ចប្រជុំលើកដំបូងនេះ គឺការប្រកាសសុពលភាពជូនតំណាងរាស្ត្រទាំង១២៥រូប។
បើតាមលោក សុខ ឥសាន មួយថ្ងៃបន្ទាប់មក គឺថ្ងៃទី៦ ខែកញ្ញា រដ្ឋសភា ត្រូវបើកកិច្ចប្រជុំជាលើកទីពីរ ដើម្បីរៀបចំការរចនាសម្ព័ន្ធនៃថ្នាក់ដឹកនាំរដ្ឋសភា និងរដ្ឋាភិបាល ក្នុងពេលជាមួយគ្នា។ លោក បញ្ជាក់បែបនេះថា៖«អាណត្តិហ្នឹង គេ បោះឆ្នោតជាកញ្ចប់តែម្តង»។
ថ្នាក់ដឹកនាំរដ្ឋសភា ដែលសំដៅនោះ រួមមាន ប្រធាន និងអនុប្រធានរដ្ឋសភា រួមទាំប្រធាន និងអនុប្រធានគណៈកម្មការជំនាញនានារបស់រដ្ឋសភា។ ចំណែក សមាសភាពរដ្ឋាភិបាល រួមមាន នាយករដ្ឋមន្ត្រី ឧបនាយករដ្ឋមន្ត្រី ទេសរដ្ឋមន្ត្រី និងរដ្ឋមន្ត្រី។
បញ្ជីបេក្ខជនជាថ្នាក់ដឹកនាំរដ្ឋសភា ត្រូវរៀបចំដោយគណបក្សនយោបាយ ដែលបានទទួលអាសនៈ ហើយត្រូវបញ្ជូនទៅព្រឹទ្ធសមាជិករដ្ឋសភា។ ព្រឹទ្ធសមាជិករដ្ឋសភា គឺសំដៅលើតំណាងរាស្ត្រជាប់ឆ្នោត ដែលមានអាយុច្រើនជាងគេ។
បន្ទាប់មក គណបក្ស ដែលទទួលបានអាសនៈច្រើនជាងគេក្នុងរដ្ឋសភា ត្រូវធ្វើសំណើសុំចាត់តាំងឥស្សរជនម្នាក់ ឲ្យធ្វើជាបេក្ខជននាយករដ្ឋមន្ត្រី តាមរយៈព្រឹទ្ធសមាជិករដ្ឋសភា ហើយព្រឹទ្ធសមាជិករដ្ឋសភា ត្រូវថ្វាយសំណើនេះ ទៅព្រះមហាក្សត្រ។ ក្រោយមកទៀត ទើបព្រះមហាក្សត្រ ចេញព្រះរាជក្រឹត្យ ចាត់តាំងបេក្ខជននាយករដ្ឋមន្ត្រី។
ក្រោយត្រូវបានព្រះមហាក្សត្រចាត់តាំងរួចហើយ បេក្ខជននាយករដ្ឋមន្ត្រី ត្រូវរៀបចំបញ្ជីសមាសភាពរដ្ឋាភិបាល ដើម្បីផ្ញើទៅព្រឹទ្ធសមាជិករដ្ឋសភា។ នៅពេលទទួលបានបញ្ជីបេក្ខជនជាថ្នាក់ដឹកនាំរដ្ឋសភា និងបញ្ជីសមាសភាពរដ្ឋាភិបាលរួចហើយ ព្រឹទ្ធសមាជិករដ្ឋសភា ត្រូវរៀបចំដាក់ជូនរដ្ឋសភា ដើម្បីបោះឆ្នោតផ្តល់សេចក្តីទុកចិត្តតែម្តង ដោយត្រូវការសំឡេងភាគច្រើនដាច់ខាត នៃសមាជិករដ្ឋសភាទាំងមូល។
សម្រាប់អាណត្តិទី៦នេះ បេក្ខជននាយករដ្ឋមន្ត្រី នៅតែជាសម្តេច ហ៊ុន សែន ដដែល។ ព្រះមហាក្សត្រ បានចេញព្រះរាជក្រឹត្យ ចាត់តាំងសម្តេច ហ៊ុន សែន ជានាយករដ្ឋមន្ត្រីរួចហើយ ដើម្បីរៀបចំសមាសភាពរដ្ឋាភិបាលថ្មី។
នីតិវិធីនៃការបោះឆ្នោតជាកញ្ចប់ ពោលគឺការបង្កើតក្បាលម៉ាស៊ីននៃដឹកនាំរដ្ឋសភា និងរដ្ឋាភិបាល ក្នុងពេលតែមួយបែបនេះ មានចែង និងធ្វើតាមមាត្រា៤ នៃរដ្ឋធម្មនុញ្ញបន្ថែម។
កាលពីអាណត្តិទី៥ ការបង្កើតរដ្ឋសភា និងរដ្ឋាភិបាល ក៏ធ្វើឡើងតាមរយៈការបោះឆ្នោតជាកញ្ចប់ដែរ។ ការបង្កើតរដ្ឋាភិបាលនិងរដ្ឋសភាក្នុងពេលជាមួយគ្នាបែបនេះ ត្រូវបានប្រជាពលរដ្ឋខ្មែរ ហៅជាភាសាសាមញ្ញថា «ឪនិងកូនកើតដំណាលគ្នា»។
តាមពិតទៅ ការបង្កើតរដ្ឋសភា និងរដ្ឋាភិបាល ក្នុងប្រទេសកម្ពុជា នៅមាននីតិវិធីមួយទៀត ដែលមានចែងក្នុងមាត្រា៨០ និងមាត្រា១១៩ នៃរដ្ឋធម្មនុញ្ញ។ នីតិវិធីនេះ តម្រូវឲ្យបង្កើតរដ្ឋសភា ឲ្យចប់សព្វគ្រប់ជាមុនសិន ហើយបន្ទាប់មក ទើបបង្កើតរដ្ឋាភិបាលតាមក្រោយ ដែលគេនិយាយឲ្យស្រួលស្តាប់ថា «ឪកើតមុនកូន»៕
Tag:
បោះឆ្នោត
រដ្ឋសភា
រដ្ឋាភិបាល
សុខ ឥសាន
© រក្សាសិទ្ធិដោយ thmeythmey.com