ជាតិ
នយោបាយជាតិ
លើកដំបូងនៅកម្ពុជា៖ ប្រធាននិងតំណាងបក្សនានា ទៅជួបសម្តេច ហ៊ុន សែន ដើម្បីផ្តល់យោបល់ ពីស្តាំទៅឆ្វេង៖ លោក ពេជ្រ ស្រស់ ប្រធានគណបក្សយុវជនកម្ពុជា, លោក គង់ មុនីកា ប្រធានគណបក្សឆន្ទៈខ្មែរ, លោក កែម រីទ្ធិសិត ប្រធានគណបក្សខ្មែរតែមួយ ជួបសម្តេច ហ៊ុន សែន ក្នុងវេទិកាពិគ្រោះយោបល់រវាងរដ្ឋាភិបាលនិងគណបក្សនយោបាយ នៅព្រឹកថ្ងៃទី២១ ខែសីហា ឆ្នាំ២០១៨
× នៅព្រឹកថ្ងៃទី២១ ខែសីហា ឆ្នាំ២០១៨នេះ សម្តេច ហ៊ុន សែន បានជួបប្រធាននិងតំណាង មកពីគណបក្សចំនួន១៦ ក្នុងចំណោមគណបក្សទាំង២០ ដែលបានចូលរួមប្រកួតប្រជែងក្នុងការបោះឆ្នោតនាអាណត្តិទី៦នេះ។ ជំនួបនេះ ហៅថា ជំនួបពិគ្រោះយោបល់រវាងរដ្ឋាភិបាលនិងគណបក្សនយោបាយ។
អាចចាត់ទុកថា ជាលើកទីមួយហើយ ដែលសម្តេច ហ៊ុន សែន ប្រមុខរដ្ឋាភិបាល បង្កើតវេទិកានេះឡើង ដើម្បីជួបផ្ទាល់និងផ្តល់ឱកាសឲ្យតំណាងគណបក្ស បញ្ជេញយោបល់អំពីបញ្ហាប្រទេសជាតិ។ វេទិកានេះ ត្រូវបានបង្កើតឡើង បន្ទាប់លទ្ធផលបោះឆ្នោត បង្ហាញថា មានតែគណបក្សប្រជាជនកម្ពុជាមួយគត់ ដែលបានអាសនៈក្នុងរដ្ឋសភានៅនីតិកាលទី៦ ឯគណបក្សទាំង១៩ទៀត ពុំបានអាសនៈឡើយ។
សម្តេច ហ៊ុន សែន បានប្រើឋានៈជានាយករដ្ឋមន្ត្រី ឬប្រមុខរដ្ឋាភិបាល នៅក្នុងជំនួបពិភាក្សាជាមួយតំណាងគណបក្សទាំងនោះ តែមិនមែនក្នុងនាមជាប្រធានគណបក្សប្រជាជនកម្ពុជាឡើយ។ សម្តេច សាយ ឈុំ អនុប្រធានគណបក្សប្រជាជនកម្ពុជា និងជាប្រធានព្រឹទ្ធសភា បានធ្វើជាតំណាងឲ្យគណបក្សនេះ ក្នុងការចូលរួមពិភាក្សាក្នុងវេទិកា ដែលមិនធ្លាប់មាននេះ។
ចំណែកប្រធាននិងតំណាងគណបក្សទាំង១៥ទៀត ដែលទៅចូលរួមក្នុងកម្មវិធីនេះ គឺគណបក្សខ្មែររួបរួមជាតិ គណបក្សពន្លឺថ្មី គណបក្សសញ្ជាតិកម្ពុជា គណបក្សខ្មែរក្រោក គណបក្សសំបុកឃ្មុំសង្គមប្រជាធិបតេយ្យ គណបក្សសាធារណរដ្ឋប្រជាធិបតេយ្យ គណបក្សរស្មីខេមរា គណបក្សខ្មែរសាធារណរដ្ឋ គណបក្សហ៊្វុនស៊ិនប៉ិច គណបក្សខ្មែរអភិវឌ្ឍន៍សេដ្ឋកិច្ច គណបក្សយុវជនកម្ពុជា គណបក្សធម្មាធិបតេយ្យ គណបក្សឆន្ទៈខ្មែរ គណបក្សជនជាតិដើមប្រជាធិបតេយ្យកម្ពុជា និងគណបក្សខ្មែរតែមួយ។
តំណាងគណបក្សទាំង១៦ ជួបសម្តេច ហ៊ុន សែន នៅទីស្តីការគណៈរដ្ឋមន្ត្រី
ដោយឡែក គណបក្ស៤ទៀត គឺគណបក្សសម្ព័ន្ធដើម្បីប្រជាធិបតេយ្យ គណបក្សប្រជាធិបតេយ្យមូលដ្ឋាន គណបក្សមាតុភូមិយើង និងគណបក្សខ្មែរឈប់ក្រ សម្រេចចិត្តមិនទៅចូលរួមតាមការអញ្ជើញរបស់សម្តេច ហ៊ុន សែន ឡើយ៕
Tag:
ហ៊ុន សែន
ជំនួប
តំណាងបក្ស
© រក្សាសិទ្ធិដោយ thmeythmey.com