អន្តរជាតិ
តំណាងរដ្ឋាភិបាល, NGO និងវិស័យឯកជន មកស្វែងយល់ពីវិទ្យាស្ថានស្រាវជ្រាវបរិស្ថាន Sakaerat នៅ ថៃ
តំណាងរដ្ឋាភិបាល, NGO និងវិស័យឯកជន មកស្វែងយល់ពីវិទ្យាស្ថានស្រាវជ្រាវបរិស្ថាន Sakaerat នៅ ថៃ
×![]()
ណាខនរាជសីមា,ថៃ៖ តំណាងរដ្ឋាភិបាល, NGO និងវិស័យឯកជន បានចំណាយពេលមកស្វែងយល់ពីវិទ្យាស្ថានស្រាវជ្រាវបរិស្ថាន Sakaerat នៅប្រទេសថៃ ដែលជាតំបន់ឋបនីជីវចម្រុះ។ វិទ្យាស្ថាន Sakaerat នេះ ធ្វើការផ្ដោតលើការស្រាវជ្រាវពីវិទ្យាសាស្ត្រ និងបរិស្ថាន តាមរយៈការចូលរួមការពារ និងអភិរក្សធនធានធម្មជាតិ, ព្រៃឈើ រួមទាំងសត្វព្រៃ។ 
ក្នុងដំណើរទស្សនកិច្ចស្ដីពីអភិបាលកិច្ចដីធ្លី និងធនធានធម្មជាតិ ក្នុងបរិបទនៃការទទួលខុសត្រូវផ្នែកសង្គមរបស់ក្រុមហ៊ុនសាជីវកម្ម (CSR) និងការអភិវឌ្ឍន៍ប្រកបដោយនិរន្តរភាព (SDG) នៅខេត្តណាខនរាជសីមា គណៈប្រតិភូកម្ពុជា បានធ្វើដំណើរទៅកាន់ទីតាំងជាច្រើន ដែលនិយាយពីបញ្ហាដីធ្លី និងធនធានធម្មជាតិ។ ក្នុងដំណើរទស្សនកិច្ចនេះ មានសហការពីភាគីថៃ ជាពិសេសតំណាងសមាជិកសភានៅក្នុងស្រុកវ៉ាងណាមខៀវ លោក Chun Sirichaikireekosol ដែលលោកបានអញ្ជើញចូលរួមក្នុងកម្មវិធី និងដឹកនាំដំណើរទៅកាន់ទីតាំងនីមួយៗផងដែរ។
ក្រៅពីចុះដល់ទីតាំងមានបញ្ហាដីធ្លីរួចមក នាថ្ងៃទី៦ កញ្ញានេះ ភាគីថៃ បាននាំតំណាងគណៈប្រតិភូកម្ពុជាទៅទស្សនា និងស្វែងយល់ពីវិទ្យាស្ថានស្រាវជ្រាវបរិស្ថាន Sakaerat នៅស្រុកវ៉ាងណាមខៀវ ខេត្តណាខនរាជសីមា។ លោក Surachit Waengsothorn នាយកវិទ្យាស្ថានស្រាវជ្រាវបរិស្ថាន Sakaerat បានលើកឡើងថាវិទ្យាស្ថាននេះ ត្រូវបានបង្កើតក្នុងឆ្នាំ ១៩៦៧ ដែលបង្កើតឡើងដោយរដ្ឋាភិបាលថៃ ក្នុងការអភិរក្សប្រព័ន្ធអេកូឡូស៊ី និងការពារបរិស្ថាន ដែលជាសារៈសំខាន់។ ជាមួយគ្នានេះ តំបន់ក្នុងវិទ្យាស្ថាននេះ ជាតំបន់ដែលទទួលស្គាល់ដោយយូណេស្កូនៅឆ្នាំ២០០០ផងដែរ។
នាយកវិទ្យាស្ថានរូបនេះ បានអះអាងថា នាថ្ងៃអនាគតកម្ពុជា និងថៃ នឹងបង្កើតឋបនីជីវចម្រុះទ្វេភាគី ដើម្បីសិក្សាពីគ្នាទៅវិញទៅមក។ ក្នុងវិទ្យាស្ថាននេះ ដែលជាតំបន់ព្រៃនេះ ត្រូវបានអង្គការយូណេស្កូ បែងចែកជា៣ តំបន់ គឺ បេតិកភណ្ឌធម្មជាតិ និងវប្បធម៌, តំបន់ឋបនីជីវចម្រុះបម្រុង និងតំបន់ភូគុម្ពសាស្ត្រ។
លោក សោ សុន្ទរ៍ធារី ប្រធានក្រុមហ៊ុនកសិកម្ម កូសាប
លោក សោ សុន្ទរ៍ធារី ប្រធានក្រុមហ៊ុនកសិកម្ម កូសាប
ក្រោយពីស្ដាប់បទបង្ហាញរបស់ភាគីថៃ និងការនាំទៅទស្សនាតំបន់ការពារព្រៃឈើរួចមក ភាគីកម្ពុជា បានចាប់អារម្មណ៍ទៅនឹងគោលគំនិតនៃការបង្កើតវិទ្យាស្ថាននេះ រួមទាំងចង់ឃើញកម្ពុជាមានវិទ្យាស្ថានបែបនេះផងដែរ។ លោក សោ សុន្ទរ៍ធារី ប្រធានក្រុមហ៊ុនកសិកម្ម កូសាប ដែលបានចូលរួមក្នុងដំណើរទស្សនកិច្ចនេះ បានលើកឡើងថា៖ «ខ្ញុំមានការចាប់អារម្មណ៍យ៉ាងខ្លាំងចំពោះវិទ្យាស្ថាននេះ ដែលគេបង្រៀនមនុស្សទូទៅ ទាំងសិស្ស និស្សិត និងប្រជាពលរដ្ឋឲ្យបានយល់ដឹងពីបរិស្ថាន។ ហើយខ្ញុំយល់ថាវិទ្យាស្ថាននេះ មានសារៈសំខាន់ខ្លាំងណាស់ ដែលមនុស្សត្រូវការធម្មជាតិ ធម្មជាតិក៏ត្រូវការមនុស្សដែរ»។
នាយកវិទ្យាស្ថាន
នាយកវិទ្យាស្ថាន
ប្រធានក្រុមហ៊ុនរូប បញ្ជាក់ទៀតថា ដើម្បីឲ្យប្រទេសកម្ពុជា មានការអភិរក្ស និងអភិវឌ្ឍប្រកបដោយចីរភាព កម្ពុជាគួរតែមានវិទ្យាស្ថានបែបនេះ សម្រាប់ឲ្យមនុស្សជំនាន់ក្រោយបណ្ដុះគំនិតស្រឡាញ់បរិស្ថាន។ លោកបន្តទៀតថា មានចំណុចល្អជាច្រើនដែលកម្ពុជាត្រូវរៀនប្រទេសថៃ និងមានចំណុចខ្លះថៃក៏ត្រូវរៀនពីកម្ពុជាផងដែរ។
សូមបញ្ជាក់ថា នេះជាដំណើរទស្សនកិច្ច ដែលរៀបចំដោយអង្គការវេទិកាមិនមែនរដ្ឋាភិបាលស្ដីពីកម្ពុជា ហៅកាត់ថា NGO Forum។ ដំណើរទស្សនកិច្ចនេះ មានរយៈពេល ៦ថ្ងៃ ដែលធ្វើដំណើរទៅស្វែងយល់ពីបញ្ហាដីធ្លី និងការអភិរក្សធនធានធម្មជាតិ ក្នុងខេត្តណាខនរាជសីមា នៃព្រះរាជាណាចក្រថៃ៕
Tag:
បរិស្ថាន
ថៃ
ណាខនរាជសីមា
រដ្ឋាភិបាល
NGO
វិស័យឯកជន
© រក្សាសិទ្ធិដោយ thmeythmey.com
