ពីនេះ ពីនោះ
ព័ត៍មានសុខភាព
×![]()
ដោយ: ថ្មីៗ
ការអស់កម្លាំង ឈឺសន្លាក់ ពុកឆ្អឹង ប្រព័ន្ធភាពស៊ាំចុះខ្សោយ សុទ្ធតែជាអ្វីៗដែលគួរឲ្យបារម្ភសម្រាប់មនុស្សចាស់ ហើយវាក៏ជាដើមហេតុនាំឲ្យគុណភាពនៃជីវិតរស់នៅរបស់ពួកគាត់ថយចុះផងដែរ។ យ៉ាងណាមិញ វីតាមីន និងជាតិរ៉ែត្រូវបានគេស្គាល់ថា អាចជួយឲ្យមនុស្សចាស់ជាច្រើនមានសុខភាពល្អបាន ថ្វីបើរបបអាហារប្រចាំថ្ងៃរបស់ពួកគេប្រហែលជាមិនអាចផ្តល់នូវអ្វីដែលរាងកាយគាត់ត្រូវការបាន។ 
ដូច្នេះតើជាតិរ៉ែ និងវីតាមីនអ្វីខ្លះដែលល្អបំផុតសម្រាប់សុខភាពមនុស្សចាស់ទៅ?
ដូច្នេះតើជាតិរ៉ែ និងវីតាមីនអ្វីខ្លះដែលល្អបំផុតសម្រាប់សុខភាពមនុស្សចាស់ទៅ?
កាល់ស្យូម
មនុស្សចាស់គឹប្រឈមខ្ពស់ណាស់នឹងជំងឺពុកឆ្អឹង នេះដោយសារតែមនុស្សចាស់ងាយនឹងរអិលដួលដោយចៃដន្យ ដូច្នេះពួកគេអាចនឹងជួបបញ្ហាបាក់ឆ្អឹងបានគ្រប់ពេល។ ដើម្បីទប់ស្កាត់ជំងឺពុកឆ្អឹង ជាតិកាលស្យូមគឺជាជីវជាតិដ៏សំខាន់បំផុតសម្រាប់ពង្រឹងដល់សុខភាពឆ្អឹងពួកគាត់។
វីតាមីន D
ការដែលញ៉ាំកាល់ស្យូមតែមួយមុខគឺមិនគ្រប់គ្រាន់ឡើយ។ វាគឺជារឿងសំខាន់សម្រាប់រាងកាយដើម្បីអាចប្រើប្រាស់ជាតិកាល់ស្យូមទាំងអស់ដែលបានមកពីអាហារដែលញ៉ាំរួច។ អ្នកជំនាញនិយាយថា វីតាមីន D គឺជារឿងមួយដែលធ្វើឲ្យមានការបឺតស្រូបជាតិកាល់ស្យូមទៅក្នុងឈាមកាន់តែល្អ។ វីតាមីន D ក៏ជួយពង្រឹងដល់សុខភាពធ្មេញ និងការពារជំងឺមហារីក ព្រមទាំងទឹកនោមផ្អែមបានថែមទៀតផង។
វីតាមីន B12
គ្រូពេទ្យជាច្រើននិយាយថា វីតាមីន B គឺល្អបំផុតសម្រាប់ការថែរក្សាកោសិកាខួរក្បាលឲ្យមានសុខភាពល្អ។ ចាប់តាំងពីមនុស្សងាយនឹងមានការថយចុះខាងបញ្ញាស្មារតីមក វាគឺជារឿងសំខាន់បំផុតក្នុងការថែរក្សាកោសិកាខួរក្បាលឲ្យបានល្អ។ ក្នុងចំណោមវីតាមីន B ទាំងអស់ វីតាមីន B12 ត្រូវបានអ្នកវិទ្យាសាស្ត្រអះអាងថា ជួយថែរក្សាខួរក្បាលរបស់មនុស្សយើងឲ្យធ្វើការបានយ៉ាងល្អ និងមានសុខភាពល្អរាប់សិបឆ្នាំ។
ជាតិដែក
នៅពេលមនុស្សយើងអាយុកាន់តែច្រើន រាងកាយនឹងថយចុះការបឺតស្រូបជាតិដែកពីរបបអាហារ។ ហេតុដូច្នេះហើយ ពួកគេក៏នឹងមិនអាចទទួលបានជាតិដែកគ្រប់គ្រាន់សម្រាប់បង្កើតគ្រាប់ឈាមក្រហមដែរ ហើយក៏ងាយនឹងធ្វើឲ្យអស់កម្លាំងថែមទៀត។ ការដែលមិនមានកោសិកាគ្រាប់ឈាមក្រហមគ្រប់គ្រាន់ នឹងធ្វើឲ្យកង្វះគ្រាប់ឈាម។
វីតាមីន C
មានហេតុផលពីរយ៉ាងដែលវិតាមីន C មានសារៈសំខាន់បំផុតសម្រាប់មនុស្សចាស់។ ទីមួយ វាអនុញ្ញាតិឲ្យមានការបឺតស្រូបជាតិដែកពីរបបអាហារកាន់តែច្រើន ឬពីថ្នាំបំប៉ន។ ទីពីរ វានឹងជួយថែរក្សាប្រព័ន្ធភាពស៊ាំកាន់តែខ្លាំង។ ដល់ពេលប្រព័ន្ធភាពស៊ាំខ្លាំង ការបង្កររោគនឹងមិនងាយកើតឡើងលើរាងកាយឡើយ។
ជាតិស័ង្គសី
ក្រៅពីវីតាមីន C ជាតិស័ង្គសីក៏ជាសារធាតុដ៏សំខាន់មួយទៀតក្នុងការថែរក្សាប្រព័ន្ធភាពស៊ាំឲ្យកាន់តែរឹងមាំ។ ការសិក្សាជាច្រើនបានបង្ហាញថា ជាតិរ៉ែដ៏សពិសេសនេះល្អបំផុតក្នុងការជួយកុំឲ្យកើតការបង្កររោគនៅផ្លូវដង្ហើម។ អ្នកវិទ្យាសាស្ត្រនិយាយថា ជាតិស័ង្គសីក៏ជួយជម្រុញដល់មុខងាររបស់ខួរក្បាលលើមនុស្សចាស់ថែមទៀត។
វីតាមីន E
យោងទៅតាមអ្នកជំនាញបានឲ្យដឹងថា វីតាមីន E គឺពិតជាអង់ទីអុកស៊ីដង់ដ៏ខ្លាំងក្លាមែន។ មនុស្សយើងអាចទទួលបានប្រយោជន៍ច្រើនពីជីវជាតិដ៏សំខាន់មួយនេះក្នុងការជួយកំចាត់ចោលរ៉ាឌីកាលសេរីក្នុងខ្លួន។ ការដែលមានរ៉ាឌីកាលសេរីច្រើនក្នុងខ្លួន វានឹងធ្វើឲ្យខូចខាតដល់កោសិកាល្អៗ ហើយភាពចាស់ក៏កើតឡើងយ៉ាងលឿនដែរ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
