ជាតិ
សង្គមជាតិ
ក្រសួងសុខាភិបាល សម្រេចលុបបញ្ជិកាវ៉ាក់សាំងការពារជំងឺឆ្កែឆ្គួត ដែលនាំចូលពីចិន ឈ្មោះRabies Vaccine ប្រភព៖ ហ្វេសប៊ុកគណៈឱសថការីកម្ពុជា
× ភ្នំពេញ៖ ក្រសួងសុខាភិបាល បានសម្រេចលុបបញ្ជិកាវ៉ាក់សាំងការពារជំងឺឆ្កែឆ្គួតលើមនុស្ស មួយប្រភេទឈ្មោះ Rabies Vaccine ដែលផលិតដោយគ្រឹះស្ថានផលិតឱសថ Changchun Changsheng Life Sciences Ltd., នៃប្រទេសចិន ។ ក្រសួងប្រាប់ឲ្យក្រុមហ៊ុននេះ ប្រមូលវ៉ាក់សាំងប្រភេទនេះ ពីទីផ្សារនៅកម្ពុជាវិញជាបន្ទាន់។
រដ្ឋលេខាធិការក្រសួងសុខភិបាលលោក ជូ យិនស៊ីម បានបញ្ជាក់ថា ឱសថ Rabies Vaccineនេះ (Purified Rabies Vaccine,.2.5IU) មានគុណភាពក្រោមកម្រិតស្ដង់ដារ ដែលមិនអាចយកប្រើប្រាស់បានឡើយ ។រដ្ឋលេខាធិការនៃក្រសួងសុខាភិបាលដដែលនេះ បានបញ្ជាក់ដូច្នេះថា ៖«ការសម្រេចលុបបញ្ជីឱសថដែលបានលើកឡើងខាងលើ ក្នុងគោលបំណងដើម្បីធានាគុណភាព សុវត្ថិភាព និងប្រសិទ្ធិភាព ជូនដល់អ្នកប្រើប្រាស់ ហើយការសម្រេចលុបនេះ ចាប់ពីថ្ងៃជូនដំណឹងនេះទៅ»។
ចំពោះក្រុមហ៊ុន និងគ្រឹះស្ថានផលិតឱសថ ដែលពាក់ព័ន្ធត្រូវប្រមូលឱសថ Rabies Vaccine ចេញពីឱសថស្ថាន ឱសថស្ថានរង និងសេវាសុខាភិបាលឯកជនទាំងអស់ បើពុំនោះទេក្រសួងនឹងចាត់វិធានការតាមផ្លូវច្បាប់។ នេះបើតាមលោក ជូ យិនស៊ីម។
បើតាមរដ្ឋលេខាធិការរូបនេះ ឱសថប្រភេទនេះ បានផលិតដោយគ្រឹះស្ថានផលិតឱសថ Changchun Changsheng Life Sciences Ltd., China ដែលនាំចូលដោយក្រុមហ៊ុន K-Man Pharma Co., Ltd។ក្រុមហ៊ុននេះ បានចុះបញ្ជិកាវ៉ាក់សាំងប្រភេទនេះ កាលពីថ្ងៃទី១១ ខែមេសា ឆ្នាំ២០១៦ ៕
© រក្សាសិទ្ធិដោយ thmeythmey.com