ជាតិ
តុលាការសម្រេចឃុំខ្លួន លោក អាគីរ៉ា បណ្ដោះអាសន្ន
× សៀមរាប៖ តុលាការសម្រេចឃុំខ្លួន លោក អាគីរ៉ា និងសហការី២នាក់ទៀត បណ្ដោះអាសន្ន ដើម្បីបន្តនីតិវិធីស៊ើបសួរ លើបទចោទ«ស្ដុកទុកនូវអាវុធ គ្រឿងផ្ទុះនិងគ្រាប់រំសេវ ដោយគ្មានការអនុញ្ញាត »ទៅតាមមាត្រា២៣នៃច្បាប់ស្ដីពីការគ្រប់គ្រងអាវុធ គ្រឿងផ្ទុះនិងគ្រាប់រំសេវ។ នេះបើតាព្រះរាជអាជ្ញារងនិងជាអ្នកនាំពាក្យអយ្យការអមសាលាដំបូងខេត្តសៀមរាប លោក រៀម ច័ន្ទមុន្នី ដែលបានថ្លែងប្រាប់សារព័ត៌មានថ្មីៗ។
មាត្រា២៣ នៃច្បាប់ស្ដីពីការគ្រប់គ្រងអាវុធ គ្រឿងផ្ទុះនិងគ្រាប់រំសេវ បានចែងថា «ជនណាដែលផលិត ធ្វើពាណិជ្ជកម្មនាំឆ្លងកាត់ នាំចេញ នាំចូលឬស្តុកនូវអាវុធគ្រឿងផ្ទុះ និងគ្រាប់រំសេវគ្រប់ប្រភេទដោយគ្មានការអនុញ្ញាត ត្រូវផ្តន្ទាទោសដាក់ពន្ធនាគារពី៥ឆ្នាំ ដល់១០ឆ្នាំ»។
លោក អាគីរ៉ា ដែលមហាជនស្គាល់ថា ជាវីរបុរសមីនកម្ពុជា ត្រូវបានឃាត់ខ្លួន នៅក្នុងអង្គការរបស់លោក ស្ថិតនៅស្រុកបន្ទាយស្រី ខេត្តសៀមរាប កាលពីថ្ងៃទី២៩ សីហា។ ការឃាត់ខ្លួននេះធ្វើឡើងជាមួយមនុស្ស២នាក់ទៀត ឈ្មោះ អឿន យ៉ុន ជាអនុប្រធានអង្គការ និងទី៣ ឈ្មោះ ហ៊ាញ សុគន្ធ ជាប្រធានប្រតិបត្តិអង្គការ ដោយពួកគេត្រូវជាប់ចោទពីបទរក្សាទុកនូវអាវុធខុសច្បាប់ ។
ក្នុងប្រតិបត្តិការឃាត់ខ្លួននោះ កម្លាំងសមត្ថកិច្ចបានដកហូតវត្ថុតាងមួយចំនួន រួមមាន គ្រាប់បែកដៃ៩គ្រាប់ មីន៧២A ចំនួន១៥គ្រាប់ គ្រាប់កាំភ្លើងខ្លី ដងគ្រាប់បេ១ ម្ជុលភ្លើងមីន គ្រាប់កាំភ្លើងដៃ កាំភ្លើងស្វ័យប្រវត្តិឆេះខូច សំបកគ្រាប់មីន២កេះ រួមនិងសម្ភារមួយចំនួនទៀត។ ក្រោយប្រមូលគ្រឿងផ្ទុះរួចមក មន្ដ្រីជំនាញស៊ីម៉ាក់ បានយកទៅទុកនៅទីមានសុវត្ថិភាព និងធ្វើការកម្ទេចចោល។
គួរបញ្ជាក់ថា លោក អាគីរ៉ា មានភាពល្បីល្បាញខ្លាំង ដោយធ្លាប់ជាប់ឈ្មោះក្នុងបញ្ជីវីរៈបុរសឆ្នើមរបស់ទូរទស្សន៍CNN នៅឆ្នាំ២០១០ តាមរយៈសកម្មភាពដាក់មីន និងដោះមីន ឬគ្រាប់មិនទាន់ផ្ទុះ យ៉ាងស្ទាត់ជំនាញរបស់គាត់។ តាមរយៈជំនាញនេះលោក អាគីរ៉ា ក៏បានធ្លាប់ជាប់ពានរង្វាន់កិត្តិយសពីប្រទេសកូរ៉េខាងត្បូងនៅឆ្នាំ២០១២ផងដែរ៕
Tag:
អេង ឆេងលាង
អាគីរ៉ា
អាវុធ
រំសេវ
© រក្សាសិទ្ធិដោយ thmeythmey.com