ជាតិ
សម្តេច ហ៊ុន សែន ស្នើឲ្យគ្រឹះស្ថានហិរញ្ញវត្ថុ អនុញ្ញាតឲ្យពលរដ្ឋរងគ្រោះទឹកជំនន់ ពន្យារពេលសងប្រាក់
× ប្រជាពលរដ្ឋដែលរងគ្រោះទឹកជំនន់ គួរតែទទួលបានការពន្យារពេល ឬការបន្ធូរបន្ថយសងប្រាក់ ពីស្ថាប័នហិរញ្ញវត្ថុ ដែលខ្លួនបានខ្ចី។ នេះជាស្នើសុំរបស់សម្តេចនាយករដ្ឋមន្ត្រី ហ៊ុន សែន ទៅកាន់គ្រប់ស្ថាប័នហិរញ្ញវត្ថុនៅកម្ពុជា។
ថ្លែងចំពោះមុខកម្មករ-កម្មការិនីជាង១,៧ម៉ឺននាក់ នៅស្រុកកៀនស្វាយ ខេត្តកណ្តាល នាព្រឹកថ្ងៃទី២៣សីហានេះ សម្តេច ហ៊ុន សែន បានអំពាវនាវទៅស្ថាប័នហិរញ្ញវត្ថុទាំងអស់ យ៉ាងដូច្នេះថា៖«សូមពន្យារពេលក្នុងការសងប្រាក់ ឬបន្ធូរបន្ថយមិនយកការប្រាក់ក្នុងរយៈពេលណាមួយដល់អ្នករងគ្រោះទឹកជំនន់ ដើម្បីការបន្ថយការលំបាករបស់ពួកគាត់»។
ប្រមុខរដ្ឋាភិបាលកម្ពុជា បានបន្តថា ផលដំណាំរបស់ប្រជាពលរដ្ឋជាច្រើនបានខូចខាតអស់ហើយ ហើយបានធ្វើឲ្យអ្នករងគ្រោះ គ្មានលទ្ធភាពសងប្រាក់ទៅដល់ស្ថាប័នហិរញ្ញវត្ថុតាមការកំណត់បានឡើយ។ សម្តេចនាយករដ្ឋមន្ត្រី បានប្រាប់ទៅគ្រប់ស្ថាប័នហិរញ្ញវត្ថុ បែបនេះថា៖ «សូមកុំរឹបអូសទ្រព្យសម្បត្តិពួកគាត់ ផ្ទុយទៅវិញត្រូវមានការយោគយល់ អធ្យាស្រ័យដល់ពួកគាត់»។
លើសពីនេះ សម្តេច ហ៊ុន សែន បានជំរុញឲ្យធនាគារជាតិ និងក្រសួងសេដ្ឋកិច្ច ធ្វើការជាមួយស្ថាប័នហិរញ្ញវត្ថុទាំងអស់ ដើម្បីជួយប្រជាពលរដ្ឋ ដែលជួបប្រទះគ្រោះទឹកជំនន់។
ជាមួយគ្នា មេដឹកនាំកម្ពុជា ក៏សង្ឃឹមថា គណៈពង្រឹងមូលដ្ឋានទាំងអស់ នឹងបន្តធ្វើកិច្ចការនេះ នៅតំបន់រងគ្រោះ ដែលមានស្ថាប័នហិរញ្ញវត្ថុតាំងនៅទីនោះ ដើម្បីកាត់បន្ថយការលំបាករបស់ប្រជាពលរដ្ឋ៕
Tag:
ទឹកជំនន់
ហិរញ្ញវត្ថុ
© រក្សាសិទ្ធិដោយ thmeythmey.com