នៅសិង្ហបុរី លោកស្រី ស៊ូជី ប្រកាសជាថ្មីពីបំណងកែរដ្ឋធម្មនុញ្ញដើម្បីបញ្ចប់ឥទ្ធិពលយោធា

អន្តរជាតិ

នៅសិង្ហបុរី លោកស្រី ស៊ូជី ប្រកាសជាថ្មីពីបំណងកែរដ្ឋធម្មនុញ្ញដើម្បីបញ្ចប់ឥទ្ធិពលយោធា

22, Aug 2018 , 12:07 pm

រូបភាព

ដោយ: សៅ ផលនិស្ស័យ (Sao Phal Niseiy)

លោកស្រីទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី បានប្រកាសជាថ្មីពីបំណងរបស់រដ្ឋាភិបាលខ្លួនក្នុងការជំរុញការកែប្រែរដ្ឋធម្មនុញ្ញដើម្បីធានាភាពជោគជ័យនៃប្រជាធិបតេយ្យូបនីយកម្ម និងការកែទម្រង់នយោបាយពេលស្ថិតនៅក្នុងដំណើរទស្សនកិច្ចនៅសិង្ហបុរី។ មេដឹកនាំមីយ៉ាន់ម៉ានេះសង្កត់ធ្ងន់ថា ការកែប្រែរដ្ឋធម្មនុញ្ញនឹងត្រូវធ្វើឡើងតាមការចរចារក្នុងស្មារតីផ្សះផ្សាជាតិផង។

ពេលផ្តល់បឋកថាសាធារណៈនៅ វិទ្យាស្ថានសិក្សាអាស៊ីអាគេ្នយ៍ (ISEAS) សិង្ហបុរីថ្ងៃ ២១ ខែសីហា លោកស្រី ស៊ូជី បានអះអាងថា ការវិសោធនកម្មរដ្ឋធម្មនុញ្ញនៅតែជារឿងអាទិភាព និងស្ថិតក្នុងគោលនយោបាយរបស់រដ្ឋាភិបាលលោកស្រីដដែរ។

លោកស្រីបាននិយាយដូច្នេះ៖«យើងនៅតែចង់កែប្រែរដ្ឋធម្មនុញ្ញ ហើយវានៅស្ថិតនៅក្នុងរបៀបវារៈរបស់រដ្ឋាភិបាលយើងដដែរ។ យើងនឹងជំរុញឲ្យមានការកែប្រែនេះទៀត»។
ការលើកឡើងជាថ្មីពីគម្រោងជំរុញការកែប្រែរដ្ឋធម្មនុញ្ញដែលបង្កើតឡើងចាប់ពីឆ្នាំ ២០០៨ ដោយក្រុមយោធា បង្ហាញពីឆន្ទៈរដ្ឋាភិបាលស៊ីវិលលោកស្រី ស៊ូជីក្នុងការជំរុញការទម្រង់នយោបាយ។ គេដឹងច្បាស់ថា រដ្ឋធម្មនុញ្ញាឆ្នាំ ២០០៨ នេះជាបញ្ហា និងឧបសគ្គចម្បងសម្រាប់ការធ្វើប្រជាធិបតេយ្យូបនីយកម្មនៅមីយ៉ាន់ម៉ា ព្រោះអំណាចទាំងស្រុងមិនអាចធ្លាក់ក្នុងកណ្តាប់ដៃរដ្ឋាភិបាលស៊ីវិលឡើយ ហើយវាក៏ឃារឃាំងលោកស្រី ស៊ូជី មិនឲ្យឡើងតំណែងជាប្រធានាធិបតីថែមទៀត។

រដ្ឋធម្មនុញ្ញដដែលនោះក៏កំណត់ថា អាសនៈសភាចំនួន ២៥ភាគរយត្រូវរក្សាទុកសម្រាប់តំណាងរាស្ត្រដែលស្នើដោយក្រុមយោធាដែលមិនឆ្លងកាត់តាមការបោះឆ្នោត។ ដូច្នេះហើយការប្រជែងក្នុងការបោះឆ្នោតគឺដណ្តើមកៅអីត្រឹម ៧៥ភាគរយប៉ុណ្ណោះ។

ក្រៅពីនេះ រដ្ឋធម្មនុញ្ញនេះក៏បានចែងផ្តល់សិទ្ធិអាទិភាពឲ្យក្រុមយោធាគ្រប់គ្រងក្រសួងសំខាន់ចំនួនបីមានដូចក្រសួងការពារជាតិ ក្រសួងការពារព្រំដែន និងកិច្ចការផ្ទៃក្នុងដែលសុទ្ធសឹងតែជាក្រសួងកាន់កាប់កងម្លាំងប្រដាប់អាវុធ។ ក្រុមនេះអាចមានសិទ្ធិចូលអន្តរាគមន៍ដណ្តើមអំណាចពីរដ្ឋាភិបាលមកគ្រប់គ្រងផង បើសិនជាមានកើតគ្រោះអាសន្នឬអសន្តិសុខកើតឡើងនោះ។

យ៉ាងណាក៏ដោយ ការកែរដ្ឋធម្មនុញ្ញនៅមីយ៉ាន់ម៉ាជារឿងលំបាកខ្លាំង។ លំបាកត្រង់ថា រដ្ឋធម្មនុញ្ញកំណត់ជាស្រេចថា ដើម្បីវិសោធនកម្មរដ្ឋធម្មនុញ្ញគឺ ត្រូវការសំឡេងគាំទ្រពីសមាជិកសភាយ៉ាងហោចណាស់ ៧៥ភាគរយ បូកជាមួយប្រជាមតិមួយទៀតក្នុងចំណោមប្រជាជនមីយ៉ាន់ម៉ាទូទាំងប្រទេសទាំងមូលផង។

ជុំវិញការលើកពីបំណងបន្តសុំកែរដ្ឋធម្មនុញ្ញនេះ លោកស្រីម្ចាស់ពានរង្វាន់ណូបែលសន្តិភាពសង្កត់ធ្ងន់ថា ការកែប្រែរដ្ឋធម្មនុញ្ញនេះត្រូវធ្វើតាមរយៈការចរចាគ្នាជាមួយក្រុមយោធា និងរក្សាដំណើរផ្សះផ្សាជាតិដដែល។

លោកស្រីបញ្ជាក់ថា៖ «យើងត្រូវបញ្ចប់តំណាងរាស្ត្រដែលឡើងកាន់តំណែងមិនឆ្លងកាត់តាមការបោះឆ្នោតប៉ុន្តែយើងត្រូវរៀបចំឡើងតាមរយៈការចរចាគ្នាហើយរក្សាទុកជំហផ្សះផ្សាជាតិជានិច្ច»។

សូមបញ្ជាក់ថា លោកស្រី ស៊ូជី ស្ថិតក្នុងដំណើរទស្សនកិច្ចការងាររយៈពេលបួនថ្ងៃនៅសិង្ហបុរីតបតាមការអញ្ជើញរបស់នាយករដ្ឋមន្ត្រីសិង្ហបុរី លី សៀនឡុង។ ក្រៅពីទស្សនកិច្ច លោកស្រីក៏ត្រូវបានអញ្ជើញឲ្យផ្តល់សុន្ទរកថានៅវិទ្យាស្ថានសិក្សាអាស៊ីអាគេ្នយ៍ ហើយក្នុងពេលនោះលោកស្រីបានផ្តោតលើបញ្ហាជាច្រើនដែលមីយ៉ាន់ម៉ាកំពុងប្រឈមក្នុងដំណាក់កាលអន្តរកាលនយោបាយទៅប្រជាធិបតេយ្យក្នុងនោះមានជម្លោះពូជសាសន៍ និងវិបត្តិរ៉ូហ៊ីងយ៉ាផង៕