ជាតិ
សង្គមជាតិ
×![]()
ដោយ: សារព័ត៌មានថ្មីៗ
ក្រុមហ៊ុន ជីន ហួយ (ខេមបូឌា) គ្រោងនឹងបង្កើតរោងចក្រផលិតដំណាប់ផ្លែឈើដ៏ធំមួយកន្លែង នៅលើទឹកដីនៃខេត្ត ព្រះសីហនុ។ គម្រោងនេះ បាននិងកំពុងឆ្លងកាត់ការត្រួតពិនិត្យពីអន្ដរក្រសួង ហើយនៅក្នុងកិច្ចប្រជុំនៅថ្ងៃទី២៩ សីហាកន្លងទៅ នៅក្រសួងបរិស្ថាន គម្រោងនេះក៏មានការគាំទ្រពីបណ្ដាអន្ដរក្រសួងទាំងនោះផងដែរ។
យោងតាមការចុះផ្សាយរបស់ក្រសួងបរិស្ថាន រោងចក្រផលិតដំណាប់ផ្លែឈើរបស់ក្រុមហ៊ុនខាងលើ មានទីតាំងស្ថិតនៅភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ នៅលើផ្ទៃដីទំហំជាង ១០ម៉ឺនម៉ែត្រការ៉េ។ គម្រោងនេះបានសិក្សា និងរៀបចំរបាយការណ៍វាយតម្លៃហេតុប៉ះពាល់បរិស្ថានដោយក្រុមហ៊ុន ទីប្រឹក្សា អ៊ី & អេ ខនសាល់ធេន។
ក្រៅពីគាំទ្រនូវគម្រោងនេះហើយ អង្គប្រជុំបានណែនាំឱ្យក្រុមហ៊ុនត្រូវមានការយកចិត្តទុកខ្ពស់ក្នុងការប្រើប្រាស់សារធាតុគីមីក្នុងការរក្សាគុណភាពផលិតផល និងត្រូវគិតគូរបន្ថែមលើការរក្សាធនធានបរិស្ថាននៅក្នុងតំបន់គម្រោង និងដាំកូនឈើបន្ថែមជាដើម។ ក្នុងនោះដែរ ក្រុមហ៊ុនត្រូវរកជម្រើសផ្សេងក្រៅពីការប្រើប្រាស់អុសមកប្រើប្រាស់ជាអគ្គិសនី ឬថាមពលផ្សេងៗចំពោះឡចំហុយ។ល។
យ៉ាងណាក៏ដោយ ក្នុងកិច្ចប្រជុំនោះមិនបានបង្ហាញពីពេលវេលានៃការរៀបចំគម្រោងសង់រោងចក្រផលិតដំណាប់ផ្លែឈើនៅពេលណាឱ្យជាក់លាក់នៅឡើយ៕
© រក្សាសិទ្ធិដោយ thmeythmey.com
