ជាតិ
បទយកការណ៍ / បទសម្ភាសន៍
២៥ខេត្ត/រាជធានី
របរលក់ខ្យង កាក់កបសម្រាប់អ្នកលក់បន្តនៅស្រុកកៀនស្វាយ
× កណ្ដាល៖ មុខរបរលក់ខ្យងនៅតាមបណ្ដោយផ្លូវជាតិលេខ១ របស់អ្នកភូមិព្រៃត្រែង ស្ថិតក្នុងស្រុកកៀនស្វាយ អាចរកចំណូលបានចន្លោះពី៤ម៉ឺនទៅ១០ម៉ឺនរៀល អាស្រ័យតាមថ្ងៃឈប់សម្រាកដែលមានអ្នកដំណើរច្រើន។
ដើម្បីបានជ្រាបច្បាស់សូមអញ្ជើញស្ដាប់បទយកការណ៍ដែលរៀបរៀងដោយកញ្ញា ប៉ូ សាគុន ដូចតទៅ៖
បើគេធ្វើដំណើរពីភ្នំពេញតាមផ្លូវជាតិលេខ១ ឆ្ពោះទៅខេត្តកណ្ដាល ប្រមាណជាង៤០គីឡូម៉ែត្រ ទៅដល់ស្រុកកៀនស្វាយ នោះគេនឹងឃើញមានរោងតូចៗលក់ខ្យងជាច្រើន នៅអមសងខាងផ្លូវ ដោយខ្លះគ្រាន់តែដាក់ឆត្រប្រភេទធំ១ទៅ២ ដើម្បីបាំងកម្ដៅថ្ងៃក៏អាចលក់បាន។ នៅទីនេះគឺភូមិព្រៃក្រែង ឃុំសំរោងធំ ស្រុកកៀនស្វាយ ខេត្តកណ្ដាល។ អ្នកភូមិនៅទីនេះ ចាប់យករបរលក់ខ្យង ជារបរបន្ទាប់បន្សំដើម្បីរកចំណូលបន្ថែម។
គ្រាន់តែឃើញអ្នកដំណើរជិះម៉ូតូ ឬ ជិះឡានពីចម្ងាយ អ្នកស្រី តេង ហីម បក់ដៃហៅភ្ញៀវឱ្យចូលទិញខ្យងរបស់ខ្លួនតាំងពីចម្ងាយម្ល៉េះ។ ម៉ោងទើបតែ៦ព្រឹកអ្នកស្រី ហីម អាយុ ៦០ឆ្នាំ បានរៀបចំខ្យងដាក់លក់រួចជាស្រេច។ នៅក្នុងរោងដែលមានទំហំប្រមាណ២ម៉ែត្រ គ្រែរនាបក្ដារ ដែលរៀបថ្លាងមានខ្យងពេញដាក់តម្រៀបគ្នាយ៉ាងមានរបៀប ដោយដាក់តាមទំហំខ្យងជារោងរបស់អ្នកស្រី តេង ហីម។ អ្នកលក់ខ្យងរូបនេះថា ខ្យងដែលអ្នកស្រីលក់រាល់ថ្ងៃ គឺទិញពីឡានដែលដឹកពីខេត្តកំពង់ឆ្នាំង មកចែកចាយឱ្យនៅពេលព្រឹកម៉ោង៥ភ្លឺ។ អ្នកលក់រូបនេះមិនបានដឹងច្បាស់ថាខ្យងដែលខ្លួនលក់រាល់ថ្ងៃជាខ្យងចិញ្ចឹម ឬខ្យងបឹងឡើយ គ្រាន់តែដឹងតាមឈ្មួញប្រាប់ថានៅខែទឹកឡើង ខ្យងនឹងហូរតាមទឹកចូលទៅក្នុងអណ្ដូងធំមួយ។ ក្នុងមួយថ្ងៃអ្នកស្រី ហីម ទិញខ្យងមកលក់បន្តពី៥០គីឡូទៅ១០០គីឡូក្រាម អាស្រ័យតាមថ្ងៃ ឈប់សម្រាកឬថ្ងៃធម្មតា។ ក្នុងមួយគីឡូក្រាមថ្លៃ២២០០រៀល តម្លៃទិញពីឈ្មួញតាមឡាន ហើយអ្នកស្រី ហីម អាចលក់ចេញវិញបាន៣០០០ទៅ៣៥០០រៀលក្នុងមួយគីឡូក្រាម។ អតិថិជនរបស់អ្នកស្រី ហីម គឺជាអ្នកធ្វើដំណើរតាមផ្លូវជាតិលេខ១នេះតែម្ដង។ អ្នកស្រីអាចលក់ដាច់បានច្រើននៅថ្ងៃសៅរ៍និងថ្ងៃអាទិត្យ ព្រោះមានអ្នកដំណើរទៅស្រុកកំណើតច្រើន។
ស្ត្រីដែលមានកូនធ្វើការរោងចក្ររូបនេះបញ្ជាក់ថា ខ្លួនប្រកបរបរនេះតែខែវស្សាតែប៉ុណ្ណោះព្រោះវាសម្បូរខ្យង ហើយតម្លៃធូរថ្លៃផង ដែលអាចឱ្យអ្នកដំណើរទិញបាន។ ភ្នែកមើលទៅខ្យងបណ្ដើរ រេទៅមើលអ្នកធ្វើដំណើរតាមម៉ូតូឡានជារឿយៗបណ្ដើរ អ្នកស្រី តេង ហីម លើកឡើងថា មុខរបរលក់ខ្យងនេះមិនសូវជាហត់ប៉ុន្មានទេ ព្រោះគ្រាន់តែអង្គុយលក់។ ក្នុងមួយថ្ងៃស្ត្រីវ័យ៦០ឆ្នាំរូបនេះ អាចរកចំណូលបានជាមធ្យម៤ម៉ឺនរៀល ដែលអាចជួយសម្រួលជីវភាពគ្រួសារ ក្រៅពីប្រាក់ខែដែលកូនបានពីរោងចក្រ។ «អាងគេធំខែទឹកវាហូរចូលទៅ គេថាៗតាមគេដែរទៅ។ លក់តែខែនេះទេ ដល់ទៅខែគោកលក់មិនបានទេថ្លៃណាស់។ ខែមិនលក់បានលុយកូនធ្វើរោងចក្រ»។ នេះជាការបញ្ចាក់របស់អ្នក តេង ហីម។
អ្នកលក់ខ្យងមួយរូបទៀតគឺកញ្ញា ថង់ មួយគា វ័យ២២ឆ្នាំ។ ឈប់ធ្វើការពីភ្នំពេញខាងផ្ដិតរូបថត មកស្រុកកំណើតវិញ ដោយចាប់របរលក់ខ្យង មួយគា ថាមុខរបរនេះអាចឱ្យនាងរកចំណូលបានច្រើនជាងការងារនៅទីក្រុង។ មិនខុសពីអ្នកលក់ដទៃទៀតឡើយ មួយគា អាចលក់ខ្យងបានច្រើននៅថ្ងៃសៅរ៍ អាទិត្យ និងថ្ងៃចន្ទ ព្រោះមានអ្នកដំណើរចុះឡើងច្រើន។ បើជាថ្ងៃបុណ្យ ឬ ថ្ងៃឈប់សម្រាកធំៗដែលរដ្ឋតម្រូវឱ្យឈប់ មួយគា អាចលក់ខ្យងបានរាប់រយគឺឡូក្រាមក្នុងមួយថ្ងៃ។ ការលក់មិនមែនចេះតែដាច់រាល់ថ្ងៃនោះទេ មានថ្ងៃខ្លះក៏លក់មិនសូវដាច់ដែរ តែទោះជាយ៉ាងណាក៏ដោយ មួយគា នៅតែអាចលក់ចំណេញបាន៤ម៉ឺនរៀលដែរក្នុងមួយថ្ងៃ។
ឡានដែលចែកចាយខ្យងបន្តនៅតាមផ្លូវជាតិលេខ១នេះ មានមកពីខេត្តផ្សេងៗគ្នា ដូចជាខេត្តកំពង់ធំ កំពង់ឆ្នាំង និងខេត្តកំពង់ស្ពឺ ហើយតម្លៃចែកចាយបន្តក៏ខុសគ្នាដែរ នេះបើតាមកញ្ញា មួយគា បញ្ជាក់។ តម្លៃប្រមាណតែជិត២ពាន់រៀល មួយគា អាចលក់ចេញវិញបានថ្លៃ៤ ០០០រៀល ទៅ៤៥០០រៀលក្នុងមួយគីឡូក្រាម។ កញ្ញា ថង់ មួយគា បញ្ជាក់៖«ថ្ងៃអាទិត្យឬចន្ទគាត់ឡើងចុះច្រើនចឹងលក់បាន។ មួយថ្ងៃបាន៥០គីឡូអីហ្នឹង តែបើថ្ងៃបុណ្យ បើគេផ្គត់ផ្គង់ឱ្យគ្រាន់៣ទៅ៤រយគីឡូក៏លក់អស់ដែរ»។ ពីមុនធ្វើការនៅភ្នំពេញ តែមករកនៅទីនេះរកបានជាង»។
ចំណែកអ្នកនាង អ៊ូ សុភាព ប្រកបរបរលក់ខ្យងរយៈពេល៥ឆ្នាំមកហើយនោះ បាននិយាយថា របរនេះអាចរកចំណូលបានច្រើនគួរសម ដែលអាចឱ្យអ្នកនាងទូទាត់ការចំណាយប្រចាំថ្ងៃ និងយកទៅសងបំណុលគេបានខ្លះផងដែរ។ នារីសម្បុរស សើចស្រស់វ័យ៣៣ឆ្នាំរូបនេះ ថារបរនេះហត់នៅពេលព្រឹក ព្រោះត្រូវលាងសម្អាត និងរើសខ្យងដែលបែកចោល។ ខ្យងដែលអ្នកនាង សុភាព លក់មាន២ប្រភេទ គឺខ្យងធម្មតា និងខ្យងគូទទាលដែលមានក្រមួន។ ខ្យងធម្មតាតម្លៃ៤៥០០រៀល ចំណែកខ្យងគូទទាលវិញលក់បាន៥០០០រៀលក្នុងមួយគីឡូក្រាម។ ត្រូវជួលមនុស្សឱ្យជួយលក់សម្រាប់២កន្លែង ជាមធ្យមក្នុងមួយថ្ងៃអ្នកនាង សុភាព អាចលក់ខ្យងបានប្រមាណ១០០គឺឡូក្រាម ដែលគិតជាប្រាក់បានប្រមាណ១០ម៉ឺនរៀល៕ អ៊ូ សុភាព បញ្ជាក់៖«រកបួនប្រាំឆ្នាំហើយ បានម៉ារស់ ជំពាក់គេអាចរកដោះគេបានដែរ។ អ្នកមិនដឹងតម្លៃគេតដែរ គេថាគ្រាន់តែខ្យងក៏លក់ថ្លៃដែរ តែពេលខ្លះមានលុយទិញគេហើយក៏ពិបាកដែរណា យកមកពេលព្រឹកត្រូវលាងវាហើយ នៅរើសអាស្អុយនិងបែកចេញទៀត។ គេកាត់អាខូចឱ្យដែរ តែឈ្មួញខ្លះពិបាក ឈប់យកដែរហ្នឹង»៕
Tag:
ខ្យង
សេដ្ឋកិច្ច
កៀនស្វាយ
© រក្សាសិទ្ធិដោយ thmeythmey.com