កីឡាជាតិ
ជាតិ
លោក កែវ សារ៉េត ឡើងជាអគ្គលេខាធិការ FFC សារជាថ្មី ខណៈ លោក យាន ឈៀង គ្រប់គ្រងមណ្ឌលបាទី លោក កែវ សារ៉េត ត្រូវបានតែងតាំងជាអគ្គលេខាធិការសហព័ន្ធកីឡាបាល់ទាត់កម្ពុជា
× លោក កែវ សារ៉េត ត្រូវបានតែងតាំងជាអគ្គលេខាធិការនៃអគ្គលេខាធិការដ្ឋានសហព័ន្ធកីឡាបាល់ទាត់កម្ពុជា(FFC) ចំណែកលោក យាន ឈៀង ជានាយកមជ្ឈមណ្ឌល និងសាលាបាល់ទាត់ជាតិបាទី។ នេះបើយោងតាមសេចក្តីសម្រេចរបស់សហព័ន្ធកីឡាបាល់ទាត់កម្ពុជា ដែលចុះហត្ថលេខាដោយលោក សៅ សុខា ប្រធានសហព័ន្ធ។
ក្រោយលោក គល់ សុផាណា លាលែងពីតំណែងជាអគ្គេលេខាធិការ កាលពីខែតុលា ឆ្នាំ២០១៦ សហព័ន្ធកីឡាបាល់ទាត់កម្ពុជាពុំមានអគ្គលេខាធិការនោះទេជិតពីរឆ្នាំកន្លងមកនេះ ពោលគឺមានតែអគ្គលេខាធិការស្តីទី គឺលោក ម៉ៃ តុលា តែប៉ុណ្ណោះ។ ទីបំផុតលោក សៅ សុខា ប្រធានសហព័ន្ធ កាលពីថ្ងៃទី១០ ខែកញ្ញា ឆ្នាំ២០១៨ បានសម្រេចតែងតាំងលោក កែវ សារ៉េត អតីតនាយកមជ្ឈមណ្ឌល និងសាលាបាល់ទាត់ជាតិបាទីជាអគ្គលេខាធិការនៃអគ្គលេខាធិការដ្ឋានសហព័ន្ធកីឡាបាល់ទាត់កម្ពុជា។
នេះជាលើកទី២សម្រាប់ លោក កែវ សារ៉េត ចំពោះតួនាទីជាអគ្គលេខាធិការ ពោលគឺលោកធ្លាប់កាន់តួនាទីនេះម្តងរួចមកហើយពីឆ្នាំ១៩៩៩ដល់ឆ្នាំ២០០៥។ បន្ទាប់មកលោក សរ៉េត ត្រូវបានសហព័ន្ធតែងតាំងជានាយកមជ្ឈមណ្ឌលនិងសាលាបាល់ទាត់ជាតិបាទីនៅឆ្នាំ២០១៤ រហូតដល់ឆ្នាំ២០១៨ ដែលទទួលបានតំណែងថ្មីនេះ។
ជាមួយគ្នានេះ លោក សៅ សុខា បានតែងតាំងលោក យាន ឈៀង អតីតប្រធានការិយាល័យប្រកួតនៃ FFC ជានាយកមជ្ឈមណ្ឌលនិងសាលាបាល់ទាត់ជាតិបាទីជំនួសលោក កែវ សារ៉េត ដែលទៅកាន់តួនាទីជាអគ្គលេខាធិការ៕
Tag:
កែវ សារ៉េត
យាន ឈៀង
FFC
© រក្សាសិទ្ធិដោយ thmeythmey.com