កីឡាជាតិ
ជាតិ
មិត្តភាពអន្តរជាតិ៖ កម្ពុជាចាញ់ម៉ាឡេស៊ី ៣-១
× ក្រុមកីឡាបាល់ទាត់ជម្រើសជាតិកម្ពុជា ក្រោមការដឹកនាំរបស់លោក Keisuke Honda ចាញ់ម៉ាឡេស៊ី ៣-១ នាជំនួបមិត្តភាពអន្តរជាតិនៅពហុកីឡដ្ឋានជាតិ នាល្ងាចថ្ងៃចន្ទ ទី១០ ខែកញ្ញា នេះ។
ការប្រកួតដំណើរការបានត្រឹម៣នាទីប៉ុណ្ណោះ ប៊ិន ចន្ថាធារី បានស៊ុតបាល់ពិន័យពីចម្ងាយ ហើរទៅប៉ះនឹងរបាទីរបស់ម៉ាឡេស៊ី បន្ទាប់មក កែវ សុខផេង មានឱកាសល្អមួយទៀត ប៉ុន្តែអ្នកចាំទីរារាំង។ ឈានដល់នាទី១៨ កម្ពុជា វាយលុកទៅលើតំបន់គ្រោះថ្នាក់របស់ក្រុមភ្ញៀវ ហើយ កែវ សុខផេង បានតែតបាល់ទៅឲ្យ សឿយ វិសាល ស៊ុតបាល់បញ្ចូលទីនាំមុខ១គ្រាប់។
នៅតង់ទីពីរ កម្ពុជាមានឱកាសមាសនៅនាទី៥០ ក្រោយ កែវ សុខផេង បញ្ជូនទៅឲ្យ គួច សុគម្ភៈ ប៉ុន្តែប្រធានក្រុមរូបនេះស៊ុតខុសគោលដៅ ដោយសារតែខ្លួនអស់ជំហរ។ នៅនាទី៥៧ អ្នកចាំទីម៉ាឡេស៊ី បានរារាំងការស៊ុតយ៉ាងល្អរបស់ រ៉ឹង ប៊ុនហៀង។
នៅនាទី៦១ និង៧៤ ម៉ាឡេស៊ី បានស៊ុតបាល់បញ្ចូលទីជាបន្តបន្ទាប់ដើម្បីនាំមុខម្ចាស់ផ្ទះ ២-១ វិញ។ ឈានដល់នាទីបន្ថែម ក្រុមភ្ញៀវបន្ថែមបានមួយគ្រាប់ទៀតដើម្បីបញ្ចប់ជាមួយនឹងជ័យជម្នះ ៣-១។
ក្នុងការប្រកួតនេះ អ្នកចាំទីម៉ាឡេស៊ី Khairul Fahmi Che Mat បានបំពេញតួនាទីយ៉ាងល្អក្នុងការរារាំងឱកាសរកគ្រាប់បាល់របស់ម្ចាស់ផ្ទះ។
ជម្រើស១១នាក់ដំបូងរបស់កម្ពុជា៖ រ៉ឹង ប៊ុនហៀង, ស៊ិន កក្កដា (ប្រាក់ ធីវ៉ា ៦២), សុះ ស៊ូហាណា (ទិត្យ ឌីណា ៦២), កែវ សុខផេង, ប៊ិន ចន្ថាធារី, គួច សុគម្ភៈ (ប្រធានក្រុម), ឆេង ម៉េង (សាត រ៉ស៊ីប ៧៨), សឿយ វិសាល, ហុង ផេង (អ៊ិន សូដាវីដ), ឈិន ឈឿន (នេន សុធារដ្ឋ ៧៨), ស៊ូ យ៉ាទី។
Tag:
ជម្រើសជាតិ
Keisuke Honda
© រក្សាសិទ្ធិដោយ thmeythmey.com