ក្មេងប្រុសខ្មែរ២នាក់ ត្រូវបានជនជាតិថៃ កាប់ឲ្យរងរបួសធ្ងន់ ពេលឆ្លងដែនទៅបាចត្រី

ជាតិ

សង្គមជាតិ

ក្មេងប្រុសខ្មែរ២នាក់ ត្រូវបានជនជាតិថៃ កាប់ឲ្យរងរបួសធ្ងន់ ពេលឆ្លងដែនទៅបាចត្រី

24, Aug 2018 , 2:33 pm

រូបភាព

ដោយ:

ក្មេងប្រុសជនជាតិខ្មែរ ដែលមានអាយុក្រោម ១៥ឆ្នាំចំនួន ៦នាក់ បានឆ្លងដែនទៅបាចត្រី នៅចំណុចភូមិខងផែង ឃុំតាបប្រាយ៉ា ស្រុកតាប់ប្រាយ៉ា ខេត្តស្រះកែវ ប្រទេសថៃ ត្រូវបានជនជាតិថៃ ដេញវាយ និងកាប់បណ្តាលឱ្យរងរបួសធ្ងន់ ២នាក់។ នេះបើតាមការផ្សាយរបស់គេហទំព័រអគ្គស្នងការដ្ឋាននគរបាលជាតិ នៅថ្ងៃទី២៣ ខែសីហា។

នគរបាលជាតិ បានស្រង់សម្ដីលោកវរសេនីយ៍ទោ សៅ សារឿន អធិការនគរបាលស្រុកថ្មពួក ទៅចុះផ្សាយថា ហេតុការណ៍ដែលជនជាតិថៃ ដេញវាយ និងកាប់ក្មេងប្រុសជនជាតិខ្មែរទាំង៦នាក់ ហើយរងរបួសធ្ងន់២នាក់នេះ កើតឡើងនៅម៉ោង៣រលៀស ត្រង់ចំណុចកើតហេតុខាងលើ។ លោក បានបន្តថា ក្មេងប្រុសដែលរបួសធ្ងន់ រស់នៅភូមិបន្ទាយមានឬទ្ឋិ ឃុំគោករមៀត ស្រុកថ្មពួក ខេត្តបន្ទាយមានជ័យ បានបញ្ជូនទៅមន្ទីរពេទ្យថ្មពួក ហើយបន្តទៅមន្ទីរពេទ្យបង្អែកមង្គលបូរី។ ចំណែក១នាក់ទៀត រស់នៅទីកន្លែងដូចគ្នា រងរបួសធ្ងន់បែកក្បាល ត្រូវបានម្តាយដឹកយកទៅព្យាបាលនៅពេទ្យឯកជននៅបឹងត្រួន។

នគរបាលជាតិ បានស្រង់សម្ដី លោក វរសេនីយ៍ឯកឡុង សំណាង មេបញ្ជាការនគរបាលការពារព្រំដែនគោក បានឱ្យដឹងបន្ថែមថា ក្មេងប្រុសទាំង៦នាក់ បាននាំគ្នាដើរចូលទៅត្រង់ចំណុចដើមជើងគោ ឬដើមស្តៅ១០០ ដើម្បីបាចត្រីនៅក្នុងស្រែ។ លោក ថា ទោះយ៉ាងណា ក៏ជនជាតិថៃនោះ មិនត្រូវដេញវាយ និងកាប់ក្មេងទាំងនោះឱ្យរងរបួសបែបនេះទេ។ ចំពោះករណីនេះ លោកនឹងសហការជាមួយកម្លាំងនគរបាលអធិការស្រុក និងកម្លាំងទំនាក់ទំនងព្រំដែន ហើយសហការជាមួយសមត្ថកិច្ចថៃស្រាវជ្រាវ និងស្វែងរកជនដៃដល់ ដើម្បីនាំមកសួរការប្រើអំពើហិង្សាលើក្មេងបែបនេះ៕