សម្តេច ហ៊ុន សែន ជួបនិងប្រគល់ថវិកាដល់ម្ចាស់ជ័យលាភី Asian Games ល្ងាចនេះ

កីឡាជាតិ

ជាតិ

សម្តេច ហ៊ុន សែន ជួបនិងប្រគល់ថវិកាដល់ម្ចាស់ជ័យលាភី Asian Games ល្ងាចនេះ

03, Sep 2018 , 12:08 pm

រូបភាព

ដោយ:

សម្តេចនាយករដ្ឋមន្ត្រី ហ៊ុន សែន ជួបសំណេះសំណាលជាមួយម្ចាស់ជ័យលាភី Asian Games នៅល្ងាចថ្ងៃទី៣ ខែកញ្ញា ឆ្នាំ២០១៨នេះ នាវិមានសន្តិភាព។ បើមិនមានការប្រែប្រួល ប្រតិភូកីឡាកម្ពុជាមកដល់អាកាសយានដ្ឋានអន្តរជាតិភ្នំពេញនៅម៉ោង៥:៣៥នាទីល្ងាច។ សម្រាប់ការប្រកួតនេះ អត្តពលិកកម្ពុជាដណ្តើមបានមេដាយមាស២ និងសំរឹទ្ធ១។

ជាការលើកទឹកចិត្តដល់អត្តពលិក និងថ្នាក់ដឹកនាំ ដែលបានសាងភាពល្បីល្បាញលើឆាកអន្តរជាតិ តាមរយៈការឈ្នះមេដាយពីព្រឹត្តិការណ៍ Asian Games នៅប្រទេសឥណ្ឌូណេស៊ី រាជរដ្ឋាភិបាលកម្ពុជា បានរៀបចំក្បួនដោយមានម៉ូតូសអមចំនួន៦គ្រឿង ដើម្បីរង់ចាំទទួលនៅអាកាសយានអន្តរជាតិភ្នំពេញ។ លើសពីនេះ ពួកគេទទួលបានការស្វាគមន៍យ៉ាងកក់ក្តៅពីសំណាក់សម្តេច នាយករដ្ឋមន្ត្រី ហ៊ុន សែន នៅវិមានសន្តិភាពថែមទៀតផង។

បើមិនមានការប្រែប្រួលជើងហោះហើរនោះទេ ប្រតិភូកីឡាកម្ពុជា មកដល់អាកាសយានដ្ឋានអន្តរជាតិនៅម៉ោង៥:៣៥នាទីល្ងាច។ នេះបើយោងតាមលោក វ៉ាត់ ចំរើន នាយបេសកកម្ម និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា។ តែយ៉ាងណា លោកអះអាងថា អាចមានការប្រែប្រួលបន្តិចបន្តួចសម្រាប់ពេលវេលានៃការមកដល់របស់ប្រតិភូកម្ពុជា។

លោកបានបន្ថែមថា ក្បួនដង្ហែចេញដំណើរពីអាកាសយានដ្ឋានអន្តរជាតិតាមមហាវិថីសហព័ន្ធរុស្ស៊ីឆ្ពោះទៅកាន់់វិមានសន្តិភាព ដើម្បីជួបសំណេះសំណាលជាមួយប្រមុខដឹកនាំរដ្ឋាភិបាលកម្ពុជា។ សម្តេច ហ៊ុន សែន នឹងប្រគល់ថវិកាលើកទឹកចិត្តដល់ម្ចាស់ជ័យលាភី គ្រូបង្វឹក និងគ្រូជំនួយ នាឱកាសនោះផងដែរ។

យោងតាមអនុក្រឹត្យរបស់រដ្ឋាភិបាលចុះកាលពីឆ្នាំ២០១៣ ជ័យលាភីមេដាយមាស ខាន់ ចេសា និង សាលី អ៊ូមើត នឹងទទួលបានប្រាក់រង្វាន់ម្នាក់ៗចំនួន៨០លានរៀល ហើយ អ៊ូមើត ទទួលបាន២៤លានរៀលបន្ថែមទៀតសម្រាប់មេដាយសំរឹទ្ធ។ គ្រូបង្វឹករបស់អត្តពលិកទាំង២ទទួលម្នាក់ៗ៨០លានរៀល រីឯគ្រូជំនួយបាន៧០ភាគរយ។

បន្ថែមលើនេះ ម្ចាស់ជ័យលាភីទាំងពីរ ក៏ទទួលបានប្រាក់ឧបត្ថម្ភផ្ទាល់ពីសម្តេច ហ៊ុន សែន ផងដែរ។ កាលពីពេលកន្លងទៅសម្តេចធ្លាប់ប្រកាសផ្តល់១ម៉ឺនដុល្លារសម្រាប់មេដាយមាស ៥ពាន់ដុល្លារមេដាយប្រាក់ និង៣ពាន់ដុល្លារមេដាយសំរឹទ្ធ។

សម្រាប់ការប្រកួតកីឡា Asian Games 2018 ដែលរៀបចំនៅទីក្រុងហ្សាការតា និងប៉ាឡាំប៉ាងប្រទេសឥណ្ឌូណេស៊ី កម្ពុជាដណ្តើមបានមេដាយមាស២ និងសំរឹទ្ធ១។ កីឡាការិនី ខាន់ ចេសា ដណ្តើមបានមេដាយមាសលើវិញ្ញាសា Newaza នៃកីឡាជឺជីតស៊ូ រីឯមេដាយមាស សាលី អ៊ូមើត ដណ្តើមបានលើកីឡាម៉ូតូទឹកលើវិញ្ញាសា Ski Modified និងមេដាយសំរឹទ្ធរបស់គេ ទទួលបានលើវិញ្ញាសា Runabout 1100 Stock៕