ក្រៅពីជួយជួសជុលប្រាសាទព្រះវិហារ ឥណ្ឌា បានផ្តល់ជំនួយលើវិស័យច្រើនទៀតដល់កម្ពុជា

ជាតិ

ក្រៅពីជួយជួសជុលប្រាសាទព្រះវិហារ ឥណ្ឌា បានផ្តល់ជំនួយលើវិស័យច្រើនទៀតដល់កម្ពុជា

31, Aug 2018 , 7:19 pm

រូបភាព

ជំនួបរវាងសម្តេច ហ៊ុន សែន និង លោកស្រី ស៊ុលម៉ា ស្វារ៉ាច នៅវិមានសន្តិភាព កាលពីថ្ងៃទី២៩ ខែសីហា ឆ្នាំ២០១៨។ រូបពីទំព័រហ្វេសបុករបស់សម្តេច ហ៊ុន សែន

ដោយ:

ភ្នំពេញ៖ ឥណ្ឌា បានចុះកិច្ចព្រមព្រៀងជាមួយកម្ពុជា ក្នុងការជួយជួសជុលប្រាសាទព្រះវិហារ និងជួយអភិវឌ្ឍលើវិស័យផ្សេងៗទៀត។ នេះបើតាមសេចក្ដីប្រកាសព័ត៌មានពីក្រសួងការបរទេសកម្ពុជា ដែលចេញផ្សាយ ក្រោយពីការបញ្ចប់ដំណើរទស្សនកិច្ចផ្លូវការរបស់លោកស្រី ស៊ុលម៉ា ស្វារ៉ាច រដ្ឋមន្ត្រីក្រសួងការបរទេស នៃសាធារណរដ្ឋឥណ្ឌា។

កម្ពុជា និងឥណ្ឌា ទទួលបានលទ្ធផលផ្លែផ្កាជាច្រើន បន្ទាប់ពីលោកស្រី ស៊ុលម៉ា ស្វារ៉ាច រដ្ឋមន្ត្រីក្រសួងការបរទេសឥណ្ឌា មកធ្វើទស្សនកិច្ចផ្លូវការ នៅកម្ពុជារយៈពេល២ថ្ងៃ គឺចាប់ពីថ្ងៃទី២៨ ដល់ថ្ងៃទី៣០ ខែសីហា ឆ្នាំ២០១៨។ ក្នុងដំណើរទស្សនកិច្ចរបស់លោកស្រី កម្ពុជានិងឥណ្ឌា បានចុះហត្ថលេខាលើឯកសារសំខាន់ៗចំនួន២។

ឯកសារសំខាន់ទី១ គឺឥណ្ឌា យល់ព្រមទទួលការអភិរក្ស និងជួយជួសជុលប្រាសាទព្រះវិហារ។ ឯកសារទី២ គឺឥណ្ឌា និងកម្ពុជា ចុះអនុស្សរណៈយោគយល់គ្នារវាងវិទ្យាស្ថានជាតិការទូត និងទំនាក់ទំនងអន្តរជាតិនៃក្រសួងការបរទេសកម្ពុជា និងវិទ្យាស្ថានកិច្ចការបរទេស នៃក្រសួងការបរទេសឥណ្ឌា។

លើសពីនេះ រដ្ឋាភិបាលឥណ្ឌា ក៏បានផ្តល់ជំនួយលើវិស័យដទៃទៀតដែរ រួមមានការអភិវឌ្ឍធនធានទឹក គម្រោងកសាងខ្សែបញ្ជូនអគ្គិសនី ការបណ្តុះបណ្តាលធនធានមនុស្ស រួមទាំងបច្ចេកវិទ្យាព័ត៌មាន និងគមនាគមន៍។ នេះបើតាមសេចក្តីប្រកាសព័ត៌មានខាងលើដដែល។

ក្រៅពីការចុះហត្ថលេខាលើឯកសារ និងការផ្តល់ជំនួយទាំងនោះ រដ្ឋមន្ត្រីក្រសួងការបរទេសនៃប្រទេសទាំង២ ក៏បានឯកភាពគ្នាពង្រឹងកិច្ចសហប្រតិបត្តិការបន្ថែមទៀតលើវិស័យពាណិជ្ជកម្ម, ការអប់រំ និងការអភិវឌ្ឍធនធានមនុស្ស, ទេសចរណ៍, វប្បធម៌, សុខាភិបាល ថាមពល និងបច្ចេកវិទ្យាព័ត៌មាន ព្រមទាំងកិច្ចសហប្រតិបត្តិការរវាងក្រសួងការពារជាតិនៃប្រទេសទាំង២ ដូចជា ការរក្សាសន្តិភាពអន្តរជាតិ និងការដោះមីន ជាដើម។

មិនតែប៉ុណ្ណោះ រដ្ឋមន្ត្រីក្រសួងការបរទេសទាំង២ ក៏ឯកភាពគ្នា និងលើកទឹកចិត្តដល់អាជ្ញាធរពាក់ព័ន្ធរៀងខ្លួន ឲ្យពន្លឿនកិច្ចព្រមព្រៀងស្ដីពីការជំរុញ និងការវិនិយោគទ្វេភាគី។ ជាពិសេសរដ្ឋមន្ត្រីទាំង២ បានគូសបញ្ជាក់ជាថ្មីអំពីសារៈសំខាន់នៃការតភ្ជាប់ផ្លូវអាកាសរវាងប្រទេសទាំង២។

ឆ្លើយតបនឹងលទ្ធផលផ្លែផ្កាខាងលើ សម្ដេចនាយករដ្ឋមន្ត្រី ហ៊ុន សែន បានអរគុណរដ្ឋាភិបាលឥណ្ឌា ដែលតែងតែជួយកម្ពុជាកន្លងមក។ ជាមួយគ្នានេះ នាយករដ្ឋមន្ត្រីកម្ពុជា ក៏បានស្វាគមន៍លើកិច្ចពិភាក្សារបស់លោកស្រី ជាមួយលោក ប្រាក់ សុខុន ស្តីអំពីការតភ្ជាប់ផ្លូវអាកាសនៃប្រទេសទាំង២ និងគម្រោងទទួលផលរហ័ស។

ប្រមុខរដ្ឋាភិបាលកម្ពុជា យល់ឃើញថា គម្រោងទទួលផលរហ័សនេះ គឺជួយដោះស្រាយដល់ប្រជាជនកម្ពុជា ជាពិសេសនៅពេលដែលកម្ពុជា កំពុងមានគ្រោះទឹកជំនន់។ គម្រោងនេះ អាចជួយ ក្នុងការស្តារអណ្តូងទឹក ការផ្តល់គ្រាប់ពូជ និងការជួសជុលសាលារៀន មន្ទីរពេទ្យ ជាដើម ដែលបានទទួលរងគ្រោះទឹកជំនន់៕