សេដ្ឋកិច្ចអន្តរជាតិ
អន្តរជាតិ
ក្រុមហ៊ុនចិនច្រើនរត់ទៅបើករោងចក្រនៅបរទេសដើម្បីគេចពីការដំឡើងពន្ធអាមេរិក ឯវៀតណាមក្លាយជាទិសដៅសំខាន់មួយ
×![]()
ក្រុមហ៊ុនចិនកាន់តែច្រើនបន្តកន្ទុយគ្នាចេញទៅដាក់ទុនរកស៊ីនៅបរទេសដោយអាចដកស្លាកសញ្ញា «ផលិតនៅចិន» ពីទំនិញរបស់ខ្លួន ដើម្បីគេចឲ្យផុតពីផលប៉ះពាល់ដែលបង្កឡើងដោយសង្គ្រាមពាណិជ្ជកម្មរវាងចិន និងអាមេរិកដែលកំពុងបន្តឆេះ។ វៀតណាម ម៉ិកស៊ិកនិងស៊ែប៊ីក្លាយជាគោលដៅធំនៃក្រុមហ៊ុនទាំងនោះ ។
សង្គ្រាមពាណិជ្ជកម្មរវាងមហាអំណាចសេដ្ឋកិច្ចធំទាំងពីរអាមេរិក និងចិនបន្តធ្វើឲ្យពិភពលោកភ័យបារម្ភ និងបង្កើតផលប៉ះពាល់ខ្លាំងដល់ក្រុមក្រុមហ៊ុននៃប្រទេសទាំងពីរ។
សមរភូមិនេះចាប់ផ្តើមដោយការដំឡើងពន្ធ ២៥ ភាគរយជំហានដំបូងរបស់អាមេរិកប្រឆាំងទំនិញចិនដែលមានទំហំ ៥០ ពាន់លានដុល្លារដែលទំនិញទាំងនោះមានយ៉ាងតិច ៨០០ មុខផ្សេងគ្នារួមបញ្ចូលទាំងគ្រឿងម៉ាស៊ីនឧស្សាហកម្ម, គ្រឿងបរិក្ខារសុខាភិបាល និងគ្រឿងបន្លាស់រថយន្តជាដើម។
កាលពីសប្តាហ៍មុន លោក ដូណាល់ ត្រាំ បានព្រមានជាថ្មីថា ពន្ធលើទំនិញ ២០០ពាន់លានដុល្លារផ្សេងទៀតនឹងត្រូវដាក់ចេញនៅពេលឆាប់ៗខាងមុខផង ស្របពេលដែលមន្ត្រីភាគីទាំងពីរមិនទាន់មានលទ្ធភាពរកដំណោះស្រាយបញ្ហាជុំវិញការប្រឈមមុខគ្នាផ្នែកពាណិជ្ជកម្មនេះនៅឡើយ។
បើតាមទីភ្នាក់ងារព័ត៌មាន AFP សង្គ្រាមដំឡើងពន្ធនេះកំពុងធ្វើឲ្យក្រុមហ៊ុនចិនជាច្រើនចាប់ផ្តើមដករោងចក្រខ្លួនចេញទៅតាំងទីនៅបរទេសវិញដើម្បីអាចដកស្លាកសញ្ញា «ផលិតនៅចិន» ចេញពីទំនិញរបស់ខ្លួន និងអាចគេផុតពីការដំឡើងពន្ធពេលនាំចូលទីផ្សារអាមេរិកផង។
ក្រុមហ៊ុនដែលចាប់ផ្តើមប្តូរទីតាំងទៅបរទេសទាំងនោះមានទាំងក្រុមហ៊ុនផលិតកង់, កង់ឡាន, ផ្លាស្ទិក ក៏ដូចជាក្រុមហ៊ុនវាយនភណ្ឌផងដែរ។ គេរកឃើញផងដែរថា គោលដៅសំខាន់សម្រាប់ក្រុមហ៊ុនចិនតាំងទីរោងចក្ររបស់ខ្លួនមានដូចជាវៀតណាម ស៊ែប៊ី និងម៉ិកស៊ិក។
ក្រុមហ៊ុនផលិតគ្រឿងបន្លាស់កង់ Hl Corp ដែលមានទីតាំងនៅ Shenzhen នោះបានផ្លាស់ប្តូរទីតាំងរោងចក្ររបស់ខ្លួនទៅកាន់ប្រទេសវៀតណាមកាលពីខែមុន ដោយតំណាងក្រុមហ៊ុននេះអះអាងថាបញ្ហាពន្ធជារឿងដែលបង្ខំឲ្យខ្លួនសម្រេចចិត្តបែបនេះ។
ក្រុមហ៊ុនចិន Hailide New Material ដែលជាឧស្សាហកម្មផលិតអំបោះ Polyester សម្ភារផ្លាស្ទិក និងសរសៃលួសទ្រាប់កង់រថយន្តបានប្តូរទីតាំងរោងចក្ររបស់ខ្លួនចេញពីខេត្ត Zhejiang ទៅកាន់សហរដ្ឋអាមេរិក និងប្រទេសផ្សេងទៀតវិញ។ ចំណែកក្រុមហ៊ុនផលិតកង់រថយន្ត Linglong បានបើករោងចក្រតម្លៃ ៩៩៤ លានដុល្លារនៅប្រទេសស៊ែប៊ី។
ក្រុមហ៊ុនមួយចំនួនទៀតជាពិសេសក្រុមហ៊ុនផលិតឧបករណ៍អេឡិចត្រូនិក វាយនភណ្ឌ និងម៉ូតូ បានជញ្ជូនរោងចក្ររបស់ខ្លួនមកកាន់ប្រទេសមីយ៉ាន់ម៉ា ថៃ និងម៉ិកស៊ិកវិញដែរ។
យ៉ាងណាមិញ មុនមានសង្គ្រាមពាណិជ្ជកម្មនេះ ក្រុមហ៊ុនមួយចំនួនបានប្តូរទីតាំងរបស់ខ្លួនពីចិនរួចទៅហើយដោយសារតែការកើនឡើងនៃតម្លៃកម្លាំងពលកម្ម រួមជាមួយលក្ខខណ្ឌតម្រូវសម្រាប់ការចំណាយលើការការពារបរិស្ថានជាដើមនោះ។
ដោយឡែក ក្រៅពីក្រុមហ៊ុនចិន ក្រុមហ៊ុនបរទេសធំៗមួយចំនួនក៏ចាប់ផ្តើមចាកចេញពីចិនដើម្បីគេឲ្យផុតពីផលប៉ះពាល់នេះដូចគ្នា។ ក្រុមហ៊ុននោះមានដូចជាក្រុមហ៊ុនផលិតសម្ភារក្មេងលេង Habro, ក្រុមហ៊ុនផលិតកាមេរ៉ា Olympus, ក្រុមហ៊ុនស្បែកជើង Deckers និង Steve Madden និងក្រុមហ៊ុនធំៗផ្សេងទៀត៕
© រក្សាសិទ្ធិដោយ thmeythmey.com
