ជាតិ
សង្គមជាតិ
×![]()
ដោយ: សារព័ត៌មានថ្មីៗ
សៀមរាប៖ លោក អាគីរ៉ា ដែលមហាជនស្គាល់ថា ជាវីរបុរសមីនកម្ពុជា ត្រូវបានចាប់ខ្លួនពីបទរក្សាទុកអាវុធខុសច្បាប់នៅក្នុងអង្គការរបស់លោក ស្ថិតនៅស្រុកបន្ទាយស្រី។ ការឃាត់ខ្លួននេះធ្វើឡើងជាមួយមនុស្ស២នាក់ទៀត ដែលមានតួនាទីក្នុងអង្គការសារមន្ទីគ្រាប់មីនរបស់លោក អាគីរ៉ា ដែលសមត្ថកិច្ចអះអាងថា បានបើកដំណើរការដោយខុសច្បាប់ផងដែរ។
ការឃាត់ខ្លួននេះធ្វើឡើងនៅថ្ងៃទី២៩ សីហា នៅស្នាក់ការរបស់អង្គការសារមន្ទីរមីនលោក អាគីរ៉ា ស្ថិតនៅភូមិខ្នារ ឃុំខ្នារសណ្ដាយ ស្រុកបន្ទាយស្រី ខេត្តសៀមរាប។
លោកវរសេនីយ៍ទោ ណុល រ៉ុង នាយករងការិយាល័យព្រហ្មទណ្ឌកម្រិតធ្ងន់ នៃស្នងការនគរបានខេត្តសៀមរាប បានឱ្យដឹងថា ការឃាត់ខ្លួនធ្វើឡើងបន្ទាប់ពីមានហេតុការណ៍ឆាបឆេះសារមន្ទីរមីនរបស់លោក អាគីរ៉ា ដែលបណ្ដាលមកពីផ្ទុះគ្រឿងអាវុធក្នុងនោះ។ ក្នុងប្រតិបត្តិការឃាត់ខ្លួននោះ កម្លាំងសមត្ថកិច្ចបានដកខ្លួនវត្ថុតាងមួយចំនួន រួមមាន គ្រាប់បែកដៃ៩គ្រាប់ មីន៧២A ចំនួន១៥គ្រាប់ គ្រាប់កាំភ្លើងខ្លី ដងគ្រាប់បេ១ ម្ជុលភ្លើងមីន គ្រាប់កាំភ្លើងដៃ កាំភ្លើងស្វ័យប្រវត្តិឆេះខូច សំបកគ្រាប់មីន២កេះ រួមនិងសម្ភារមួយចំនួនទៀត។ ក្រោយប្រមូលគ្រឿងផ្ទុះរួចមក មន្ដ្រីជំនាញស៊ីម៉ាក់ បានយកទៅទុកនៅទីមានសុវត្ថិភាព និងធ្វើការកម្ទេចចោល។
ស្នងការនគរបាលខេត្តសៀមរាប លោក ទិត្យ ណារ៉ុង បានឱ្យដឹងដែរថា ការឃាត់ខ្លួនមនុស្សចំនួន៣នាក់ ដែលរួមមានលោក អាគីរ៉ា ប្រធានអង្គការសារមន្ទីរគ្រាប់មីន ទី២ ឈ្មោះ អឿន យ៉ុន អាយុ៥៤ឆ្នាំ ជាអនុប្រធានអង្គការ និងទី៣ ឈ្មោះ ហ៊ាញ សុគន្ធា អាយុ៣៩ឆ្នាំ ជាប្រធានប្រតិបត្តិអង្គការ ដោយពួកគេត្រូវជាប់ចោទពីបទរក្សាទុកនូវអាវុធខុសច្បាប់ និងច្បាប់អង្គការរបស់លោក ហួសសុពលភាពរយៈពេល៤ឆ្នាំ។ បើតាមលោក ទិត្យ ណារ៉ុង ជនសង្ស័យទាំង៣ ត្រូវបានកម្លាំងនគរបាលព្រហ្មទណ្ឌកម្រិតធ្ងន់ កសាងសំណុំរឿងបញ្ជូនទៅសាលាដំបូងខេត្តហើយ នៅថ្ងៃទី៣០ សីហា ដើម្បីចាត់ការតាមផ្លូវច្បាប់៕
© រក្សាសិទ្ធិដោយ thmeythmey.com
