ក្រសួងអប់រំ រៀបចំប្រកួតតែងនិពន្ធ និងស្មូតកំណាព្យ សម្រាប់អបអរទិវាគ្រូបង្រៀន

ជាតិ

បាក់ឌុប

ក្រសួងអប់រំ រៀបចំប្រកួតតែងនិពន្ធ និងស្មូតកំណាព្យ សម្រាប់អបអរទិវាគ្រូបង្រៀន

08, Sep 2018 , 7:39 pm

រូបភាព

ដោយ: ថ្មីៗ

ភ្នំពេញ៖ដើម្បីអបអរសាទរទិវាគ្រូបង្រៀននៅថ្ងៃទី០៥ ខែតុលា ខាងមុខនេះ ក្រសូងអប់រំ យុវជន និងកីឡា រៀបចំប្រកូតប្រជែងតែងនិពន្ធ និងស្មូតកំណាព្យ ក្រោមប្រធានបទ «គុណភាពគ្រូបង្រៀន ជាគុណភាពមូលធនមនុស្សសម្រាប់ការអភិវឌ្ឍដោយចិរភាព»។

គោលបំណងនៃការបង្កើតការប្រកួតនេះ ដើម្បីលើកទឹកចិត្តដល់គ្រូបង្រៀន ឲ្យប្រកបដោយគុណភាពអប់រំខ្ពស់។ ក្រសួងអប់រំ រៀបចំកម្មវិធីនេះជាលើកទីមួយ សម្រាប់ឲ្យលោកគ្រូ អ្នកគ្រូ និងបុគ្គលផ្សេងទៀតដែលមានជំនាញខាងតែងនិពន្ធ និងស្មូតកំណាព្យ អាចបង្ហាញស្នាដៃ និងភាពប៉ិនប្រសព្វរបស់ខ្លួនផងដែរ។

សម្រាប់លក្ខខណ្ឌក្នុងការប្រកួតនេះ បេក្ខជនត្រូវតែងនិពន្ធដោយយោងតាមសៀវភៅកំណាព្យខ្មែររបស់ក្រសួងអប់រំ និងឯកសារផ្លូវការរបស់ក្រសួងវប្បធម៌ និងវិចិត្រសិល្បៈ ដើម្បីធ្វើជាមូលដ្ឋានក្នុងការតែងនិពន្ធកំណាព្យ។ ចំណែកអក្ខរាវិរុទ្ធ ត្រូវអនុវត្តតាមវចនានុក្រមសម្តេចព្រះសង្ឃរាជ ជួន ណាត។

ចំពោះការប្រឡងតែងនិពន្ធ និងស្មូតកំណាព្យ នឹងប្រព្រឹត្តឡើងនៅថ្ងៃទី០៣ ដល់ថ្ងៃទី០៥ ខែតុលា ហើយការប្រឡង ត្រូវធ្វើឡើងទៅតាមប្រធានបទដែលគណៈកម្មការវាយតម្លៃ និងដាក់ពិន្ទុបានកំណត់។ ការប្រកាសលទ្ធផល នឹងធ្វើឡើងនៅទិវាគ្រូបង្រៀន នៅថ្ងៃទី០៥ ខែតុលា ឆ្នាំ២០១៨ នៅវិទ្យាស្ថានជាតិអប់រំ៕